ကမ္ဘာအပူဆုံးမြို့များစာရင်းမှာ မြန်မာနိုင်ငံမှ မြို့ ၆ မြို့ ပါဝင်ကြောင်း နိုင်ငံတကာ မိုးလေဝသသတင်းအချက်အလက်များဖော်ပြတဲ့ El Dorado Weather က ထုတ်ပြန်ထားပါတယ်။

El Dorado Weatherက ကမ္ဘာ့အပူဆုံးမြို့ ၁၅ မြို့ကို နေ့စဉ် ထုတ်ပြန်ပေးနေပြီး မေ ၉ ရက်နေ့ တိုင်းတာချက်အရ မြန်မာနိုင်ငံမှ ချောက်မြို့၊ မကွေးမြို့၊ မင်းဘူးမြို့၊ ညောင်ဦးမြို့၊ တောင်ငူမြို့နဲ့ ပြည်မြို့တို့ ပါဝင်ခဲ့တယ်လို့ ဆိုပါတယ်။

ချောက်မြို့ဟာ အပူချိန် ၄၅ ဒသမ ၆ ဒီဂရီ စင်တီဂရိတ်နဲ့ ကမ္ဘာ့အဆင့် ဒုတိယ၊ မကွေးမြို့က ၄၄ ဒသမ ၃ ဒီဂရီစင်တီဂရိတ်နဲ့ အဆင့် ၆၊ မင်းဘူးမြို့က ၄၃ ဒသမ ၆ ဒီဂရီစင်တီဂရိတ်နဲ့ အဆင့် ၉၊ ညောင်ဦးမြို့က အပူချိန် ၄၃ ဒသမ ၆ ဒီဂရီစင်တီဂရိတ်နဲ့ အဆင့် ၁၀၊ တောင်ငူမြို့က ၄၃ ဒသမ ၅ ဒီဂရီစင်တီဂရိတ်နဲ့ အဆင့် ၁၁ နဲ့ ပြည်မြို့က ၄၃ ဒသမ ၃ ဒီဂရီစင်တီဂရိတ်နဲ့ အဆင့် ၁၅ နေရာမှာ ပါဝင်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ရာသီဥတုပူပြင်းတာကြောင့် မြန်မာနိုင်ငံအတွင်း အသက် ၄၀ ကျော်ကနေ ၇၀ ကျော်အတွင်း အနည်းဆုံး ၁၀ ယောက် ရုတ်တရက် သေဆုံးခဲ့ကြတယ်လို့ ကျန်းမာရေးပညာရှင်တွေက ပြောပါတယ်။

ဒါ့အပြင် ရာသီအပူရှိန်ကြောင့် အိမ်မွေးမြူရေး ကြက်၊ ဘဲတွေနဲ့ စိုက်ပျိုးရေးရာသီ အသီးအနှံပင်တွေ သေဆုံးထိခိုက်ပျက်စီးတာတွေအပြင် အသီးထွက်နှုန်းပါ ကျဆင်းသွားသလို ရေတွင်းရေကန်ခန်းခြောက်ပြီး သောက်သုံးရေ ပြတ်လပ်တာတွေ ကြုံတွေ့နေကြရတယ်လို့ ဆိုပါတယ်။

“ဒီနှစ်က အရင်နှစ်တွေထက်ပိုပူပြင်းတယ်။ ဒီဘက်နယ်မှာက စိုက်ပျိုးရေးလုက်ငန်းကို လုပ်ရတာ အခုအပူဒဏ်ကြောင့် အသီးအနှံပင်တွေ ထိခိုက်ပျက်စီးတယ်၊ အသီးတွေပါ မတင်ဘူး” လို့ စိုက်ပျိုးရေးလုပ်ကိုင်သူတယောက်က ပြောပါတယ်။

ဆီနီဂေါနိုင်ငံ၊ ဆော်ဒီအာရေဗျနိုင်ငံ၊ ပါကစ္စတန်၊ နိုက်ဂျာနှင့် ချဒ်နိုင်ငံတို့မှ မြို့တွေလည်း ကမ္ဘာအပူဆုံးစာရင်းမှာ  ပါဝင်တယ်လို့ El Dorado Weather က ထုတ်ပြန်ထားပါတယ်။

