ရခိုင်ပြည်နယ်၊ မောင်တော၊ ဘူးသီးတောင် မြို့နယ်တွေက ဒေသခံမွတ်စလင်တွေကို နိုင်ငံသားစိစစ်ရေးကတ်တွေ ထုတ်ပေးနေပေမယ့် ခရိုင်ပြင်ပ ခရီးသွားလာခွင့်ရရေး ခွင့်ပြုချက်တောင်းနေရတာကြောင့် အခက်အခဲကြုံနေကြရပါတယ်။
"NVC ကတ်နဲ့ မြို့နယ်အတွင်းသာသွားလာလို့ရတာပါ။ မြို့နယ်ပြင်ပကိုသွားမယ်ဆိုရင် ခရီးသွားလာခွင့် လက်မှတ် ပုံစံ ၄ ပါမှသွားလို့ရပါတယ်။ အခက်တွေ့တာက NVC ကို ခရီးသွားလာခွင့်လွယ်ကူစွာရရှိဖို့ ပြုလုပ်ထားကြတာ လွယ်ကူစွာသွားလာခွင့်ပြုဖို့လိုပါတယ်” လို့ မောင်တောဒေသခံမွတ်စလင်တဦးက ပြောပါတယ်။
မောင်တောခရိုင်ဒေသခံ မွတ်စလင်တွေဟာ နိုင်ငံသားစိစစ်ရေးကတ် (NVC) ပြုလုပ်ထားရှိကြပေမယ့် စစ်တွေ၊ ရန်ကုန် စတဲ့ ခရိုင်ပြင်ပရှိမြို့နယ်တွေကို လွတ်လပ်စွာသွားလာခွင့်မရရှိကြသေးဘဲ ခရီးသွားလာခွင့်ပုံစံ ၄ လျှောက်ထားနေကြရတာကြောင့် အခက်အခဲကြုံနေကြရတာလို့ ဆိုပါတယ်။
ပုံစံ ၄ လျှောက်ထားရာမှာလည်း ရပ်ကွက်အုပ်ချုပ်ရေးမှူးထောက်ခံစာ၊ ရဲစခန်းထောက်ခံစာ၊ ကိုဗစ်ဆေးထိုးပြီးကြောင်းထောက်ခံစာနဲ့ မြို့နယ်ထွေအုပ်ထောက်ခံစာတွေ ပါရှိပြီးမှ ခရိုင်လ.ဝ.ကမှာ လျှောက်ထားရတာပါ။
ဘူးသီးတောမြို့နယ်နေ မွတ်စလင်တဦးက "ကျနော်တို့မှာ ယခင်တုန်းကဆိုရင် အမျိုးသားမှတ်ပုံတင်တွေဆိုပြီး ၃ ခေါက်ချိုး မှတ်ပုံတင်တွေရှိတယ်။ အဲဒီမှတ်ပုံတင်တွေအချို့မှာ ရိုဟင်ဂျာရေးလို့ ရေးထားတာရှိသလို မွတ်ဆလင်လို့ ရေးထားတာတွေလည်းရှိတယ်။ ၁၉၉၁/၉၂ မှာ ထုတ်ပေးလာတဲ့ White Card မှာ အချို့မှာကျတော့ မွတ်စလင်တွေရှိသလို ဘင်္ဂါလီလို့ရေးထားလည်းရှိတယ်။ ၂၀၁၅ မှာထုတ်ပေးတဲ့ NVC ကတ်မှာကျတော့ အားလုံး ဘင်္ဂါလီလို့သာ ရေးသားတာတွေ့ရပါတယ်” လို့ ပြောပါတယ်။
ရခိုင်ပြည်နယ်ရှိ မွတ်စလင်တွေကို ၁၉၉၁/၉၂ ခုနှစ်မှာ White Card ခေါ် ယာယီသက်သေခံ လက်မှတ်တွေ ထုတ်ပေးခဲ့ကြပြီး အဲဒီကတ် သက်တမ်းကုန်ဆုံးချိန် ၂၀၁၅ ခုနှစ် ဧပြီလမှစတင်ကာ အစိမ်းရောင် သက်သေခံကတ်ပြား National verification card (NVC) ထုတ်ပေးတဲ့ လုပ်ငန်းစဉ်ကို ရခိုင်ပြည်နယ်တခုလုံးမှာ လုပ်ဆောင်ပေးခဲ့ကြတာပါ။
