စစ်အုပ်ချုပ်ရေး ကြေညာထားတဲ့ ချင်းပြည်နယ်၊ ထန်တလန်မြို့ရှိ မြို့မ ရဲစခန်းကို ဖေဖော်ဝါရီ ၈ ရက် ည ၉ နာရီဝန်းကျင်က ချင်းအမျိုးသားတပ်မတော် CNA / CNF က ဝင်ရောက်စီးနင်းနိုင်ခဲ့ပြီး လက်နက်မျိုးစုံ ၄၀ ကျော် သိမ်းဆည်းရမိခဲ့ပါတယ်။
စစ်ကောင်စီတပ်ဖွဲ့ဝင်တွေနဲ့ ရဲတပ်ဖွဲ့ဝင် ၄၀ နီးပါး အခြေချတပ်စွဲထားတဲ့ ရဲစခန်းကို ချင်းအမျိုးသား တပ်မတော် (CNA/ CNF) က နှစ်နာရီကျော်ကြာ တိုက်ခိုက်ခဲ့ပြီးတဲ့နောက် အခုလို သိမ်းဆည်းရမိခဲ့တာဖြစ်ပြီး သိမ်းဆည်းရမိတဲ့ သေနတ်တွေထဲမှာ ဒရုန်းကို ပစ်ချတဲ့ အမျိုးအစားတွေလည်း ပါဝင်တယ်လို့ CNF က ဓာတ်ပုံနဲ့ တကွ ထုတ်ပြန်ထားပါတယ်။
အဲဒီလိုတိုက်ခိုက်ခံခဲ့ရပြီးတဲ့နောက် ဖေဖော်ဝါရီလ ၉ ရက်နေ့ ဒီကနေ့ မနက်ပိုင်းမှာတော့ ထန်တလန်မြို့မ ရဲစခန်းနဲ့ တဝိုက်ကို စစ်ကောင်စီက တိုက်လေယာဉ်တွေ အသုံးပြုပြီး လေကြောင်းကနေ တိုက်ခိုက်နေတယ်လို့ CNF ပြန်ကြားရေး တာဝန်ရှိသူက ပြောပါတယ်။
“သူတို့ဘက်က အကျအဆုံး လေးယောက်လောက် တွေ့တယ်။ ကျန်တဲ့ဟာတွေကတော့ တိမ်းရှောင်ကြတယ်လို့ သိရတယ်။ ကျနော်တို့ဘက်က တယောက်ကျတယ်။ တယောက် ဒဏ်ရာရတယ်။ ဒီမနက်မှာတော့ လေကြောင်းတိုက်ခိုက်မှုတွေ လုပ်နေပါတယ်။”
မြန်မာနိုင်ငံတွင်းက လက်နက်ကိုင်ခုခံမှု အားကောင်းတဲ့ မြို့နယ် ၃၇ မြို့နယ်ကို စစ်အာဏာသိမ်း နှစ်နှစ်ပြည့် ဖေဖော်ဝါရီ ၂ ရက်နေ့မှာ စစ်ကောင်စီက စစ်အုပ်ချုပ်ရေး ကြေညာခဲ့တဲ့အထဲမှာ ချင်းပြည်နယ်ထဲက ထန်တလန်မြို့လည်း ပါဝင်ခဲ့ပါတယ်။