မကွေးတိုင်း၊ ချောက်မြို့မှာ ဖေဖော်ဝါရီ ၂၈ ရက် ညက စစ်ကောင်စီရဲ့ စစ်ကြောရေးစခန်းတခု တိုက်ခိုက်ခံရပြီး နှစ်ယောက်သေဆုံးခဲ့တယ်လို့ ချောက်မြို့နယ်ပြောက်ကျားတပ်ဖွဲ့-CGF ကနေ သိရပါတယ်။

ချောက်မြို့မှာ အရင်က ရေနံမြေအရာရှိတွေ နေထိုင်ခဲ့တဲ့ နက/၆၀ မှာရှိတဲ့ စစ်ကောင်စီရဲ့ စစ်ကြောရေးစခန်းကို မနေ့ ည ၆ နာရီ ၄၅ မိနစ်မှာ ဒေသကာကွယ်ရေး ပူးပေါင်းတပ်ဖွဲ့တွေက ပစ်ခတ်တိုက်ခိုက်ခဲ့တာလို့ CGF ရဲ့ ဒုတာဝန်ခံ ဗိုလ်ပေတက ဒီဗွီဘီကို ပြောပါတယ်။

“အဲဒီစစ်ကြောရေးစခန်းအတွင်းက အလင်းရောင်အောက်မှာ ကင်းစောင့်နေတဲ့ စစ်ကောင်စီတပ်သား ၃ ယောက်ကို ရှေ့တည့်တည့်ကနေ မျက်နှာချင်းဆိုင် ပစ်လိုက်တာဗျ။ အဲဒီမှာ သူတို့လူတယောက် လဲကျသွားပြီး ကျန်တဲ့ ၂ ယောက် ဝပ်လိုက်တဲ့အချိန်မှာ ၈ ချက်ပစ်လိုက်ပြီး သေနတ်က ဂျန်းဖြစ်သွားလို့ နောက်ပြန်ဆုတ်ခဲ့ရတယ်။ အဲဒီထဲက စစ်ကောင်စီတပ်သားတွေ ကျနော်တို့နောက်ကိုလိုက်လာလို့ သေနတ်အတိုတွေနဲ့ ပြန်ပစ်ခဲ့ရပြီး ထိခိုက်မှုရှိမရှိဆိုတာကိုတော့ ညဘက်ကြီးဖြစ်နေတဲ့အတွက် မသိရသေးဘူး။”

အဲဒီစစ်ကြောရေးစခန်းမှာ စစ်ကောင်စီရဲ့ ဒုဗိုလ်မှူးကြီးတယောက် ဦးစီးပြီး စစ်ကောင်စီတပ်သား အယောက် ၂၀ ကျော်လောက် တပ်စွဲထားကာ အပြစ်မဲ့ပြည်သူတွေကို မတရား ဖမ်းဆီးနှိပ်စက်နေပြီး အခုနှစ် ဇန်နဝါရီလနဲ့ ဖေဖော်ဝါရီလအတွင်းမှာပဲ အသက် ၄၀ ကျော်လောက်ရှိတဲ့ ဦးကျော်မိုးနဲ့ အသက် ၂၀ ကျော်အရွယ် လူငယ်တယောက် သေဆုံးခဲ့တယ်လို့ ဆိုပါတယ်။

အဲဒီတိုက်ခိုက်မှုကို ချောက်မြို့နယ် ပြောက်ကျားတပ်ဖွဲ့-CGF၊ ချောက် ပ.က.ဖ၊ Hunter Dragon Group၊ King Fighter အဖွဲ့တို့ ပူးပေါင်းတိုက်ခိုက်ခဲ့တာဖြစ်ပြီး ဒေသကာကွယ်ရေး ပူးပေါင်းတပ်ဖွဲ့ဘက်က ရဲဘော်တွေ ထိခိုက်မှုမရှိဘဲ ဘေးကင်းလုံခြုံတဲ့နေရာကို ရောက်ရှိပြီလို့ ပြောပါတယ်။

အလားတူ မကွေးတိုင်း၊ မြိုင်မြို့မှာလည်း ဖေဖော်ဝါရီ ၂၈ ရက် ညနေပိုင်းက စစ်ကောင်စီရဲ့ စစ်ဆေးရေးဂိတ်တခု တိုက်ခိုက်ခံရပြီး ၃ ယောက်သေဆုံးကာ ၂ ယောက် အပြင်းအထန် ဒဏ်ရာရရှိခဲ့တယ်လို့ မြိုင် ပကဖ ကနေ သိရပါတယ်။

