နွေဦးတော်လှန်ရေးမှာ ရှေ့တန်းကနေ တိုက်ခိုက်ပါဝင်နေကြတဲ့ ချင်းပြည်ကာကွယ်ရေးတပ်-ကန်ပက်လက် CDF.Kanpetlet ကို ချင်းတိုင်းရင်းသား ပြည်သူတွေက ငွေကြေးတချို့နဲ့ ရိုးရာနွားနောက်ကောင်ရေ ၆၀ ကျော် လှူဒါန်း ခဲ့တယ်လို့ ထုတ်ပြန်ပါတယ်။

ကန်ပက်လက် CDF တပ်ဖွဲ့ အနေနဲ့ ကြုံတွေ့နေရတဲ့ ဘဏ္ဍာရေးအခက်အခဲတွေ ဖြေရှင်းနိုင်ရေးအတွက် ကန်ပက်လက်မြို့နယ်ပြည်သူ့အုပ်ချုပ်ရေးအဖွဲ့ကနေ မြို့နယ်တွေထဲက ကျေးရွာတွေဆီ ကွင်းဆင်းပြီး တော့ စိန်ခေါ်မှု အခက်ခဲတွေကို ရှင်းလင်းတာတွေကို ပြုလုပ်နေကြတာဖြစ်ပြီး ပြည်သူတွေက တော်လှန်ရေးတပ်ဖွဲ့တွေ ရှေ့ဆက်နိုင်ဖို့ တဘက်တလမ်းကနေ ထောက်ပံ့နေကြတာ ဖြစ်ပါတယ်။

မြန်မာနိုင်ငံမှာတော့ အကြမ်းဖက်စစ်အုပ်စုက မတရားအာဏာသိမ်းယူထားခဲ့တဲ့ ကာလဟာ ၂ နှစ်ကျော် ကြာမြင့်လာခဲ့ပြီဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ လူမှုရေး၊ ကျန်းမာရေး၊ ပညာရေး စတဲ့ ကဏ္ဍတွေအသီးသီးမှာ အဘက်ဘက်က ကျဆင်းလာနေခဲ့ပြီး လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ် နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာ ဖြစ်ပါတယ်။

နွေဦးတော်လှန်ရေး အရှိန်မြှင့်လာတာနဲ့အမျှ ရှေ့တန်းကနေ ရရာလက်နက်ကို စွဲကိုင်တော်လှန်နေကြတဲ့ တော်လှန်ရေးတပ်ဖွဲ့တွေမှာ လက်နက်အင်အား၊ ရိက္ခာတွေအပါအဝင် အဘက်ဘက်ကနေ လိုအပ်ချက်တွေ ပိုမိုများပြားလာနေတာဖြစ်ပါတယ်။

ပြီးခဲ့တဲ့ ရက်ပိုင်းကလည်း တိုက်ပွဲတွေ ပြင်းထန်နေရာ မြန်မာနိုင်ငံအလယ်ပိုင်း စစ်ကိုင်းတိုင်းထဲက ကျေးရွာတွေမှာလည်း တော်လှန်ရေးအောင်မြင်ဖို့ လူထုက လက်ဝတ်လက် စား ချွေးနည်းစာ၊ ငွေကြေးစတဲ့ တတ်အားသမျှ ဝိုင်းဝန်းပံ့ပိုးကူညီနေကြတာကို တွေ့ရပါတယ်။

လတ်တလောမှာတော့ ကန်ပက်လက် CDF တပ်ဖွဲ့က အရေးတော်ပုံအောင်နိုင်ရေးအတွက် ကန်ပက်လက်မြို့နယ်ပြည်သူ့အုပ်ချုပ်ရေး၊ကာကွယ်ရေးနဲ့ ပြည်သူလူထုတရပ်လုံး  ညီညီညွတ်ညွတ်နဲ့ စိတ်အားထက် သန်စွာ ပူးပေါင်းပါဝင်မှုအပေါ်  ကျေးဇူးတင်ရှိ‌ကြောင်းနဲ့ အရေးတော်ပုံအောင်မြင်သည်အထိ တွဲလက်မဖြုတ်တမ်း အတူတကွ ဆက်လက်ပူးပေါင်း ပါဝင်ပေးကြဖို့လည်း ဖိတ်ခေါ်ထားပါတယ်။

ချင်းပြည်သူတွေရဲ့ အသက်အိုးအိမ်တွေကို  မင်းအောင်လှိုင်ခေါင်းဆောင်တဲ့ အကြမ်းဖက်လက်နက်ကိုင်တပ်တွေက ဖျက်ဆီးနေတဲ့အပေါ်  ချက်ချင်း ရပ်တန့်စေဖို့နဲ့  ဟန့်တားပိတ်ဆို့ ဆောင်ရွက်ပေးဖို့ အမေရိကန်သမ္မတ ဂျိုဘိုင်ဒင်ကို အမေရိကန်အခြေစိုက် ချင်းနှစ်ခြင်း အသင်းတော်များအဖွဲ့ချုပ်ရဲ့ ငြိမ်းချမ်းရေးနှင့် တရားမျှတရေး ကော်မတီက တိုက်တွန်း တောင်းဆိုလိုက်ပါတယ်။  

