ပြည်သူ့ခုခံတော်လှန်စစ်ပွဲကာလအတွင်း မြေပြင်တိုက်ပွဲတွေ ပြင်းထန်နေတဲ့ ချင်းပြည်နယ်မှာ လက်နက်ကိုင်တော်လှန်ရေးအတွက် ချင်းအမျိုးသားကာကွယ်ရေးတပ် Chin National Defense Force (CNDF) က ဖွင့်လှစ်မယ့် ကွန်မန်ဒိုစစ်သင်တန်းအတွက် သင်တန်းသားတွေ ခေါ်ယူနေပါတယ်။

ချင်းအမျိုးသားကာကွယ်ရေး၊ ချင်းပြည်တည်ထောင်ရေးနဲ့ ဖက်ဒရယ် ပြည်ထောင်စု တည်ဆောက်ရေးတို့အတွက် CNDF က အလိုရှိနေကြောင်းနဲ့ သင်တန်းကို လာမယ့် ဖေဖော်ဝါရီလ ပထမပတ်မှာ စတင်ဖွင့်လှစ် သွားမယ်လို့ ဆိုပါတယ်။

တက်ရောက်လိုသူတွေအနေနဲ့ အသက်အပိုင်းအခြားကို ၁၆ နှစ်ကနေ ၃၅ နှစ်အရွယ်ထိ သတ်မှတ်ထားပြီး ခန္ဓာကိုယ်ကြံ့ခိုင်သူ၊ မျက်လုံးကောင်းမွန်သူ၊ နာတာရှည်ရောဂါမရှိသူ၊ ခြေလက်အင်္ဂါ ကြီးကြီးမားမား ထိ ခိုက်ထားတာမျိုး မရှိသူဖြစ်ရမယ်လို့ ဆိုပါတယ်။ ဒါ့အပြင် သင်တန်းပြီးမြောက်ပါက CNDF မှာ အချိန် ၁ နှစ်တိတိ တာဝန်ထမ်းဆောင်နိုင်ရမှာဖြစ်ကာ နေရာဒေသမရွေး တာဝန်ထမ်းဆောင်နိုင်သူ ဖြစ်ရမယ်လို့ ဆိုပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူလူထုတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာဖြစ်ပါတယ်။ 

နိုင်ငံတဝန်းမှာတော့ ဒေသခံပြည်သူ့ကာကွယ်ရေးတပ်တွေ၊ တိုင်းရင်းသားလက်နက်ကိုင်တပ်တွေနဲ့ အကြမ်းဖက်စစ်ကောင်စီတပ်တွေကြား တိုက်ပွဲတွေလည်း တိုင်းဒေသကြီးနဲ့ ပြည်နယ်တွေ အနှံ့အပြား ဖြစ်ပွားနေပါတယ်။

စစ်ကောင်စီရဲ့ ရွေးကောက်ပွဲ အထမြောက်အောင်ကူညီမယ့် ဘယ်လိုပုဂ္ဂိုလ်မျိုးကိုမဆို ပြင်းပြင်းထန်ထန် အရေးယူမယ်လို့ ချင်းအမျိုးသားကာကွယ်ရေးတပ်ဖွဲ့ (CNDF) ရဲ့ ဒုတိယအကြိမ် ညီလာခံကနေ ထုတ်ပြန်လိုက်ပါတယ်။

ညီလာခံကို စစ်ဌာနချုပ်ရုံးမှာ ဇန်နဝါရီ ၆ ရက်မှ ၉ ရက်အထိ ကျင်းပခဲ့တာဖြစ်ပြီး CNO Defense Council, War Office နဲ့ တပ်မဟာ ၄ ခုက ညီလာခံကိုယ်စားလှယ် အယောက် ၆၀၊ စောင့်ကြည့်လေ့လာသူ အယောက် ၃၀ လောက် တက်ရောက်ခဲ့ကြတယ်လို့ ချင်းအမျိုးသားကာကွယ်ရေးတပ်ဖွဲ့က ပြောပါတယ်။

အကြမ်းဖက်စစ်ကောင်စီရဲ့ ရွေးကောက်ပွဲကို ချင်းပြည်နယ်၊ ဖလမ်းမြို့နယ်နဲ့ အထက်ချင်းတွင်းဒေသအတွင်း မလုပ်ဖို့အတွက် CNO/CNDF က လုံးဝတားမြစ်တဲ့ အကြောင်းနဲ့ တားမြစ်နေတဲ့ကြားက အဲဒီရွေးကောက်ပွဲကို အထမြောက်အောင် ကူညီမယ့် ဘယ်လိုပုဂ္ဂိုလ်မျိုးမဆို CNO/CNDF က ပြင်းပြင်းထန်ထန် အရေးယူသွားမယ်လို့လည်း ညီလာခံထုတ်ပြန်ချက်မှာ ရေးသားဖော်ပြထားပါတယ်။

ပြီးတော့ ချင်းအမျိုးသားကာကွယ်ရေးတပ်ဖွဲ့ရဲ့ ဌာနအသီးသီးနဲ့ တပ်မဟာ၊ တပ်ရင်းအလိုက် ၁ နှစ်တာ လုပ်ငန်းဆောင်ရွက်ချက်တွေရဲ့ လှုပ်ရှားမှုတွေကို အစီရင်ခံတာ၊ ဘဏ္ဍာရေး အစီရင်ခံစာ တင်သွင်းတာ၊ ၁ နှစ်တာ လုပ်ငန်းဆောင်ရွက်တာတွေအပေါ် ပြန်လည်သုံးသပ်တာနဲ့ ရှေ့ဆက်ရမယ့် လုပ်ငန်းစဉ်တွေကို ဆွေးနွေးခဲ့ကြတယ်လို့ သိရပါတယ်။

တပ်မဟာ ၄ ခုနဲ့ စစ်ဌာနချုပ်ရုံးရဲ့ တာဝန်ခွဲဝေယူတာတွေ၊ နယ်မြေသတ်မှတ်တာ၊ ငွေကြေးစီမံမှုဆိုင်ရာ ပေါ်လစီတွေ၊ နေ့ထူးနေ့မြတ်သတ်မှတ်တာ၊ စည်းမျဉ်းစည်းကမ်း စစ်ကျင့်ဝတ်တွေနဲ့ ပတ်သက်ပြီး အရေးယူဆောင်ရွက်နိုင်ရေးအတွက် စစ်ဘက်ဆိုင်ရာ တရားရုံးကို တပ်မဟာအဆင့်၊ စစ်ဌာနချုပ်ရုံးအဆင့်နဲ့ Defense Council အဆင့်လို့ သတ်မှတ်ပြဋ္ဌာန်းပြီး အများပြည်သူ အားကိုးအားထားပြုထိုက်တဲ့ တပ်ဖွဲ့ဖြစ်နိုင်ရေးကို မူဝါဒတွေ ချမှတ်ခဲ့တယ်လို့လည်း ဆိုပါတယ်။

CNO/CNDF အနေနဲ့ အာဏာရှင်စနစ် အမြစ်ပြတ်ချေမှုန်းရေး၊ ချင်းအမျိုးသားတည်ဆောက်ရေးနဲ့ ဖက်ဒရယ်ဒီမိုကရေစီပြည်ထောင်စု ပေါ်ပေါက်ရေးအတွက် တော်လှန်ရေး အင်အားစုတွေနဲ့အတူ ဆုံးခန်းတိုင်အောင် ဆက်လက် တိုက်ပွဲဝင်သွားမယ်လို့လည်း ထုတ်ပြန်ထားပါတယ်။