ရန်ကုန်တိုင်း တရားလွှတ်တော်ရုံးရှေ့ ခြံစည်းရိုးမှာ စာတန်းချိတ်ဆွဲတယ်ဆိုပြီး ဒီကနေ့ အောက်တိုဘာ ၇ ရက် ညနေပိုင်းမှာ စစ်ကောင်စီတပ်က လူငယ်တယောက်ကို ရိုက်နှက်ဖမ်းဆီးခဲ့ပါတယ်။

ကျောက်တံတားမြို့နယ်၊ အမှတ် ၄ ရပ်ကွက်၊ ပန်းဆိုးတန်းလမ်းမပေါ်ရှိ ရန်ကုန်တိုင်း တရားလွှတ်တော်ရုံးရှေ့ ခြံစည်းရိုးမှာ ဒီကနေ့ညနေ ၃ နာရီခွဲက လူငယ်နှစ်ဦး စာလာချိတ်တယ်ဆိုပြီး စစ်ကောင်စီတပ်တွေက လိုက်လံဖမ်းဆီးခဲ့တာလို့ မဟာဗန္ဓုလပန်းခြံအနီး နေထိုင်သူတယောက်က ပြောပါတယ်။

“စစ်တပ်နဲ့ ရဲတွေ လိုက်ဖမ်းတာ ကောင်လေးကိုမိသွားပြီး စစ်တပ်က ထိုးကြိတ်ပြီး ခေါ်လာတာ။ စာချိတ်တယ်၊ မချိတ်တယ်ဆိုတာတော့ မသိဘူး။ ဖမ်းလာတာတော့တွေ့တယ်။”

ဖမ်းဆီးရမိတဲ့ လူငယ်ကို စစ်တပ်က ကျောက်တံတားမြို့မရဲစခန်းကို ခေါ်သွားပြီး မှတ်ပုံတင် ဓာတ်ပုံတွေရိုက်ကာ စစ်ကားနဲ့ ပြန်လည်ခေါ်ဆောင်သွားတယ်လို့ ရပ်မိရပ်ဖတယောက်က ပြောပါတယ်။

“မိတဲ့ကောင်လေးက သာကေတကလို့ သိရတယ်။ နာမည်တော့မသိဘူး။ စစ်တပ်က ရဲစခန်းကနေ ပြန်ခေါ်သွားတယ်။”

လတ်တလောမှာ စစ်ကောင်စီတပ်တွေက ဆူးလေနဲ့အနီးတဝိုက်မှာ ထွက်ပြေးလွတ်မြောက်သွားတဲ့ လူငယ်တယောက်ကို လိုက်လံရှာဖွေနေတယ်လို့ မြို့ခံတွေက ပြောပါတယ်။

ရန်ကုန်တိုင်း လှိုင်မြို့နယ်၊ ပါရမီလမ်းမပေါ်မှာ ဆိုင်ကယ်နဲ့ လုယက်တာတွေများပြားနေတဲ့အတွက် သတိထားသွားလာကြဖို့ လျှပ်စစ်ဓာတ်ကြိုးတွေမှာ သတိပေးဆိုင်းဘုတ်တွေ ချိတ်ဆွဲပြီး သတိပေး တာတွေကို ပြည်သူတွေက ပြုလုပ်နေကြပါတယ်။

စစ်ကောင်စီက အုပ်ချုပ်နေတဲ့ တနှစ်ကျော်ကာလအတွင်းမှာ တရားဥပဒေစိုးမိုးမှု လျော့ကျလာပြီးတော့ ကုန်းဈေးနှုန်းမြင့်တက်မှု၊ အလုပ်အကိုင်ရှားပါးလာမှုတွေကြောင့် ခိုးဆိုးလုနှိုက်တွေဟာ ပိုမိုများပြားလာတဲ့အတွက် ပြည်သူတွေဟာ စစ်ကောင်စီရဲ့ တရားစီရင်ရေးထက် အခုလို ပြည်သူအချင်းချင်း သတိပေးတာတွေပြုလုပ်လာရတာလို့ ရန်ကုန်မြို့နေပြည်သူတွေက ပြောပါတယ်။

ရန်ကုန်မှာ ယခင်က မြို့စွန်တွေလောက်မှာပဲ လုယက်မှုတွေရှိနေပေမယ့် အခုအခါ လူသွား လူလာများပြားတဲ့ နေရာတွေမှာပါ အသက်အန္တရာယ်ထိခိုက်စေလောက်တဲ့ လုယက်မှုတွေကို ကျူးလွန်လာကြပေမယ့် စစ်ကောင်စီရဲ့ ရဲဌာနကတော့ ပြည်သူတွေ အားကိုးအားထား ထိုက်ပြုလောက်အောင် ဆောင်ရွက်နိုင်ခြင်းမရှိပါဘူး။

လုယက်မှုတွေဟာ ရန်ကုန်မြို့ လှည်းတန်းလို လူစည်ကားတဲ့နေရာတွေမှာတောင် ဖုန်းလုယူ ထွက်ပြေးတဲ့ ဖြစ်စဥ်တွေ မကြာခဏဖြစ်ပေါ်နေပြီး လုယက်သူတွေကို ပြည်သူအချင်းချင်းကသာ ဝိုင်းဝန်းဖမ်းစီးပြီး ရဲစခန်းကို ပို့ဆောင်ပေမယ့် ရဲစခန်းကတော့ ငွေပေးနိုင်မှ အမှုဖွင့်ပေးမယ်ဆိုတဲ့ ဖြစ်စဥ်တွေကိုလည်း ကြုံတွေ့နေရတယ်လို့ ရန်ကုန်မြို့နေပြည်သူတွေက ဆိုပါတယ်။