နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အတွက် အနီးကပ်လုံခြုံရေး တာဝန်ထမ်း ဆောင်ခဲ့တဲ့ ဒုရဲအုပ် ချယ်ရီထက်ကို ရာဇသတ်ကြီးဥပဒေပုဒ်မ ၅၀၅(က)နဲ့ မတ်လ ၃၁ ရက် ဒီကနေ့ ထောင်ဒဏ် ၂ နှစ်ထပ်မံ ချမှတ်လိုက်တယ်လို့ တရားရုံးနဲ့ နီးစပ်တဲ့ အသိုင်းအဝိုင်းက သိရပါတယ်။
ဒုရဲအုပ် ချယ်ရီထက်ကို နေပြည်တော်အချုပ်ထောင်ရှိ သီးသန့်တရားရုံးမှာ ရုံးထုတ်စစ် ဆေးခဲ့တာ ဖြစ်ပါတယ်။
၂၀၂၁ ခုနှစ် မတ်လအတွင်းက လူမှုကွန်ရက် စာမျက်နှာမှာ ရေးသားခဲ့တဲ့ အကြောင်းအရာတွေ၊ လွှတ်တော်ကိုယ်စားလှယ်ဟောင်း ဒေါ်သီရိရတနာနဲ့ ဆက်သွယ်ခဲ့တာ၊ NUG ရဲ့သတင်း ထုတ်ပြန်ချက်တွေကို ပေးပို့တာ၊ ပြည်ပသတင်းဌာနတွေရဲ့ သတင်း ရုပ်သံဖိုင်တွေ အပြန်အလှန် ပေးပို့တာ စတာတွေပြုလုပ်ခဲ့တယ်လို့ စစ်ကောင်စီက စွပ်စွဲပြီး ဒုရဲအုပ် ချယ်ရီထက်ကို ပုဒ်မ ၅၀၅(က)နဲ့ တရားစွဲဆိုထား ဖြစ်ပါတယ်။
ဒေါ်အောင်ဆန်းစုကြည်ရဲ့ သက်တော်စောင့် ကိုယ်ရံတော်အဖြစ် တာဝန်ထမ်းဆောင်တဲ့ ချယ်ရီထက်ကို စစ်အာဏာသိမ်းပြီးနောက်ပိုင်း အကျယ်ချုပ်သဘောမျိုးနဲ့ စောင့်ကြည့်ထိန်းသိမ်းခြင်းခံရပြီးနောက် "အမှန်တရားကို မပြောရဲရင်ပါးစပ်ပိတ်နေပါ၊ မှားတယ်လို့တော့မပြောပါနဲ့" ဆိုတဲ့ စာသားနဲ့အတူ ဒေါ်အောင်ဆန်းစုကြည်ပုံကိုတွဲပြီး လူမှုကွန်ရက်စာမျက်နှာမှာတင်ခဲ့ရာကနေ စစ်ကောင်စီရဲ့ ဖမ်းဆီးတရားစွဲဆိုခြင်းခံရတာပါ။
ဖမ်းဆီးခံရပြီးနောက် ချယ်ရီထက်ကို ရဲဝန်ထမ်းဥပဒေအရ ထောင် ၃ နှစ်ချမှတ်ခဲ့ပြီး ပုဒ်မ - ၅၀၅(က)နဲ့ ထောင်ဒဏ် နောက်ထပ် ၂ နှစ် ချခဲ့တာဖြစ်လို့ စုစုပေါင်း ထောင်ဒဏ် ၅ နှစ် ကျခံရမှာ ဖြစ်ကာ ရ မည်းသင်းအကျဉ်းထောင်ဘက်ကို ပို့ဆောင်မယ်လို့ သိရပါတယ်။
Photo Credit- Cherry Htet
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ သက်တော်စောင့်တာဝန်ထမ်းဆောင်ခဲ့တဲ့ ဒုရဲအုပ် ချယ်ရီထက်ကို စက်တင်ဘာ ၂၁ ရက် က နေအိမ်အကျယ်ချုပ် ထားရှိရာကနေ စစ်ဆေးမြန်းမေးဖို့ခေါ်ဆောင်သွားခဲ့ပြီး စက်တင်ဘာ ၂၃ ရက်က နေပြည်တော် အမှတ် (၁) မြို့မရဲစခန်းမှာ ရာဇသတ်ကြီး ပုဒ်မ ၅၀၅ (က) နဲ့ အမှုဖွင့်လိုက်တယ်လို့ တပ်တွင်းသတင်းအရင်းအမြစ်တွေထံကနေ သိရပါတယ်။
နိုင်ငံတော်အာဏာကို စစ်တပ်က တရားမဝင် သိမ်းယူပြီးနောက် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ သက်တော်စောင့် ချယ်ရီထက်နဲ့ပတ်သက်ပြီး သတင်းအမျိုးမျိုး ထွက်ခဲ့သလို စစ်ကောင်စီလက်အောက်မှာ ဆက်လက်တာဝန်ထမ်းဆောင်နေတယ်ဆိုတဲ့ သတင်းတွေလည်း ထွက်ခဲ့ပါတယ်။
တပ်တွင်းသတင်းအရင်းအမြစ်တွေရဲ့ ပြောဆိုချက်အရ ချယ်ရီထက်ကို အမျိုးသားညီညွတ်ရေးအစိုးရအဖွဲ့က သူတွေနဲ့ အဆက်အသွယ်ရှိတဲ့ဆိုတဲ့ စွပ်စွဲချက်နဲ့ ဖမ်းဆီးသွားတာလို့ သိရပါတယ်။
ချယ်ရီထက် ဖမ်းဆီးခံရကြောင်း NUG ကာကွယ်ရေးဝန်ကြီးဌာနနဲ့ ပူးပေါင်းပြီး CDM ရဲတပ်ဖွဲ့ဝင်တွေကို CDM ကုတ်နံပါတ်ထုတ်ပေးတဲ့ Myanmar Police CDM Channel ကလည်း အတည်ပြုပြောဆိုပါတယ်။
