စစ်တပ်အာဏာသိမ်းပြီးနောက်ပိုင်း ရန်ကုန်မြို့ အများပြည်သူသုံး YBS ဘတ်စ်ကားတွေပေါ်မှာ ရုံးသွားချိန်နဲ့ ရုံးဆင်းချိန် လူကြပ်ချိန်တွေမှာ အုပ်စုဖွဲ့ပြီး ခါးပိုက်နှိုက်မှုတွေ၊ အိတ်ကို ဓားနဲ့ခွဲမှုတွေ မကြာခဏဖြစ်ပွားနေတယ်လို့ မြို့ခံခရီးသွားပြည်သူတွေကပြောပါတယ်။
မတ်လ ၃၀ ရက်၊ မနက် ၈ နာရီခွဲလောက်က YBS 14 ပေါ်မှာ အိတ်ခွဲခံလိုက်ရပေမဲ့ ပစ္စည်းတော့ ပါမသွားဘူးလို့ ကိုယ်တွေ့ကြုံရတဲ့ခရီးသည်တဦးကပြောပါတယ်။
“ကျောက်ကုန်းမီးပွိုင့်ကနေ ခပ်ဝဝအမျိုးသားနှစ်ဦး တက်လာတာဖြစ်ပြီး တယောက်က ဘေးကနေပြီး လှုပ်မရအောင် တိုးထားတာပါ။ နောက်တယောက်က အနောက်ကနေ အိတ်ကိုခွဲသွားတာမျိုးလုပ်တာလို့ သိရပါတယ်။ အိတ်ကိုနှိုက်သလို ခံစားနေရလို့ အတင်း ရှေ့ကိုဆွဲထားလိုက်လို့ ပါမသွားတာပါ။ ကျနော့်ဆီကလည်း မရရော အနောက်ဘက်ကို ချက်ချင်းရောက်သွားတာ။ အဲ့အချိန်ထိ အိတ်ကို အခွဲခံထားရမှန်း မသိခဲ့ဘူး။ ဘေးနားကအစ်ကိုက သတိထား၊ အိတ်ကို ရှေ့လွယ်ထားလို့ သတိပေးခဲ့တာကြောင့် ရှိသမျှပစ္စည်းတွေ အကုန်ပါမသွားခဲ့တာ။”
ကိုယ်တိုင်ကြုံခဲ့ရတဲ့ ခရီးသွားအမျိုးသမီးကလည်း “ခရေပင်လမ်းခွဲကနေ YBS 66 နဲ့ အိမ်ကိုအပြန် ကန်သာယာမှာ လူတွေတော်တော်များများ တက်လာကြပြီး ကျမဘေးနားကို ကောင်လေးက သူ့ထီးနဲ့ အတင်းတွေကွယ်နေတော့ သတိထားမိလိုက်တယ်။ အသက်၂ဝ ဝန်းကျင်အရွယ်ပဲ၊ ကျမအိတ်ကို ဓားနဲ့ခွဲနေတာ သိနေပေမဲ့ ဓားက ကျမဗိုက်ဘေးနားမှာဆိုတော့ မအော်ရဲဘူး” လို့ ပြောပါတယ်။
မတ်လ ၁၉ ရက် ညနေ ၃နာရီလောက်ကလည်း YBS ယာဉ်မောင်းတဦးက လှိုင်သာယာမှ တောင်ဒဂုံပြန်အဆင်း အင်းစိန် BPI မှတ်တိုင်အရောက်မှာ ခရီးသည်က ဖုန်းအနှိုက်ခံရလို့ ဖုန်းမရှိတော့ဘူး ပြောဆိုတာကြောင့် ကားသမားက ခရီးသည်တွေကို မှတ်တိုင်မှာ ဆင်းခွင့်မပြုဘဲ စစ်တပ်ဂိတ်တခုကို အပ်ခဲ့တယ်လို့လည်း သိရပါတယ်။
YBS ယာဉ်မောင်တဦးက“BPI မှတ်တိုင်ရောက်တော့ အမျိုးသား ၂ ဦးက တံခါးဖွင့်ဖို့ပြောတယ်။ ကျနော်က ခရီးသည်တယောက် ဖုန်းပျောက်သွားလို့ ဘယ်သူမှမဆင်းရဘူး ပြောပြီး ဖုန်းခေါ်လိုက်တာ သူတို့ဆီကနေ အသံမြည်လာတာ။ သူတို့ ၂ ယောက်က ပြေးဖို့ကြည့်နေတာ။ ၁ ယောက်ကလည်း ဓားထုတ်ပြီး တယောက်မှ အနားမကပ်နဲ့ဆိုပြီး ပြောတာ။ ကျနော့်ကားထဲမှာက