တနင်္သာရီတိုင်း၊ ကော့သောင်းခရိုင်၊ ခမောက်ကြီးမြို့နယ်ထဲမှာ ဧပြီ ၁၆ ရက် ညနေပိုင်းက PDF ပြည်သူ့ကာကွယ်ရေးတပ်ဖွဲ့ဝင်တွေနဲ့ စစ်ကောင်စီလက်အောက်ခံ ပြည်သူ့စစ်အဖွဲ့ ပစ်ခတ်မှုဖြစ်ပွါးပြီး ရွာသား ၃၀၀ ကျော်လောက် ထိုင်းနိုင်ငံဘက်ကို စက်လှေတွေနဲ့ ထွက်ပြေးတိမ်းရှောင်လာကြပါတယ်။
မနေ့ ညနေပိုင်းက PDF တပ်ဖွဲ့ဝင် ၁၀ ဦးလောက်ဟာ ခမောက်ကြီးမြို့နယ် ဆိတ်ဖူးကျေးရွာထဲကို မော်တော်ဆိုင်ကယ် ၅ စီးနဲ့ ဝင်ရောက်လာပြီး ကျေးရွာပြည်သူ့စစ်ခေါင်းဆောင်နဲ့ လက်ထောက်တို့ကို ဝင်ရောက်ပစ်ခတ်ရာမှာ နှစ်ဘက်အပြန်အလှန်ပစ်ခတ်မှုရှိခဲ့တယ်လို့ Siamrath ထိုင်းသတင်းမှာ ဖော်ပြပါတယ်။
အဆိုပါပစ်ခတ်မှုကြောင့် ပြည်သူ့စစ်ခေါင်းဆောင် ကျော်ဝင်းနဲ့ ဒုခေါင်းဆောင် မြင့်အောင် တို့ သေဆုံးပြီး ရွာသား ၃၀၀ ကျော်ဟာ ကရပူရီမြစ်ကို လှေနဲ့ကူးဖြတ်ကာ ထိုင်းဘက်ခြမ်း ရနောင်းခရိုင်၊ ကရပူရီမြို့နယ်၊ နမ့်ကျစ်အုပ်စု၊ ဘန့်ဟိုထနွန်ရွာဘက်ကို ထွက်ပြေးလာကြတယ်လို့ ဆိုပါတယ်။
ထွက်ပြေးတိမ်းရှောင်လာတဲ့ ရွာသားတွေကို ကရပူရီမြို့နယ်အုပ်ချုပ်ရေးမှူးရဲ့ ညွှန်ကြားချက်အရ သက်ဆိုင်ရာ တာဝန်ရှိသူတွေက ယာယီတဲထိုးကာ နေရာချထားပေးပြီး ကရပူရီမြို့နေပြည်သူများက အစာရေစာ ချက်ပြုတ်ကျွေးမွေးကြတယ်လို့ ထိုင်းသတင်းမှာ ဖော်ပြထားပါတယ်။
ဧပြီ ၁၆ ရက် သင်္ကြန်အတက်နေ့ ညနေ ၄ နာရီမှာ ခမောက်ကြီးမြို့ ဆိတ်ဖူးရွာနေ ပြည်သူ့စစ်ခေါင်းဆောင် ကျော်ဝင်းနဲ့ ဒုခေါင်းဆောင် မြင့်အောင်ကို ကော့သောင်း ပကဖက ရှင်းလင်းခဲ့တယ်လို့ တနင်္သာရီ ကာကွယ်ရေးအဖွဲ့က ထုတ်ပြန်ထားပါတယ်။
အဆိုပါပြည်သူ့စစ်အဖွဲ့ကနေ အေကေ ၄၇ အမျိုးအစား သေနတ် ၂ လက်၊ ကျည် ၁၁၉ တောင့်၊ ၉မမ ပစ္စတို ၁ လက်၊ ကျည်ကာ ၄ ထည်၊ ဆုံလည် ဂက်စ်သေနတ် ၁ လက် ၊ ကျည်ဘောက် ၅ ခုနဲ့ ဓားတွေ သိမ်းဆည်းရရှိခဲ့ပါတယ်။
