မကွေးတိုင်း ပခုက္ကူမြို့မှာ အောက်တိုဘာ ၇ ရက်  ညပိုင်းက မိုးသည်းထန်စွာ ရွာသွန်းပြီး ချောင်းရေကြီးတာကြောင့် ချောင်းအနားနေအိမ်နေ မိသားစု လေးယောက် ရေထဲမျောပါသွားလို့ ကယ်ဆယ်ရေးလုပ်ငန်းဆောင်ရွက်​နေတယ်လို့ ပခုက္ကူခရိုင်မီးသတ်တပ်ဖွဲ့က ​ပြောပါတယ်။

မိုးညလုံး​ပေါက်ရွာသွန်းတာ​ကြောင့် မိုးကြီးကာ ​ချောင်းရေလျှံပြီး  မိသားစု ​လေယောက် ​ရေထဲ​မျောပါသွားရတာလို့ ပခုက္ကူမြို့ခံတဦးက ပြောပါတယ်။ 

"အဲ့ချောင်းတွေက ချောင်းချောက်တွေ၊ ပုံမှန်ဆိုရေမစီးဘူး၊ အိမ်တွေက ချောင်းနားမှာ ဆောက်ကြတာဆိုတော့ ခုလို မိုးများပြီးရေကြီးတော့ ရေထဲပါသွားတာ။ ရေက အမြဲ မစီးဘူး၊ ဒါပေမဲ့ အဲဒီချောင်းချောက်တွေက ရေတအားကြီးပြီဆိုရင်လည်း တံတားတွေပါ မျှောပါတာ"

ရေထဲပါသွားတဲ့ မိသားစုဝင် လေးယောက်ကို ရှာဖွေကယ်ဆယ်ရေးလူပ်ဆောင်နေ​ပေမဲ့ အခုချိန်ထိ မတွေ့ သေးဘူးလို့ မီးသတ်တပ်ဖွဲ့က ​ပြောပါတယ်။ 

ပခုက္ကူမြို့မှာ အောက်တိုဘာ ၇ ရက်ညပိုင်းကတည်းက မိုးသည်းထန်စွာ ရွာသွန်း​တာကြောင့် ဓာတ်တိုင်တွေ ပြိုကျပြီး သစ်ပင်တွေလဲတယ်လို့ ဒေသခံ​​တွေက ပြောပါတယ်။ 

ဒီက​နေ့ ​အောက်တိုဘာ ၈ ရက် မနက်ပိုင်း မိုးရွာသွန်းမှု နည်းသွားချိန်မှာ စစ်ကောင်စီလက်အောက်ခံ ပခုက္ကူခရိုင်မီးသတ်တပ်ဖွဲ့က ပိတ်ဆို့နေတဲ့လမ်းတွေ၊ နေအိမ်တွေပေါ်ပိနေတဲ့သစ်ပင်တွေနဲ့ လဲကျနေတဲ့ ဓာတ်တိုင်တွေကို အဖွဲ့ သုံးဖွဲ့ခွဲပြီး ရှင်းလင်းနေတယ်လို့  ဆိုပါတယ်။ 

ပခုက္ကူမြို့နယ်မှာ အခုလိုမိုးသည်းထန်စွာရွာသွန်းလို့ ချောင်းရေထဲ လူမျောပါတဲ့ဖြစ်စဥ်က အဖြစ်နည်းပြီး နှစ်စဥ်နှစ်တိုင်းလည်း မိုသည်းထန်လို့ လူ​မျောပါတာမျိုး ဖြစ်​လေ့မရှိဘူးလို့ ဒေသခံတွေက ပြောပါတယ်။

ပုံ- ပခုက္ကူခရိုင်မီးသတ်တပ်ဖွဲ့

စစ်ကိုင်းတိုင်း၊ ယင်းမာပင်မြို့နယ်မှာ အောက်တိုဘာ  ၄ ရက် မနက် ၇ နာရီလောက်က မြောက်ယမားချောင်း ရေကြီးလျှံမှုကြောင့် ဒေသခံတွေ စိုက်ပျိုးထားတဲ့ သီးနှံတွေ ပျက်စီး ဆုံးရှုံးခဲ့ရသလို လယ်ယာသုံးပစ္စည်းတချို့နဲ့ နေအိမ်တလုံးလည်း ရေထဲမျောပါ ပျက်စီးသွားခဲ့တယ်လို့ ဒေသခံတွေက ပြောပါတယ်။

ကပိုင်ကျေးရွာနေ ပြည်သူတွေ စိုက်ပျိုးလုပ်ကိုင်နေတဲ့ သီးနှံတွေ ပျက်စီးဆုံးရှုံးသွားတာဖြစ်ပြီး ကပိုင်ကျေးရွာရဲ့ ဘေးပတ်လည်ရှိ မြေနုကျွန်းမှာ စုစုပေါင်း စိုက်ပျိုးဧက ၂၀၀ ဝန်းကျင်ခန့် ရှိတယ်လို့ ဒေသခံတဦးက ပြောပါတယ်။

အဲဒီကျွန်းတွေပေါ်မှာ အရင်နှစ်တွေတုန်းကလည်း ပဲတီစိမ်း၊ မြေပဲသီးနှံအများဆုံး စိုက်ပျိုးပြီး အဲဒီကြားထဲမှာ တခြားသီးနှံတချို့ကို စိုက်ပျိုးကြသလို အခုနှစ်မှာလည်း အဲဒီသီးနှံတွေကို ထပ်မံစိုက်ပျိုးထားကာ ရေကြီးလျှံမှုကြောင့် စိုက်ပျိုးထားတဲ့ သီးနှံအားလုံး ရေထဲ မျောပါသွားခဲ့တယ်လို့ ဆိုပါတယ်။

အခုလို ရေလျှံမှုကို ကြုံနေရတဲ့ ကပိုင်ကျေးရွာဟာ ပြီးခဲ့တဲ့လပိုင်းလောက်ကလည်း စစ်ကောင်စီတပ်ဖွဲ့ရဲ့ မီးရှို့ဖျက်ဆီးမှုကြောင့် နေအိမ်အဆောက်အအုံပေါင်း ၅၀၀ ကျော်လောက် မီးလောင်ကျွမ်းခံခဲ့ရပါတယ်။

ဒါ့အပြင် စစ်ဘေးကြောင့် အခက်အခဲတွေရှိနေသေးသလို ရေဘေးကပါ ထပ်မံကြုံတွေ့နေကြရတာကြောင့် စေတနာရှင်ပြည်သူတွေအနေနဲ့ တတ်နိုင်သလောက် ကူညီပေးကြဖို့လည်း ဒေသခံတွေက အကူအညီတောင်းခံထားပါတယ်။