စစ်ကိုင်းတိုင်း၊ ခန္တီးအကျဉ်းထောင်မှာ ပုဒ်မ ၅၀၅(က) နဲ့ ဖမ်းဆီးခံထားရတဲ့ တိုင်းလိုင် ( ရှမ်းနီ) အမျိုးသားဖွံ့ဖြိုးတိုးတက်ရေးပါတီ ဥက္ကဋ္ဌ ကိုစိုင်းဘိုဘိုအောင် အပါအဝင် နိုင်ငံရေးအကျဉ်းသား ၄ ဦး နိုဝင်ဘာ ၁၇ ရက်က လွတ်မြောက်လာပါတယ်။
ဒေသခံအကျဉ်းဦးစီးဌာန ဝန်ထမ်းတဦးက “အခုမနက်မှာ စစ်ကောင်စီက လွတ်ငြိမ်းချမ်းသာခွင့်နဲ့ ခန္တီးကနေ အကျဉ်းသား ၄ ဦး လွှတ်ပေးလိုက်တယ်။ ခန္တီးက ၁ ယောက်၊ ဟုမ္မလင်းဘက်က ၃ ယောက်၊ စုစုပေါင်း ၄ ယောက်၊ သူတို့က ၅၀၅(က) နဲ့ ဖမ်းဆီးခံရသူတွေဖြစ်တယ်”လို့ ပြောပါတယ်။
စိုင်းဘိုဘိုအောင်ကတော့ အခုညနေ ၃ နာရီလောက်မှာ အိမ်ပြန်ရောက်ပြီလို့ သူ့ရဲ့ မိတ်ဆွေသူငယ်ချင်းက ပြောပါတယ်။
တိုင်းလိုင်(ရှမ်းနီ) အမျိုးသားများဖွံ့ဖြိုးတိုးတက်ရေးပါတီ မြို့နယ်ဥက္ကဋ္ဌ စိုင်းဘိုဘိုအောင်ဟာ ခန္တီးမြို့က စစ်အာဏာရှင်ဆန့်ကျင်ရေး လှုပ်ရှားမှုမှာ ပါဝင်တယ်ဆိုပြီး စစ်ကောင်စီက ၂၀၂၁ ဇွန် ၂၁ ရက်နေ့မှာ ဖမ်းဆီးပြီး ပုဒ်မ ၅၀၅(က) နဲ့ ထောင်ဒဏ် ၂ နှစ် ချခဲ့တာ ဖြစ်ပါတယ်။
သူဟာ ၂၀၂၀ ရွေးကောက်မှာ ခန္တီးမြို့ တိုင်းလိုင်(ရှမ်းနီ)ပါတီကနေ အမှတ် ၂ မဲဆန္ဒနယ် ကိုယ်စားလှယ်လောင်းအဖြစ် ဝင်ရောက်ယှဉ်ပြိုင်ခဲ့ပါတယ်။
စစ်ကိုင်းတိုင်း၊ ခန္တီးမြို့ အကျဉ်းထောင်ကနေ ကေအိုင်အေတပ်ဖွဲ့အချို့အပါအဝင် နိုင်ငံရေးအကျဉ်းသား ၁၄ ယောက် အောက်တိုဘာ ၁၈ ရက် မနက်က ထောင်ဖောက်ပြီး ထွက်ပြေးရာမှာ ၅ ယောက် ပြန်လည်ဖမ်းမိပြီး တယောက် သေဆုံးသွားတယ်လို့ မြို့ခံတွေထံက သိရပါတယ်။
ခန္တီးမြို့နဲ့ ၃ မိုင်အကွာမှာရှိတဲ့ အကျဉ်းထောင်မှာ မနေ့ မနက်အစောပိုင်း ၃ နာရီလောက်က အကျဉ်းသားတွေ ထွက်ပြေးလွတ်မြောက်သွားတာပါ။
ဒေသခံတဦးက “မနက် ၃ နာရီလောက် ဖြစ်မယ်။ ကျနော်တို့ သိတာ မနက် ၅ နာရီလောက်မှ သိတယ်။ လက်နက်တချို့လည်း ပါသွားတယ်။ စစ်ကောင်စီတပ်တွေက ခန္တီးမြို့ထဲမှာ ပိတ်ဆို့စစ်ဆေးနေပြီး ကုန်းလမ်း၊ ရေလမ်း အကုန်ပိတ်ထားတယ်” လို့ ပြောပါတယ်။
ခန္တီးအကျဉ်းထောင်ကနေ ၁၄ ဦး ထွက်ပြေးခဲ့ရာမှာ ၅ ဦး ပြန်လည်ဖမ်းဆီးခံရကာ ဖမ်းဆီးခံထားရသူတွေထဲက အကျဉ်းသားတယောက်ကို စစ်ဆေးမြန်းပြီးနောက်မှာ ခန္တီးပြည်သူ့ဆေးရုံကို ပို့ဆောင်ထားစဉ် နေ့လယ် ၂ နာရီမှာ သေဆုံးသွားတယ်လို့ ရဲဝန်ထမ်းတဦးက ပြောပါတယ်။
သေဆုံးသွားတဲ့ အကျဉ်းသားဟာ ဖမ်းဆီးခံရစဉ် ပစ်ခတ်ခံရတာလား စစ်ဆေးစဉ်မှာ နှိပ်စက်ခံရပြီး သေဆုံးခဲ့တာလားဆိုတာကိုတော့ ရှင်းရှင်းလင်းလင်း မသိရသေးပါဘူး။
သြဂုတ် ၃၀ ရက်က ဖမ်းဆီးခံရတဲ့ ကေအိုင်အေ တပ်ဖွဲ့ဝင် ၄ ယောက်လည်း အခု ထွက်ပြေးလွတ်မြောက်သွားတဲ့အထဲ ပါသွားတယ်လို့ သိရပါတယ်။
အကျဉ်းသားတွေ ထောင်ဖောက်ပြေးမှုဖြစ်ပွားပြီးနောက် ခန္တီးမြို့မှာ စစ်ကောင်စီ လုံခြုံရေးတပ်ဖွဲ့တွေက ပိတ်ဆို့စစ်ဆေးနေပါတယ်။