ဝါးရင်းတုတ်ထားထားတော့ ဓားကိုင်ထားတဲ့လက်ကို တုတ်နဲ့ရိုက်ချပြီး ဝင်လုံးလိုက်တယ်။ ခရီးသည်တွေက ကူလုံးပေးတယ်။ ခရီးသည်ပေးတဲ့ ခါးပတ်နဲ့ သူတို့ကို လက်ပြန်ကြိုးတုပ်ပြီး ခရီးသည်တွေကို ရှေ့ကပေးတက်၊ ရှေ့ကပေးဆင်းတာမျိုး လုပ်ပြီး သမိုင်းလမ်းဆုံ မီးပွိုင့်ထိပ်က စစ်တပ်ဂိတ်ကို အပ်ခဲ့လိုက်တယ်” လို့ ပြောပါတယ်။
ယာဉ်မောင်းတွေအနေနဲ့လည်း ခါးပိုက်နှိုက်ကို ဖမ်းပေးရတာ အန္တရာယ်များပြီး အဖွဲ့တွေနဲ့ ဆိုတော့ လူမှတ်ထားတာမျိုး၊ ကားနံပါတ်မှတ်ထားပြီး အန္တရာယ်အပြုခံရတာမျိုးတွေ ကြုံရနိုင်တာကြောင့် ယာဉ်မောင်းတွေက ဖမ်းပေးကြတာမျိုး မလုပ်ဘူးလို့လည်း သိရပါတယ်။ YBS စီးတဲ့အခါမှာ အတတ်နိုင်ဆုံး ကိုယ့်ပစ္စည်းကို ဂရုစိုက်ကြပါလို့လည်း YBS ယာဉ်မောင်းက ပြောပါတယ်။
စစ်တပ်အာဏာသိမ်းပြီးနောက်ပိုင်း YBS ကို အားကိုးနေရတဲ့ ရန်ကုန်မြို့က ပြည်သူလူထုဟာ အုပ်စုဖွဲ့ ခါးပိုက်နှိုက်ခံရမှုတွေ၊ အနုကြမ်းစီးခံရမှုတွေ ပိုမိုကြုံတွေ့နေရတာ ဖြစ်ပါတယ်။
အခုလို အုပ်စုဖွဲ့ ခါးပိုက်နှိုက်၊ လုယက်တိုက်ခိုက်မှုတွေကြောင့် ပြည်သူလူထုအနေနဲ့ လုံခြုံမှုမရှိတဲ့အပြင် ကျူးလွန်သူတွေကို စစ်ကောင်စီလက်အောက်ခံ ရဲတပ်ဖွဲ့ဝင်တွေကလည်း ထိရောက်တဲ့ အရေးယူမှုတွေ လုပ်ဆောင်နိုင်ခြင်း မရှိသေးပါဘူး။
ရန်ကုန်မြို့က YBS ယာဉ်တွေပေါ်မှာ ခါးပိုက်နှိုက်မှုတွေ ကျူးလွန်နေတဲ့ အဖွဲ့တဖွဲ့ကို ၂၀၂၂ ခုနှစ်၊ ဒီဇင်ဘာ ၅ ရက် မနက် ၈ နာရီခွဲလောက်က ဖမ်းဆီးရမိခဲ့တယ်လို့ စစ်ကောင်စီက ဒီဇင်ဘာ ၆ ရက်မှာ သတင်းထုတ်ပြန်ပါတယ်။
ခါးပိုက်နှိုက် ၆ ယောက်ပါအဖွဲ့ကို ဒီဇင်ဘာ ၅ ရက် မနက်ပိုင်းက မင်္ဂလာဒုံမြို့နယ်၊ ပြည်လမ်းမပေါ်ရှိ ခရေပင်လမ်းခွဲမီးပွိုင့်မှာ ယာဉ်အမှတ် YGN 3H-4879 တိုယိုတာ ပရိုဘောက် အဖြူရောင်တက္ကစီ အပါအဝင် ရွှေလက်စွပ် ၁ ကွင်း၊ ဖုန်း ၈ လုံး၊ ကျပ်ငွေ ၈၀,၀၀၀ တို့နဲ့အတူ ဖမ်းဆီးရမိခဲ့တာဖြစ်တယ်လို့ စစ်ကောင်စီဘက်က သတင်းထုတ်ပြန်ခဲ့တာပါ။
ဒါပေမဲ့လည်း လက်တွေ့မှာတော့ လုယက်ခံရသူတွေ ရဲစခန်းသွားတိုင်ရင် အမှုမဖွင့်ပေးတာတွေ၊ လုယက်သူတွေကို စစ်ကောင်စီလက်အောက်ခံ ရဲစခန်းတွေက အရေးမယူဘဲ ပြန်လွှတ်ပေးနေတာတွေ ကြုံတွေ့နေရတယ်လို့ ရန်ကုန်မြို့က ဒေသခံတချို့က ပြောပါတယ်။
