မြန်မာနိုင်ငံမှာရှိတဲ့ အနောက်နိုင်ငံသံရုံးတချို့က နိုင်ငံခြားသားတွေအတွက် ခရီးသွားလုံခြုံရေး သတိပေးချက် ထုတ်ပြန်ထားတဲ့အတွက် ကမ္ဘာလှည့်ခရီးသွားလုပ်ငန်းအပေါ် ထိခိုက်မှုရှိနေတယ်လို့ ခရီးသွားလုပ်ငန်းရှင်တွေထံကနေ သိရပါတယ်။
အမေရိကန်သံရုံးနဲ့ ဗြိတန်သံရုံးတို့က မြန်မာနိုင်ငံမှာ ရောက်ရှိနေကြတဲ့ သူတို့ နိုင်ငံသားတွေကို နိုင်ငံတွင်းသွားလာတဲ့အခါ အထူး သတိထားကြဖို့နဲ့ လာမယ့် လွတ်လပ်ရေးနေ့နဲ့ ပြည်ထောင်စုနေ့ အပါအဝင် အထင်ကရ ပိတ်ရက်တွေမှာ ဂရုစိုက် သွားလာကြဖို့ ဒီဇင်ဘာ ၂၃ ရက်က သတိပေးချက် ထုတ်ပြန်ထားပါတယ်။
အဲဒီ ထုတ်ပြန်ချက်တွေထဲမှာ ရန်ကုန်မှာ ရှိတဲ့ Shangri-La ဟိုတယ်နဲ့ Lotte ဟိုတယ်တွေ အပါအဝင် ရန်ကုန်၊ နေပြည်တော်က အစိုးရအဆောက်အအုံ၊ စစ်ဆေးရေးဂိတ်တွေ၊ စားသောက်ဆိုင်တွေ၊ ဘားတွေ အပါအဝင် စစ်တပ်နဲ့ ပတ်သက် ဆက်နွှယ်နေတဲ့ နေရာတွေကို သတိထား သွားလာကြဖို့ ထုတ်ပြန်ထားတာပါ။
မြန်မာနိုင်ငံ ခရီးသွားလုပ်ငန်းရှင်များအသင်း ဥက္ကဋ္ဌ ဦးနောင်းနောင်းဟန်က"ပွင့်ပွင့်လင်းလင်း ပြောရရင် ခရီးသွားဖို့အတွက် အန္တရာယ်ရှိတဲ့နိုင်ငံ၊ မသွားဖို့ ထုတ်ပြန်ထားတဲ့ နိုင်ငံထဲမှာ မြန်မာနိုင်ငံ ပါနေတုန်းပဲ အခုထိပေါ့။ အဲဒီ ထုတ်ပြန်ချက် ကြေညာလိုက်တဲ့ အချိန်မှာ တကမ္ဘာလုံးကနေ မြန်မာနိုင်ငံကို မသွားတော့ဘူး ဆိုပြီးတော့ ဖြစ်သွားတာရှိတယ်။ ခရီးသွား ကုမ္ပဏီတွေကနေ မြန်မာနိုင်ငံအတွက် ခရီးစဉ် ရောင်းချနေတာတွေ ရပ်တန့်လိုက်တာတွေ ရှိတယ်။ ဒါကြောင့်မို့ ခရီးသွားဝင်ရောက်မှုတွေ အများကြီး သက်ရောက်မှု ရှိပါတယ်" လို့ ပြောပါတယ်။
အခုဖြစ်ပေါ်နေတဲ့ နိုင်ငံရေး အခြေအနေအရ နိုင်ငံရဲ့ ပဋိပက္ခတွေ၊ ဒေသတွင်း မတည်ငြိမ်မှုတွေအပေါ် ကြည့်မယ်ဆိုရင် နိုင်ငံရဲ့ နေရာအနှံ့အပြားကို ခရီးသွားနိုင်တဲ့ နည်းနေပါသေးတယ်။ လက်ရှိ ခရီးသွားနိုင်တဲ့ နေရာလေးတွေကိုပဲ စုပြုံပြီး သွားနေတာ ဖြစ်တဲ့အတွက် သက်ဆိုင်ရာ ဒေသတွေမှာ ကန့်သတ်ချက်တွေ ရှိနေပါတယ်။
