close

ခါကိဗ်မြို့ခံ

close

May 8, 2022

ယူကရိန်း- ရုရှားစစ်ပွဲ အဆုံးသတ်ရေး ခါကိဗ်မြို့ခံများ မျှော်လင့်

ယူကရိန်းနိုင်ငံ ခါကိဗ်ကမြို့က ပြည်သူတွေဟာ  ရုရှားနဲ့ဖြစ်နေတဲ့ စစ်ပွဲကို အဆုံးသတ်ပြီး ငြိမ်းချမ်းရေးကို မျှော်လင့်နေကြပါတယ်။ 

ရုရှားဘက်က ပစ်လိုက်တဲ့ အမြောက်ဆန်တွေကြောင့် သူတို့ အိမ်တွေ ပျက်စီးပြီး၊  နေ့စဉ်ဘဝမှာ လည်း အခက်အခဲတွေ ရင်ဆိုင်နေရတာကြောင့် ဒီစစ်ပွဲကို မြန်မြန်အဆုံးသတ်စေချင်နေ ကြပါတယ်။  

ရုရှားတပ်ဟာ ယူကရိန်းနိုင်ငံမြောက်ပိုင်းကနေ ပြန်ဆုတ်လာတဲ့ အချိန်ကစလို့ အရှေ့ပိုင်းဒေသကို ပိုပြီး ထိုးစစ်ဆင်နေတာပါ။ 

ခါကိဗ်မြို့ဟာ ယူကရိန်းရဲ့ ဒုတိယအကြီးဆုံးမြို့ဖြစ်ပြီး  စက်မှုထွန်းကားတဲ့ မြို့လည်း ဖြစ်လို့ မဟာဗျူဟာအရ အရေးကြီးတဲ့ ဒီမြို့ကို ရုရှားတပ်တွေက ဖေဖော်ဝါလနှောင်းပိုင်းကတည်းက အဆက်မပြတ် တိုက်ခိုက်နေတာပါ။ 

မြို့ရဲ့မြောက်ပိုင်း ဆင်ခြေဖုံးမှာ အမြောက်ဒဏ်ခံနေရပေမယ့် ပြည်သူတွေဟာ အန္တရာယ်ကြားမှာပဲ ဆက်လက် နေထိုင်နေကြပါတယ်။ 

မြို့ခံ ဘလိုဒီမာက “စစ်ကို မြန်မြန်ရပ်စေချင်တယ်။ နေ့ရောညပါ ဗုံးသံတွေနဲ့ နေနေရတာကို စိတ်ကုန်နေပြီ။ တလအတွင်း ရုရှားက ဖျက်ဆီးလိုက်တာဟာ ဒုတိယ ကမ္ဘာ့စစ်တုန်းက ၄ နှစ်စာ အပျက်အစီးနဲ့ ညီမျှနေပြီ”လို့ ပြောပါတယ်။ 

နောက်မြို့ခံ တယောက်ဖြစ်တဲ့ နစ်ကိုလေးကလည်း “အိမ်က မှန်တံခါးတွေ  အမြောက်ထိလို့  အားလုံး ပျက်စီးကုန်ပြီ။ အသက် ၇၂ နှစ်အထိ ဒီမြို့မှာပဲ နေလာတာ။ တခြားဘယ်ကိုမှလည်း ပြောင်းရွှေ့ အခြေ မချချင်တော့ပါဘူး” လို့ ပြောပါတယ်။ 

ယူကရိန်း တပ်တွေဟာ ရုရှားတပ်တွေကို အကြိမ်ကြိမ် တိုက်ထုတ်နိုင်ခဲ့ပေမယ့် အခုအချိန်အထိ ခါကိဗ်မြို့မှာ နှစ်ဖက်တပ်တွေ တိုက်ပွဲပြင်းထန်နေဆဲ ဖြစ်ပါတယ်။  

59 seconds Ago
Up