ချင်းပြည်နယ်၊ မင်းတပ်မြို့၊ ဖလမ်းမြို့၊ ထန်တလန်မြို့ စတဲ့ မြို့တွေကို စစ်ကောင်စီတပ်တွေက  ပစ်မှတ်ထား ထိုးစစ်ဆင်နေတာ တနှစ်ကျော်လာပြီး အခုလက်ရှိမှာလည်း ထန်တလန်မြို့နယ်မှာ ထိုးစစ်အရှိန်မြှင့်နေတာနဲ့ ပတ်သက်ပြီး ငြိမ်းချမ်းရေးနှင့် တရားမျှတရေး ကော်မတီက သြဂုတ် ၂၅ ရက်နေ့စွဲနဲ့ ထုတ်ပြန်တောင်းဆိုလိုက်တာပါ။

စစ်ကောင်စီတပ်တွေက ထန်တလန်မြို့နဲ့ ဟားခါးမြို့ကြားရှိ သီမြစ်မှာ တပ်ဖြန့်နေကာ လက်နက်ကြီး၊ လက်နက်ငယ်တွေနဲ့ ထိုးစစ်ဆင်တိုက်ခိုက်နေတာ တလလောက် ရှိနေပြီး ကြမ်းကြုတ်ရက်စက်တဲ့ ထိုးစစ်ဆင်မှုကို ချက်ချင်းရပ်တန့်ဖို့နဲ့ ဒီလုပ်ရပ်က စက်ဆုတ်ရွှံရှာဖွယ် ဖြစ်တာကြောင့် အပြင်းထန်ဆုံး ရှုတ်ချကန့်ကွက်တယ်လို့ ငြိမ်းချမ်းရေးနှင့် တရားမျှတရေး ကော်မတီက ဆိုပါတယ်။

မင်းအောင်လှိုင်ခေါင်းဆောင်တဲ့ အကြမ်းဖက် လက်နက်ကိုင်တပ်ရဲ့ လုပ်ရပ်တွေဟာ လူ့အခွင့်အရေးကိုချိုးဖောက်တာ၊ စစ်ရာဇ၀တ်မှုကျူးလွန်တာ၊ လူသားမျိုးနွယ်အပေါ် ရာဇ၀တ်မှု ကျူးလွန်တာနဲ့  လူမျိုးတုံးသတ်ဖြတ်မှုကို ကျူးလွန်နေတာ သက်သေဖြစ်ပြီး ဒီလုပ်ရပ်တွေကို နိုင်ငံတကာဥပဒေနဲ့အညီ နိုင်ငံတကာရာဇ၀တ်တရားရုံးမှာ အရေးယူဆောင်ရွက်ပေးဖို့ ကုလသမဂ္ဂ လုံခြုံရေးကောင်စီနဲ့ မြန်မာနိုင်ငံတော် အမျိုးသားညီညွတ်ရေေအစိုးရ (NUG) တို့ကိုလည်း  ငြိမ်းချမ်းရေးနှင့် တရားမျှတရေး ကော်မတီက တိုက်တွန်းထားပါတယ်။ 

၂၀၂၁ ခုနှစ် ဖေဖော်ဝါရီ ၁ ရက်နေ့မှာ နိုင်ငံတော်အာဏာအား စစ်တပ်က ဖွဲ့စည်းပုံ အခြေခံဥပဒေကို ချိုးဖောက်ပြီး တရားမဝင် သိမ်းယူခဲ့တာနဲ့ ပတ်သက်ပြီး ဆန့်ကျင်ကန့်ကွက်တဲ့အနေနဲ့ ပထမဆုံး လက်နက်ကိုင်တော်လှန်ခဲ့တဲ့ အထဲမှာ ချင်းပြည်နယ်က ထိပ်ဆုံးက ပါဝင်ခဲ့ပါတယ်။ 

မင်းအောင်လှိုင်ခေါင်းဆောင်တဲ့ စစ်ကောင်စီတပ်တွေဟာ ၂၀၂၁ ခုနှစ် စက်တင်ဘာလကနေ မေ ၂၃ ရက်နေ့အထိ ထန်တလန်မြို့က ပြည်သူတွေရဲ့ နေအိမ်တွေကို ၂၈ ကြိမ်လောက် မီးရှို့ဖျက်ဆီးခဲ့ကြလို့ ဘုရားကျောင်း ၈ ကျောင်းအပါအဝင် လူနေအိမ်ခြေ ၁၀၀၀ ကျော် မီးလောင်ပြာကျခဲ့ရသလို ပြီးခဲ့တဲ့ လပိုင်းတွေမှာလည်း  အကြမ်းဖက်မီးရှို့တာတွေ အကြိမ်ကြိမ် ထပ်မံလုပ်ဆောင်ခဲ့ပါတယ်။

Photo Credit-ChinYouths4Reform