ဒါကြောင့်မို့လို့ ပြည်တွင်းကို ဝင်ရောက်လာတဲ့ နိုင်ငံခြားသား ခရီးသွား ဝင်ရောက်လာမှုက ထင်သလောက် အရေအတွက် မရှိသေးဘူးလို့ မြန်မာနိုင်ငံ ခရီးသွားလုပ်ငန်းရှင်များအသင်း ဥက္ကဋ္ဌက ပြောပါတယ်။
"ခရီးသည်အရေအတွက်ကတော့ အားရစရာ မရှိသေးဘူး။ ခရီးသည် ဝင်ရောက်မှုက အလုံးအရင်းနဲ့ ဝင်ရောက်မှု မရှိသေးဘူး။ ဒါကြောင့်မို့လို့ ခရီးသွားလုပ်ငန်းက ထင်သလောက်ကြီး အဆင်မပြေသေးဘူး။ ကျနော်တို့ စိုးရိမ်မိတာ ဒီကြားထဲမှာ တခုခု မဖြစ်ဖို့ပဲ။ အကယ်၍ တခုခု ဖြစ်ပွားခဲ့တယ်ဆိုရင် တိုင်းပြည်ရဲ့ Image က အရမ်းကျသွားနိုင်တယ်။ အဲဒါမျိုး မဖြစ်အောင် ကျနော်တို့ အနေနဲ့ သတိထား ဆောင်ရွက်ဖို့ လိုပါတယ်။”
လက်ရှိမှာတော့ ပြည်ပ ခရီးသွား ဝင်ရောက်မှုအနေနဲ့ ထိုင်းနိုင်ငံက ခရီးသွား လာရောက်မှု အများဆုံးလို့ သိရပါတယ်။ အနောက်နိုင်ငံအနေနဲ့ FIT လို့ ခေါ်တဲ့ Free Individual Traveler အနေနဲ့သာ လာရောက်မှုမျိုး ရှိပြီး ထိုင်းနိုင်ငံကို ရောက်ရှိနေတဲ့ နိုင်ငံခြားသားတချို့က ဗီဇာ အခက်အခဲကြောင့် မြန်မာနိုင်ငံကို Transit သဘောမျိုး ရက်တို လာရောက်တာမျိုးတွေ ရှိတယ်လို့ သိရပါတယ်။
ပြည်တွင်းမှာတော့ အခုနှစ် အောက်တိုဘာလကစကာ ခရီးသွားလုပ်ငန်း ပြန်လည်စတင် လည်ပတ်ခဲ့တာ ဖြစ်ပြီး ကိုဗစ်နဲ့ စစ်တပ် အာဏာသိမ်းမှု ကာလမတိုင်ခင်ကာလ ပွင့်လင်းရာသီ ခရီးသွားလုပ်ငန်း အခြေအနေနဲ့ နှိုင်းယှဉ်ရင်တော့ ရာခိုင်နှုန်း နည်းနေသေးတယ်လို့ ခရီးသွားလုပ်ငန်းရှင်တစ်ဦးက ပြောပါတယ်။