မြိုင်မြို့ မြောက်ဘက်မှာ တပ်စွဲထားတဲ့ စစ်ကောင်စီရဲ့ ပူးပေါင်းစစ်ဆေးရေးဂိတ်ကို မနေ့က ဖေဖော်ဝါရီ ၂၈ ရက် ညနေ ၄ နာရီ ၄၉ မိနစ်မှာ ဒေသကာကွယ်ရေး ပူးပေါင်းတပ်ဖွဲ့တွေက ဝင်ရောက်စီးနင်း တိုက်ခိုက်ခဲ့တာလို့ မြိုင် ပ.က.ဖ တပ်ရင်း-၁ တပ်ရင်းမှူး ဗိုလ်လက်ယာက ဒီဗွီဘီကို ပြောပါတယ်။

နှစ်ဖက်အပြန်အလှန် မိနစ်အနည်းငယ်ကြာ တိုက်ပွဲဖြစ်ပွားခဲ့ပြီး အဲဒီတိုက်ခိုက်မှုအတွင်းမှာ စစ်ကောင်စီတပ်ဘက်က ၃ ယောက်သေဆုံးပြီး ၂ ယောက် အပြင်းအထန် ဒဏ်ရာရရှိခဲ့တယ်လို့ ဆိုပါတယ်။

“အဲဒီတိုက်ခိုက်မှုကို မြိုင် ပ.က.ဖ တပ်ရင်း-၁၊ တပ်ခွဲ-၃ နဲ့ နံသာမြေအဖွဲ့တို့ ပူးပေါင်းတိုက်ခိုက်ခဲ့တာဖြစ်ပြီး စစ်ကောင်စီဘက်က တပ်ကူတွေလိုက်လာလို့ ကျနော်တို့ဘက်က ရဲဘော်တွေ အလျင်အမြန်ပစ်ခတ်ပြီး ထိခိုက်မှုမရှိဘဲ ပြန်လည်ဆုတ်ခွာခဲ့ကြတယ်”လို့ ဗိုလ်လက်ယာက ပြောပါတယ်။

မြိုင်မြို့အနီးမှာ ဖေဖော်ဝါရီ ၂၅ ရက် မနက်ပိုင်းကလည်း ကင်းပတ်ထွက်လာတဲ့ စစ်ကောင်စီတပ်သားတွေနဲ့ ပျူစောထီးတွေ တိုက်ခိုက်ခံရပြီး ၁ ယောက်သေဆုံးကာ ၂ ယောက် အပြင်းအထန် ဒဏ်ရာရရှိခဲ့တယ်လို့ မြိုင်ပ.က.ဖ ကနေ သိရပါတယ်။

ပေါက်မြို့နယ်မှာတော့ ထန်းပေါက်ကုန်းကျေးရွာကနေ မြိုင်မြို့နယ် ကိုင်းတောမကျေးရွာကို ဦးတည်ပြီး အင်အား ၆၀ နဲ့ စစ်ကြောင်းထိုးလာတဲ့ စစ်ကောင်စီ စစ်ကြောင်းကို ဒေသခံပြည်သူ့ကာကွယ်ရေးတပ်တွေက အီနာဂါဗုံးသီး ၅ လုံးချ တိုက်ခိုက်ခဲ့တယ်လို့ သိရပါတယ်။

Black Cheetah People Defence Force တာဝန်ခံက “လက်ခုပ်ပင်ကျေးရွာက တောစပ်နားအရောက်မှာ ဒရုန်းနဲ့ကြဲချတာဗျ။ လက်နက်ကြီးတွေနဲ့တော့ ရမ်းထုသေးတယ်။ ကျနော်တို့ဘက်က အထိအခိုက် မရှိပါဘူး” လို့ ပြောပါတယ်။

အဲဒီတိုက်ခိုက်မှုကို Black Cheetah People Defence Force အပါအဝင် Hero New G.Z၊ ဝံပုလွေပြောက်ကျားတပ်ဖွဲ့-မြိုင်၊ ဒေသခံကာကွယ်ရေးတပ်ဖွဲ့တွေ စုပေါင်းတိုက်ခိုက်ခဲ့တာ ဖြစ်ပြီး စစ်ကောင်စီတပ်ဘက်က လက်နက်ကြီး လက်နက်ငယ်တွေနဲ့ ပြန်လည်ပစ်ခတ်ခဲ့ကာ အထိအခိုက် အကျအဆုံးကိုတော့ စုံစမ်းနေဆဲဖြစ်တယ်လို့ သိရပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

B2 45