မန္တလေးတိုင်း၊ ချမ်းမြသာစည်မြို့နယ်၊ မြရည်နန္ဒာရပ်ကွက်မှာ မတ် ၁၄ ရက် မနက် ၅ နာရီခွဲလောက်က ကုန်စုံဆိုင်ထဲမှာ အမျိုးသမီးတဦး ဓားခုတ်ရာတွေနဲ့ သေဆုံးနေတယ်လို့ မြို့ခံတွေဆီက သိရပါတယ်။

သေဆုံးသူဟာ အသက် ၄၇ နှစ်အရွယ် အမျိုးသမီးဖြစ်ပြီး ၄၉ လမ်း၊ ၁၁၄ လမ်း × ၁၁၅ လမ်းကြားမှာ နေအိမ်တွဲရက် ကုန်စုံဆိုင် ဖွင့်ထားတာပါ။

ဓားဒဏ်ရာတွေဟာ မျက်နှာနဲ့ ရင်ဘတ်တွေမှာဖြစ်ပြီး ထိုးသွင်းဒဏ်ရာ ၂ ချက် ရှိနေတဲ့အပြင် ကုန်စုံဆိုင်အံဆွဲက ပိုက်ဆံတွေနဲ့ သိမ်းထားတဲ့ ရွှေထည်တွေ ပျောက်ဆုံးနေပါတယ်။

“သူက အိမ်မှာ ကုန်စုံဆိုင်လေးပဲ ဖွင့်ထားတာ။ ခုတ်ခံထားရတဲ့ ဒဏ်ရာက ၁၀ ချက်ကျော်တယ်။ အံဆွဲထဲက ပိုက်ဆံတွေ ပါသွားတယ်။ ရွှေဆိုလည်း သူက မဝတ်ဘဲ သိမ်းထားတာ။ အဲဒါတွေပါ သူခိုးတွေက မွှေနှောက်ယူသွားတယ်” လို့ မိသားစုနဲ့ နီးစပ်သူတွေက ပြောပါတယ်။

အိမ်နီးနားချင်းတွေရဲ့ ပြောပြချက်အရ မနက် ၅ နာရီကျော်လောက်မှာ သူနေထိုင်တဲ့ ခြံဝင်းထဲ လမ်း‌လျှောက်နေတာ မြင်ရတယ်လို့ သိရပြီး နေထိုင်တဲ့အိမ်ထဲ ပြန်ဝင်ချိန်မှာ ဓားနဲ့ ခုတ်သတ်ခံလိုက်ရတာပါ။

“အနုကြမ်းစီးပြီး သတ်သွားတဲ့ပုံစံပါ။ သတ်သွားတာကလည်း လူမဆန်စွာ သတ်သွားတာ။ မျက်နှာကိုချည်း ခုတ်သွားတာ ၆ ချက်လောက် ရှိတာကိုး။ ရင်ဘတ်နဲ့ ဝမ်းဗိုက်မှာ ထိုးသွင်းဒဏ်ရာ ၂ ချက်၊ သူက မနက် ၅ နာရီလောက်မှာ ခြံထဲ လမ်းလျှောက်နေသေးတယ် ပြောတယ်။ ၆ နာရီနဲ့ ၅ နာရီကြားထဲမှာ ဖြစ်သွားတာပါ” လို့ မြို့ခံလူမှုကူညီရေးအသင်းတခုက ပြောပါတယ်။

ခြံဝင်းရဲ့ နောက်ဖေးတံခါးက ပွင့်နေတဲ့အပြင် ခြံစည်းရိုးတွေကလည်း ခွကျော်ရုံလောက်ပဲ ရှိပြီး ၄၉ လမ်းအဝ တံခါးပေါက်ပွင့်ကာ သွေးစက်တွေ တွေ့ရတယ်လို့ သိရပါတယ်။

သေဆုံးသူနေတဲ့ခြံထဲမှာ တဦးတည်းနေတာဖြစ်ပြီး ဝပ်ရှော့ဆိုင်ခန်းတခန်း အငှားချထားတာ ဖြစ်ပေမဲ့ ညအိပ်လေ့မရှိဘူးလို့ သိရပါတယ်။

စစ်အာဏာသိမ်းပြီးနောက်ပိုင်း မန္တလေးမှာ ဓားပြမှု၊ ဓားခုတ်၊ ဆိုင်ကယ်လုမှုနဲ့ လုယက်မှုတွေ ပေါများလာခဲ့ပြီး အခုဖြစ်စဉ်နဲ့ပတ်သက်လို့ ချမ်းမြသာစည်ရဲစခန်းကို ဆက်သွယ်မေးမြန်းပေမဲ့ ပြန်လည်ဖြေကြားခြင်း မရှိပါဘူး။

မန္တလေး၊ ချမ်းမြသာစည်မြို့နယ် ၊ ချမ်းမြသာစည်တောင်ရပ်ကွက်မှာ အောက်တိုဘာ ၃ ရက် ညနေ ၅ နာရီလောက်က မီးလောင်မှုဖြစ်ပွားပြီး လူနေအိမ် အလုံး ၂၀ လောက် မီးလောင်ပျက်စီးဆုံးရှုံးခဲ့ပါတယ်။

သရဖီလမ်းသွယ်နဲ့ နှင်းဆီလမ်းသွယ်၊ အကွက် (၈၆၈) ကံရွာရပ်မှာ မနေညနေ ၅ နာရီလောက်က မီးလောင်မှုဖြစ်ပွားကြောင်း သတင်းရလို့ သွားရောက်မီးငြှိမ်းသတ်ခဲ့ရာမှာ ညနေ ၅ နာရီ ၅၉ မိနစ်မှာ မီးထိန်းနိုင်ခဲ့ပြီး ညနေ ၆ နာရီ ၁၄ မိနစ်မှာ မီးငြိမ်းသွားတယ်လို့ မီးသတ်တပ်ဖွဲ့က သတင်းထုတ်ပါတယ်။

“ ညနေ ၅ နာရီခွဲလောက်ကစလောင်တာပေါ့။ ၆ နာရီ ၁၅ လောက်မှ မီးညွန့်ကျိုးသွားတယ်။ ပေါ့ဆမှုကြောင့်ဖြစ်ရတာပါ။ အိမ်မှာမီးမွှေးထားခဲ့တာ။ ရပ်ကွပ်ထဲ အိမ်ခြေအလုံး ၂၀ လောက်ပါသွားတယ်”လို့ မီးလောင်တဲ့ရပ်ကွက်အနီးနေသူက MPA ကိုပြောထားပါတယ်။

အဆိုပါ မီးလောင်မှုဖြစ်စဥ်နဲ့ ပတ်သက်ပြီး ပျက်စီးဆုံးရှုံးမှုပမာဏကိုတော့ မသိရသေးပါဘူး။

Photo - MPA