ကော့သောင်းမြို့နယ်ရှိ စစ်ကောင်စီတပ်ဖွဲ့ဝင်တွေ၊ ပျူစောထီးတွေအနေနဲ့ လူထုနဲ့အတူ အမြန်ဆုံးပူးပေါင်းဖို့နဲ့ မပေါင်းရင် ဆက်လက်ချေမှုန်းသွားမယ်လို့ တနင်္သာရီ PDF က သတိပေးထုတ်ပြန်ထားပါတယ်။
PHOTO -Siamrath
တနင်္သာရီတိုင်း၊ ကော့သောင်းခရိုင်၊ ခမောက်ကြီးမြို့နယ်၊ ဝိုင်ဒင်းကျေးရွာမှာ စစ်ကောင်စီတပ်နဲ့ ပြည်သူ့ကာကွယ်ရေးပူးပေါင်းတပ်တို့တိုက်ပွဲဖြစ်ပြီး PDF ရဲဘော် ၉ ယောက် သေဆုံးခဲ့တယ်လို့ ပြည်သူ့ကာကွယ်ရေးတပ်မတော် ကော့သောင်းခရိုင်အမှတ်(၁)က ထုတ်ပြန်ပါတယ်။
မတ် ၄ ရက် မနက် ၅ နာရီခွဲလောက်က ဝိုင်ဒင်းကျေးရွာအနီး တောတွင်း တနေရာတွင် ယာယီ အခြေပြုနေတဲ့ တပ်ရင်း (၁) ပုလဲစစ်ကြောင်းမှူး မြစ်ချောင်းပါအဖွဲ့ကို စစ်တပ်က လာရောက် တိုက်ခိုက်ခဲ့တာကြောင့် တိုက်ပွဲ ဖြစ်ခဲ့တာဖြစ်ပါတယ်။
ပြည်သူ့ကာကွယ်ရေးတပ်ဖွဲ့ဝင်တဦးက "ရဲဘော် ကိုးဦး ကျဆုံးသွားတယ်။ စစ်တပ်က အလစ်ဝင်တိုက်တာ။ ရွာသား သတင်းပေး တချို့ကြောင့် အဝိုင်းခံရတာပါ" လို့ ပြောပါတယ်။
နှစ်ဖက်ထိပ်တိုက်တိုက်ပွဲ ပြင်းထန်ခဲ့ပြီး ကျဆုံးသွားတဲ့ရဲဘော် ၉ ဦးရဲ့ အလောင်းတွေ မကောက်နိုင်ဘဲ မနက် ၁ဝ နာရီမှာ ပြည်သူ့ကာကွယ်ရေးပူးပေါင်းတပ်က ဆုတ်ခွာ လာခဲ့ရတယ် လို့ သိရပါတယ်။
ဝိုင်းဒင်းရွာအနီးကိုတိုက်ပွဲ မိနစ် ၂၀ ခန့်ဖြစ်ပွားခဲ့ပြီး စစ်သည် ၁ ဦး ဒဏ်ရာရရှိခဲ့ကာ အလောင်း ၉ လောင်း၊ M-4 သေနတ် ၁ လက်၊ M-16 သေနတ် ၁ လက်၊ AK-47 သေနတ် ၁ လက်၊ ကိုးလုံးကျည်သေနတ် ၁ လက်၊ တူမီးသေနတ် ၁ လက်၊ကျည်ဆန် ၂၀၀ တောင့်ခန့်၊ လက်လုပ်မိုင်း ၃၈ လုံး၊ တိုက်မိုင်း ၂ လုံး၊ ကျည်အိမ် ၄ ခု ဆက်စပ်ပစ္စည်းတွေ သိမ်းဆည်းရမိခဲ့တယ်လို့ စစ်ကောင်စီဘက်ကလည်း သတင်းထုတ်ပြန်ထားပါတယ်။
ပြည်သူ့ကာကွယ်ရေးထိန်းချုပ်နယ်မြေအဖြစ် သတ်မှတ်ပြီးနောက်ပိုင်း အဲဒီရွာမှာ ဖေဖော်ဝါရီလ ကစလို့ နှစ်ဖက်တိုက်ပွဲတွေ ဖြစ်နေတာဖြစ်ပြီး စစ်တပ်က အင်အားသုံးကာ စစ်ဆင်ရေး ဝင်လာတာကြောင့် ဒေသခံတွေ ထွက်ပြေးနေကြရပါတယ်။