"အရင်ကလိုမျိုး အများကြီးတော့ မဟုတ်ဘူးပေါ့။ ကွာခြားတာပေါ့။ အရင်တုန်းကဆို New Year ခရစ္စမတ်ဆို ခရီးသွားလုပ်ငန်းတွေက ဆွဲတဲ့ ခရီးစဉ်ဆို အနည်းဆုံး ၁၀ ခု ပတ်ဝန်းကျင် ရှိတယ်။ အခုဆိုရင် ခရီးစဉ်တခု၊ နှစ်ခုလောက်ကိုပဲ ဆွဲနေရတာပေါ့။ ခရီးသွားဝန်ဆောင်မှုက ရာခိုင်နှုန်းတော့ နည်းတယ်။ လည်ပတ်နိုင်တဲ့ အခြေအနေလေးပဲပေါ့။ လုပ်ငန်းကြီးကြီးမားမား အောင်မြင်တဲ့အထိတော့ မရှိသေးပါဘူး" လို့ ခရီးသွားလုပ်ငန်းရှင် တစ်ဦးက ပြောပါတယ်။
မြန်မာနိုင်ငံရဲ့ လုံခြုံရေးအခြေအနေက ကြိုတင် မှန်းဆလို့ မရဘဲ နေ့စဉ်နဲ့အမျှ နိုင်ငံရေးပဋိပက္ခ လက်နက်ကိုင် တိုက်ခိုက်မှုတွေက အချိန်မရွေး ဖြစ်ပွားနေပြီး နိုင်ငံခြားသားတွေ သွားလာလေ့ရှိတဲ့ တည်းခိုခန်း၊ ဟိုတယ်၊ ဈေးဝယ်စင်တာနဲ့ စားသောက်ဆိုင်လို နေရာမျိုးတွေမှာ သတိထားသွားလာဖို့ သက်ဆိုင်ရာ သံရုံးတွေက သတိပေး ထုတ်ပြန်လာတာ ဖြစ်ပါတယ်။
မြန်မာနိုင်ငံမှာ ရန်ကုန်မြို့မှလွဲပြီး အခြားဒေသတွေကို မဖြစ်မနေကိစ္စကလွဲပြီး သွားရောက်လည်ပတ်တာတွေ မပြုလုပ်ကြဖို့ ဗြိတိန်နိုင်ငံခြားရေးနဲ့ ဓနသဟာယရုံးက ဒီဇင်ဘာလ ၂ ရက်က အကြံပြုချက်ထုတ်ပြန်လိုက်ပါတယ်။
၂၀၂၁ ခုနှစ် ဖေဖော်ဝါရိလ ၁ ရက်နေ့ အာဏာသိမ်းပြီးနောက်ပိုင်း မြန်မာနိုင်ငံအနှံ့မှာ လက်လုပ်ဗုံးနဲ့ တိုက်ခိုက်မှုတွေအပါအဝင် ပစ်ခတ်တိုက်ခိုက်မှုတွေ ရှိနေတယ်လို့ အဲဒီအကြုံပြုချက်ကဆိုပါတယ်။
ရန်ကုန်မြို့အနှံ့မှာလည်း စစ်ဘက်ဆိုင်ရာနေရာတွေနဲ့ စစ်ဘက်ဆိုင်ရာ လူတွေကို ပစ်မှတ်ထားတိုက်ခိုက်မှုတွေရှိနေတာကြောင့် နိုင်ငံခြားသားတွေ မကြာခဏသွားရောက်တတ်တဲ့ တည်းခိုခန်းနဲ့ ဟိုတယ်လိုနေရာတွေ၊ ဈေးဝယ်စင်တာတွေနဲ့ စားသောက်ဆိုင်တွေမှာလည်း တိုက်ခိုက်မှုတွေ ဖြစ်ပွားနိုင်ချေရှိပြီး အနီးဝန်းကျင်က အရပ်သားတွေကိုလည်း ထိခိုက်မှုတွေ ရှိစေနိုင်တယ်လို့ ဆိုပါတယ်။
မြန်မာနိုင်ငံကို မသွားမီကတည်းက မြန်မာနိုင်ငံဝင်ဖို့ လိုအပ်ချက်တွေနဲ့ တားမြစ်ချက်တွေကို အရင်လေ့လာသင့်တယ်လို့ ဆိုပါတယ်။ အဲဒီအချက်တွေဟာ အချိန်မရွေးပြောင်းလဲနိုင်တာကြောင့် နောက်ဆုံးထုတ်ပြန်ထားတဲ့ အချက်အလက်တွေကို သိရှိနေအောင်လုပ်ဖို့၊ ကိုယ့်ရဲ့ခရီးကို စီစဉ်ပေးတဲ့သူနဲ့ အဆက်အသွယ်မပြတ်စေဖို့ အကြံပြုထားပါတယ်။