ဖုန်းလုယက်ခံရသူတဦးက “နိုဝင်ဘာလကုန်ခါနီးလောက်က သုနန္ဒာလမ်းဆုံမှာ ညနေ ၄ နာရီလောက်ပဲ ညီမကောင်လေး ဖုန်းအလုခံလိုက်ရတယ်။ အဲ့ညနေပဲ ခေမာသီလမ်းက ရဲစခန်းသွားတိုင်တာ သူတို့က ဖုန်း IMEI code ပြောခိုင်းတယ်။ ဆိုင်ဘောက်ချာတောင်းတယ်။ မရှိတော့ဘူးလို့ ပြောတော့ တိုင်သူနာမည်ပဲ မေးတယ်၊ အမှုတော့ မဖွင့်ပေးဘူး။ အခုထိလည်း မိလား၊ မမိလား အကြောင်းမပြန်ဘူး” လို့ ပြောပါတယ်။
စစ်ကောင်စီ ဖမ်းဆီးရမိသူတွေက YBS ယာဉ်တွေပေါ်မှာ ခါးပိုက်နှိုက်ပြီးပါက အဆိုပါတက္ကစီနဲ့ ထွက်ပြေးတိမ်းရှောင်ကြတယ်လို့ သိရပြီး လှိုင်သာယာအရှေ့ပိုင်းမြို့နယ်၊ လှိုင်သာယာအနောက်ပိုင်းမြို့နယ်နဲ့ ရွှေပြည်သာမြို့နယ်မှာ နေထိုင်ကြသူတွေလို့ ထုတ်ပြန်ချက်မှာ တွေ့ရပါတယ်။
ရန်ကုန်မြို့က ရှေ့နေတဦးက “သူတို့ဘာသာ သူတို့ နာမည်ရချင်လို့ ဟန်ဆောင်ဖမ်းပြီး သူတို့လူတွေနဲ့ပဲ တည်ကျက်လုပ်တယ်ဆိုရင်တော့ မပြောတတ်ဘူးပေါ့ဗျာ။ လူအစားထည့်ပြီးတော့ ဇာတ်လမ်းတခုထွင်သလို လုပ်ရင်တော့ မပြောတတ်ဘူးပေါ့။ တကယ့်လူတွေ ထိထိမိမိ ဖမ်းတယ်ဆိုရင် အနည်းဆုံးတော့ ထောင်ဒဏ် ၃ နှစ်ချရမှာ” လို့ ပြောပါတယ်။
စစ်အာဏာသိမ်းပြီးနောက်ပိုင်း ၂၀၂၂ ခုနှစ်အတွင်း ခိုးဆိုးလုနှိုက်မှုတွေ ရန်ကုန်မှာ သိသိသာသာ ပေါများလာတာကို တွေ့ရပြီး လုယက်သူတွေကို ဒေသခံတွေက ဝိုင်းဝန်းဖမ်းဆီး ရဲစခန်းအပ်ပေမဲ့ သက်ဆိုင်ရာ နယ်မြေရဲစခန်းတွေရဲ့ အရေးယူမှုတွေ ထိထိရောက်ရောက် မလုပ်နိုင်သေးဘူးလို့ သိရပါတယ်။
ရန်ကုန်မြို့ရှိ ရဲစခန်းတခုနဲ့ နီးစပ်သူတဦးက “စခန်းက လုံးဝ မဖမ်းတာတော့ မဟုတ်ပါဘူး။ ဖမ်းတယ်၊ ပြီးရင် နည်းနည်းပါးပါးဆုံးမပြီး ပြန်လွှတ်လိုက်တာ။ တရားရုံးလည်း အသစ်ဆောက်တုန်းလေ။ အမှုကြီးသမားတွေပဲ အထဲမှာထားတာ။ အမှုပေါ်လို့ ဖုန်းဆက်ခေါ်ရင်တောင် အပိုင်နယ်ထိန်းနဲ့ တာဝန်ကျတဲ့သူ ၅ ယောက်တစု လက်နက်နဲ့သွားဖို့ ညွှန်ကြားထားတာ” လို့ နိုဝင်ဘာလထဲမှာ ပြောထားပါတယ်။
ပြီးခဲ့တဲ့ နိုဝင်ဘာလအတွင်းကလည်း ခါးပိုက်နှိုက်လုယက်သူတွေကို ဖမ်းမိတယ်လို့ စစ်ကောင်စီဘက်က သတင်းတွေ ထုတ်ပြန်ခဲ့ပေမဲ့ လက်ရှိအချိန်အထိ ရန်ကုန်မြို့က YBS ခရီးသည်တွေနဲ့ မြို့နေ ပြည်သူတွေကတော့ ခိုးဆိုးလုနှိုက်မှု အန္တရာယ်တွေ ကြုံနေရသေးတယ်လို့ သိရပါတယ်။