၂၀၁၅ ခုနှစ်က မောင်တောခရိုင်မှာ မွတ်စလင် လူဦးရေဟာ ၈ သိန်းနီးပါး ရှိနေခဲ့ပေမယ့် NVC ကတ် ထုတ်ယူထားတဲ့ လူဦးရေဟာ ၄၀၀၀ ကျော်သာရှိခဲ့တယ်လို့ ဆိုပါတယ်။
၂၀၁၇ ခုနှစ် အကြမ်းဖက်မှုဖြစ်စဉ်ကြောင့် မောင်တောခရိုင်က လူ ၆ သိန်းကျော် နေရပ်စွန့်ခွာခဲ့ကြရပြီး ကျန်ရှိ လူဦးရေ ၂ သိန်းအနက် ၂၀၂၂ ခုနှစ် ဇွန် ၁၃ ရက် ဒီနေ့အထိ NVC ကတ်ရရှိထားသူ ၁ သောင်းကျော်သာ ရှိတယ်လို့ ခရိုင်လ.ဝ.က ရဲ့ စာရင်းတွေအရ သိရပါတယ်။
ရခိုင်ပြည်နယ်၊ မောင်တော-အငူမှော်လမ်းမှာ ဧပြီ ၁ ရက်နေ့ကစပြီး ခရီးသွားပြည်သူတွေကို နိုင်ငံသားမှတ်ပုံတင် စစ်ဆေးသွားမယ်လို့ သိရပါတယ်။
မောင်တောခရိုင် လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန တာဝန်ရှိသူတဦးက “ဟုတ်ပါတယ်။ ဧပြီ ၁ ရက်နေ့ကစပြီး ခရီးသွားအားလုံးကို မှတ်ပုံတင် စစ်ဆေးသွားမှာပါ။ မှတ်ပုံတင် မပါရင်တော့ သွားလာခွင့် မပြုတော့ပါဘူး” လို့ ပြောပါတယ်။
မောင်တော-အငူမှော် လမ်းမှာ အရင်က တိုင်းရင်းသားတွေအနေနဲ့ မှတ်ပုံတင်စစ်ဆေးတာမရှိဘဲ သွားလာနိုင်ကြပြီး မောင်တောခရိုင်က နိုင်ငံသားဖြစ်ခွင့်မရတဲ့ မွတ်စလင်တွေကတော့ သက်ဆိုင်ရာ ထောက်ခံစာတွေနဲ့ ခရီးသွားလာနေကြတာပါ။
အခုအခါ ထောက်ခံစာတွေနဲ့ ခရီးသွားလာခွင့် မပြုတော့ဘဲ နိုင်ငံသားမှတ်ပုံတင် စစ်ဆေးသွားမှာလည်း ဖြစ်ပါတယ်။
မောင်တောဒေသခံ ကားသမားတဦးကတော့ “နိုင်ငံသားကတ်မရှိတဲ့ မွတ်စလင်တွေက စစ်တွေနဲ့ ရန်ကုန်ကို သွားကြရင် ထောက်ခံစာမျိုးစုံတွေနဲ့ သွားကြတယ်။ ထွေအုပ်က ထုတ်ပေးတဲ့ ထောက်ခံစာတွေ ချမ်းသာတဲ့သူတွေဆိုရင် တိုင်းမှူးထောက်ခံစာ၊ နယ်လုံဝန်ကြီး ထောက်ခံစာတွေနဲ့တောင် သွားလာနေကြတာတွေ ရှိတယ်” လို့ ပြောပါတယ်။
အငူမှော် စစ်ဆေးရေးဂိတ်မှာတော့ ...
၂၀၂၂ ခုနှစ်၊ ဧပြီလ ၁ ရက်နေ့ နံနက် ၆ နာရီ အချိန်မှစ၍ နိုင်ငံသားကတ်(မှတ်ပုံတင်) မပါရှိဘဲ ထောက်ခံချက်ဖြင့် ခရီးသွားလာခြင်းကို ခွင့်မပြုတော့ပါ။
ခရီးသည်များအားလုံး ယာဉ်ပေါ်မှ မိမိတို့၏ နိုင်ငံသားကတ်(မှတ်ပုံတင်)များကို မြင်သာအောင် ပြသရမည်။
ယာဉ်ကို ရပ်တန့် စစ်ဆေးပါက ကြည်ဖြူစွာ အစစ်ဆေးခံရမည် ဆိုပြီး ပြည်သူများသိသာရန် ခေါင်းစဥ်နဲ့ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနက အသိပေးထားတာ ရှိပါတယ်။