ယူကေတိုက်ရိုက်မဟုတ်ဘဲ ကြားခံနိုင်ငံတခုကနေ တဆင့်ပြန်ရမယ်ဆိုရင်လည်း သက်ဆိုင်ရာနိုင်ငံအတွက် ထုတ်ပြန်ထားတဲ့ ခရီးသွားအကြံပြုချက်ကို လေ့လာထားပါလို့ ဆိုပါတယ်။
အခုချိန်မှာ ခရီးသွားအာမခံဟာလည်း ခါတိုင်းထက်ပိုအရေးကြီးတာကြောင့် ခရီးသွားအာမခံမှာ လိုအပ်တဲ့အချက်တွေ ပါမပါစစ်ဆေးဖို့နဲ့ ဗြိတိန်နိုင်ငံခြားရေးနဲ့ ဓနသဟာယရုံးကထုတ်ပြန်ထားတဲ့ နိုင်ငံခြားခရီးသွားအာမခံလမ်းညွှန်ကို ဖတ်ကြည့်ဖို့ တိုက်တွန်းထားပါတယ်။
မြန်မာနိုင်ငံအနှံ့မှာ အရေးပေါ်အခြေအနေကြေညာာထားဆဲဖြစ်ပြီး၊ လုံခြုံရေးအခြေအနေတွေဟာ ကြိုတင်မှန်းဆမရနိုင်အောင် အချိန်မရွေး ပြောင်းလဲနိုင်တယ်လို့ဆိုပါတယ်။ လေကြောင်းတိုက်ခိုက်မှု၊ အဝေးပစ်လက်နက်ကြီးတွေနဲ့ တိုက်ခိုက်မှုတွေ၊ လက်နက်ကိုင်တိုက်ပွဲတွေ ရှိနေသလို မြေမြှုပ်မိုင်းထောင်ထားတာတွေလည်းရှိတယ်လို့ ဆိုပါတယ်။
မြို့တွေမှာ နေ့စဉ်ဘဝကို သာမန်လို ဖြတ်သန်းနေကြပေမဲ့ လက်နက်ကိုင်အဖွဲ့အချို့ကတော့ ပစ်ခတ်တိုက်ခိုက်မှုနဲ့ ဖောက်ခွဲမှုတွေ လုပ်ဖို့ ကြိုးစားနေကြမှာပဲဖြစ်တယ်လို့ ဖော်ပြထားပါတယ်။
ရန်ကုန်မြို့အတွင်းမှာ ရှိနေခဲ့ရင်လည်း အမြဲတမ်းသတိထားဖို့၊ ဒေသခံတွေရဲ့ အကြံပေးချက်ကိုယူဖို့၊ သက်ဆိုင်ရာဒေသအလိုက် တားမြစ်ချက်တွေကို သိအောင်လုပ်ဖို့ အကြံပေးထားပါတယ်။ မာရှယ်လောထုတ်ထားတဲ့ မြို့နယ်တွေကိုလည်း သတိထားပြီးသိအောင်လုပ်ဖို့ တိုက်တွန်းထားပါတယ်။
မြန်မာနိုင်ငံမှာ အချိန်မရွေးအဖမ်းခံရနိုင်တဲ့ အန္တရာယ်ရှိပြီး အဲဒီလိုအဖမ်းခံခဲ့ရရင်လည်း တရားရင်ဆိုင်ရတဲ့ လုပ်ငန်းစဉ်တွေက နိုင်ငံတကာစံချိန်စံညွှန်းထက်နိမ့်ကျတယ်လို့ ဖော်ပြထားပါတယ်။ ဘာမဟုတ်တဲ့ အသေးအဖွဲလေးကအစ ဖမ်းစရာအကြောင်းပြချက်ဖြစ်သွားနိုင်ပြီး မြန်မာနိုင်ငံဟာ နိုင်ငံနှစ်နိုင်ငံမှာ နိုင်ငံသားပြိုင်တူဖြစ်ခွင့်ကို လက်မခံဘူးလို့ဆိုပါတယ်။
