မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) စစ်ကြောင်း-၃၊ ချင်းတွင်းဒေသတပ်ရင်းမှာ တပ်တွင်းရိက္ခာဖူလုံရေးအတွက် အခုနှစ်နွေရာသီမှာ နွေစပါး ၂ ဧက စတင်စိုက်ပျိုးပါတယ်။

စိုက်ပျိုးထားတဲ့စပါးမှာ ရက် ၉၀ စပါးဖြစ်ပြီး ကုန်ကျစရိတ်အနေနဲ့ ၁ ဧက ၅ သိန်းဝန်းကျင် ရှိပါတယ်။ ပြည်သူတွေရဲ့ လှူဒါန်းကူညီမှုတွေအပြင် မိမိတို့တပ်ရင်း တပ်ဖွဲ့တွေရဲ့ လုပ်အားစိုက်ထုတ်မှုတွေနဲ့ တပ်ရိက္ခာဖူလုံရေးအတွက် စီစဥ်ဆောင်ရွက်ထားပါတယ်လို့ ABSDF (ချင်းတွင်းဒေသ) တာဝန်ရှိသူထံက သိရပါတယ်။

ABSDF စစ်ကြောင်း-၃ (ချင်းတွင်းဒေသ) တပ်ရင်းမှူး ရဲဘော်ဇေယျက “လက်ရှိအခြေအနေအရ တပ်တွင်းရိက္ခာက အဆင်ပြေတယ်။ ပြည်သူလူထုရဲ့ ထောက်ပံ့မှုတွေနဲ့ ရပ်တည်တာဖြစ်ပေမဲ့ အချိန်ကြာလာတာနဲ့အမျှ ပြည်သူတွေက ငွေကြေးဖောင်းပွတာတွေ၊ ကုန်စျေးနှုန်းကြီးမြင့်တာတွေ ကြုံလာနိုင်တယ်။ အဲ့ဒီအခက်ခဲကြုံလာရင် ပြည်သူတွေ ဝန်ထုပ်ဝန်ပိုးမဖြစ်အောင် တတ်နိုင်တဲ့ အတိုင်းအတာထဲကနေ ဆောင်ရွက်တာဖြစ်ပါတယ်” လို့ ဒီဗွီဘီကို ပြောပါတယ်။

ABSDF စစ်ကြောင်း-၃ အတွင်းရှိ တပ်ရင်းများက တခြားရိက္ခာတွေဖြစ်တဲ့ မြေပဲ၊ နေကြာနဲ့ သီးနှံမျိုးစုံကို စိုက်ပျိုးပြီး တပ်တွင်းရိက္ခာဖူလုံရေးအတွက် ဆောင်ရွက်နေတယ်လို့လည်း သိရပါတယ်။

အခု ဇွန်လနောက်ဆုံးပတ်ထဲမှာ မြစ်ရေတွေဟာ လက်ရှိရေမှတ်တွေထက် ၅ ပေလောက်အထိ မြင့်တက်လာနိုင်ပြီး ဧရာဝတီမြစ်ရေဟာ မနေ့ညနေက ရွှေကူမြို့ရဲ့ စိုးရိမ်ရေမှတ်အထက်ကို ရောက်ခဲ့တယ်လို့  မိုးဇလဌာနက  ထုတ်ပြန်ပါတယ်။

ဒီ ၁၀ ရက်အတွင်းမှာ ဧရာဝတီမြစ်ရေဟာ မြစ်ကြီးနားမြို့၊ ဗန်းမော်မြို့၊ ရွှေကူနဲ့ ကသာမြို့တို့မှာ ၁ ပေကနေ ၃ ပေလောက်၊ သပိတ်ကျင်းမြို့၊ မန္တလေးမြို့၊ စစ်ကိုင်းမြို့၊ မြင်းမူမြို့၊ ပခုက္ကူမြို့၊ ညောင်ဦးမြို့၊ ချောက်မြို့၊ မင်းဘူးမြို့၊ မကွေးမြို့၊ အောင်လံမြို့၊ ပြည်မြို့၊ ဆိပ်သာမြို့၊ ဟင်္သာတမြို့နဲ့ ဇလွန်မြို့တို့မှာ ၂ ပေကနေ ၄ ပေလောက်အထိ လက်ရှိရေမှတ်တွေရဲ့အထက်ကို မြင့်တက်လာနိုင်တယ်လို့ ခန့်မှန်းထားပါတယ်။

