ရန်ကုန်တိုင်း၊ ခရမ်းမြို့နယ်၊ ကံဘဲ့ကျေးရွာမှာ အုပ်ချုပ်ရေးမှူးတဦး သေနတ်နဲ့ ပစ်သတ်ခံရအပြီး စစ်ကောင်စီတပ်က အမျိုးသမီးတွေ အပါအဝင် လူငယ် ၁၀ ဦးထက်မနည်းကို ဖမ်းဆီးထား ပါတယ်။

ကံဘဲ့ကျေးရွာ ဘုန်းတော်ကြီးကျောင်းအလှူမှာ မတ်လ ၃၀ ရက်က ဗွီဒီယိုမှတ်တမ်း ရိုက်ကူးပေးနေတဲ့ အမှတ် ၁ ရပ်ကွက် အုပ်ချုပ်ရေးမှူး မျိုးဇော်ဦး သေနတ်နဲ့ ပစ်သတ်ခံရပြီးနောက်ပိုင်း စစ်ကောင်စီတပ်က နယ်ခံ လူငယ် ၁၀ ဦးထက် မနည်းကို ဖမ်းဆီးထားတာလို့ ဒေသခံတွေဆီက သိရပါတယ်။

ဒေသခံအမျိုးသားတဦးက “အုပ်ချုပ်ရေးမှူး မျိုးဇော်ဦး သေနတ်နဲ့ ပစ်သတ်ခံရပြီးနောက်ပိုင်း စစ်တပ်က လူငယ်တွေကိုဖမ်းတာ ၁၀ ဦးထက်မနည်းတော့ဘူး။ ကျနော်သိရသလောက်ဆိုရင် အမျိုးသမီး နှစ်ဦးလောက်ပါတယ်။ အများအားဖြင့် အသက် ၂၀ နဲ့ ၃၀ ဝန်းကျင်တွေ အဖမ်းခံထားရတယ်” လို့ ပြောပါတယ်။

စစ်ကောင်စီတပ်က ဖမ်းဆီးထားတဲ့ လူငယ်တွေဟာ ကံဘဲ့ကျေးရွာနဲ့ ဒေးပေါက်ကျေးရွာက လူငယ်တွေဖြစ်ပြီး ဒေးပေါက်ကျေးရွာ စာသင်ကျောင်းမှာ ဖမ်းဆီးစစ်ဆေးနေတယ်လို့လည်း သူက ဆက်ပြောပါတယ်။

ဒေးပေါက်ကျေးရွာမှာ စစ်ကောင်စီတပ်က အင်အား ၁၀၀ နီးပါးနဲ့ လုံခြုံရေး တင်းကျပ်စစ်ဆေးကာ ဖမ်းဆီးနေလို့ ခရမ်းမြို့နယ်အတွင်း ပြည်သူတွေအနေနဲ့ သတိထားသွားလာကြဖို့ ခရမ်းပြည်သူ့ကာကွယ်ရေးတပ်ဖွဲ့က ကြေညာချက် ထုတ်ပြန်ထားပါတယ်။

ရန်ကုန်၊ ခရမ်းမြို့နယ်၊ စွယ်တော်ကွင်းကျေးရွာလမ်းမမှာ အမျိုးသားတယောက်ကို  မတ်လ ၃၁ ရက် ဒီနေ့လယ် ၁ နာရီလောက်က စစ်ကောင်စီလက်အောက်ခံ ရဲတပ်ဖွဲ့က ပစ်ခတ်တာကြောင့် သေဆုံးသွားတယ်လို့ မြို့ခံတွေက ပြောပါတယ်။

သေဆုံးသူဟာ အသက် ၃၀ လောက်ရှိပြီး ဒေပေါက်ကျေးရွာဘက်ကနေ စွယ်တော်ကွင်းဘက်ကို နက်ပြာရောင်ဘေးလွယ်အိတ်ကို ကိုင်ကာ လမ်းလျှောက်လာပြီး လမ်းမှာ စစ်ကောင်စီတပ်က သေနတ်နဲ့ချိန် ဖမ်းဆီးတာကြောင့် နောက်ပြန်ပြေးရာက ပစ်သတ်ခံခဲ့ရတာပါ။

မြို့ခံ ပရဟိတအသင်းတာဝန်ရှိသူတဦးက “၁ နာရီခွဲခါနီးလောက်မှာ ရဲက ဖုန်းဆက်တာပါ။ စွယ်တော်ကွင်းမှာ DB ကောက်ရမယ် ပြောတယ်။ ၂ ချက်မှန်ထားပါတယ်။ လည်ပင်းတချက်၊ ရင်ဘတ်တချက်၊ ခရမ်းဆေးရုံကြီး ရင်ခွဲရုံကို ပို့ထားပါတယ်” လို့ ပြောပါတယ်။

စစ်ကောင်စီဘက်က သေနတ်နဲ့ ၂ ချက် ပစ်ခတ်ခဲ့တာကြောင့် စစ်ဆေးရေးနေရာရဲ့ ပေ ၁၅၀ လောက်ဝေးတဲ့ လမ်းဘေးမြက်ခင်းပေါ်မှာ လဲကျသေဆုံးသွားတာလို့ သိရပါတယ်။

သေဆုံးသူရဲ့အိတ်ထဲက လက်ကိုင်ဖုန်း ၁ လုံး၊ ကျပ် ၂၀,၀၀၀ နဲ့ လက်ပစ်ဗုံးတလုံးကို ရှာတွေ့ခဲ့တယ်လို့ စစ်ကောင်စီဘက်က ပြောပေမဲ့ လက်ပစ်ဗုံးတွေ့ရှိမှုကိုတော့ အတည်ပြုနိုင်ခြင်း မရှိသေးပါဘူး။

ခရမ်းမြို့နယ်မှာ စစ်ကောင်စီဘက်က မတ်လ ၃၀ ရက် မနက်ပိုင်းက ကံဘဲ့ကျေးရွာမှာ အုပ်ချုပ်ရေးမှူးတဦး သေနတ်နဲ့ ၁၀ ချက်ခန့် ပစ်သတ်ခံရပြီးကတည်းက လုံခြုံရေးတင်းကျပ်နေတာလို့ သိရပြီး မတ်လ ၃၁ ရက်က စစ်ကောင်စီပစ်ခတ်လို့ သေဆုံးသူ အမျိုးသားကို ခရမ်းဆေးရုံ ပို့ဆောင်ထားတယ်လို့ သိရပါတယ်။