မြန်မာနိုင်ငံက အာဏာသိမ်းစစ်ကောင်စီဟာ အလွတ်တမ်းသတင်းထောက်လုပ်ငန်းနဲ့ ပတ်သက်တဲ့ လုပ်ဆောင်မှုအမျိုးမျိုးအပေါ် အလွန်သံသယများပြီး အမှားမခံဘူးလို့ ဖော်ပြထားပါတယ်။
မြန်မာနိုင်ငံရဲ့ ဘဏ်စနစ်အတော်များများဟာလည်း ပြိုလဲနေပြီး ဘဏ်တွေအမြောက်အမြား ပိတ်ထားရသလို အချို့ ATM တွေမှာလည်း ငွေထုတ်လို့မရနိုင်ဘူးလို့ ဆိုပါတယ်။ ကတ်စနစ်နဲ့ ငွေပေးချေမှုတွေ ဆောင်ရွက်နိုင်ပေမယ့် ကိုယ်ပေးချေမယ့်နေရာမှာ ရမရကိုတော့ ကြိုတင်သေချာအောင်မေးထားသင့်တယ်လို့ ဆိုပါတယ်။
ကိုဗစ်ရောဂါပိုးနဲ့ ပါတ်သက်ပြီးတော့လည်း မြန်မာနိုင်ငံအတွင်းဆောင်ရန်ရှောင်ရန် အချက်များနဲ့ အကယ်၍ ကိုဗစ်ကူးစက်ခံရပါက ဆောင်ရွက်ရမယ့် အချက်တွေ၊ လိုက်နာရမည့် အချက်တွေ၊ သိထားရမယ် အချက်များကို ဖော်ပြထားပါတယ်။
အဲဒီအကြံပြုချက်မှာ မြန်မာနိုင်ငံရဲ့ လက်ရှိနိုင်ငံရေးအခြေအနေကို အကြမ်းဖျဉ်းဖော်ပြထားပြီး မြန်မာနိုင်ငံမှာ ကြုံတွေ့ရနိုင်တဲ့ ရာဇဝတ်မှုတွေနဲ့ လိမ်လည်မှုတွေကိုလည်း ဖော်ပြထားပါတယ်။
မြန်မာနိုင်ငံရဲ့ နယ်စပ်ရေးရာအခြေအနေတွေအပါအဝင် နယ်စပ်ဝန်းကျင်ကတိုက်ပွဲတွေအကြောင်း၊ မြေမြှုပ်မိုင်းတွေအကြောင်းနဲ့ မီးရထား၊ ကား၊ လေယာဉ်၊ သင်္ဘောအစရှိတဲ့ မြန်မာနိုင်ငံအတွင်းက သယ်ယူပို့ဆောင်ရေးအကြောင်းတွေကိုပါ ဖော်ပြထားပါတယ်။
အဲဒါတွေအပြင် မြန်မာနိုင်ငံက တယ်လီဖုန်းနဲ့ အင်တာနက်ကွန်ယက်ဆိုင်ရာ ဆက်သွယ်ရေးအခြေအနေ၊ မြန်မာနိုင်ငံက အကြမ်းဖက်မှုတွေအကြောင်း၊ ကျန်းမာရေးဆိုင်ရာနဲ့ သဘာဝဘေးအန္တရာယ်တွေအကြောင်း၊ ငွေကြေးဆိုင်ရာ သတင်းအချက်အလက်တွေနဲ့ ခရီးသွားစဉ်လိုအပ်ပါက မည်ကဲ့သို့ အကူရယူနိုင်မည် ဆိုတဲ့အကြောင်းတွေကို အဲဒီ အကြံပြုချက်မှာ ဖော်ပြထားပါတယ်။