ချင်းတွင်းမြစ်ရေကတော့ ခန္တီးမြို့၊ ဟုမ္မလင်းမြို့၊ ဖောင်းပြင်မြို့၊ မော်လိုက်မြို့၊ ကလေးဝမြို့၊ မင်းကင်းမြို့၊ ကနီမြို့နဲ့ မုံရွာမြို့တို့မှာ ၂ ပေကနေ ၅ ပေလောက်အထိ အခုရောက်နေတဲ့ ရေမှတ်တွေရဲ့အထက်ကို တက်လာနိုင်တယ်လို့ ဆိုပါတယ်။

ပြီးတော့ မြစ်သာမြစ်ရေဟာ ကလေးမြို့မှာ ၁ ပေလောက်၊ ဒုဋ္ဌဝတီမြစ်ရေဟာ သီပေါမြို့၊ ရွှေစာရံနဲ့ မြစ်ငယ်မြို့တို့မှာ ပေထက်ကနေ ၃ ပေလောက်၊ စစ်တောင်းမြစ်ရေဟာ တောင်ငူမြို့နဲ့ မဒေါက်မြို့တို့မှာ ၁ ပေကနေ ၃ ပေလောက်၊ ရွှေကျင်မြစ်ရေဟာ ရွှေကျင်မြို့မှာ ၂ ပေလောက်၊ ပဲခူးမြစ်ရေဟာ ဇောင်းတူမြို့နဲ့ ပဲခူးမြို့တို့မှာ ၁ ပေကနေ ၃ ပေလောက်အထိ၊ သံလွင်မြစ်ရေဟာ ဖားဆောင်းမြို့နဲ့ ဘားအံမြို့တို့မှာ ၁ ပေကနေ ၃ ပေလောက်အထိ၊ သောင်ရင်းမြစ်ရေဟာ မြဝတီမြို့မှာ ၁ ပေခွဲလောက်၊ ငဝန်မြစ်ရေဟာ ငါးသိုင်းချောင်းမြို့၊ သာပေါင်းမြို့နဲ့ ပုသိမ်မြို့တို့မှာ ၁ ပေကနေ ၃ ပေလောက်၊ တိုးမြစ်ရေဟာ မအူပင်မြို့မှာ ၂ ပေလောက်၊ ကုလားတန်မြစ်ရေဟာ ပလက်ဝမြို့နဲ့ ကျောက်တော်မြို့တို့မှာ ၂ ပေကနေ ၅ ပေလောက်၊ လေးမြို့မြစ်ရေဟာ မြောက်ဦးမြို့မှာ ၁ ပေလောက်၊ ဘီးလင်းမြစ်ရေဟာ ဘီးလင်းမြို့မှာ ၂ ပေလောက်အထိ လက်ရှိရေမှတ်တွေအထက်ကို မြင့်တက်နိုင်တယ်လို့ ခန့်မှန်းထားပါတယ်။

ဧရာဝတီမြစ်ရေဟာ ဇွန် ၂၁ ရက် ညနေ ၆ နာရီခွဲအချိန်က ရွှေကူမြို့ရဲ့ စိုးရိမ်ရေမှတ်အထက် ၂ လက်မအထိကျော်လွန်ခဲ့ပြီး ဒီနေ့ ဇွန် ၂၂ ရက်နေ့ မနက်ပိုင်းမှာတော့ စိုးရိမ်ရေမှတ်အောက်ကို ပြန်ရောက်သွားပြီလို့လည်း ထုတ်ပြန်ထားပါတယ်။