မကွေးတိုင်းဒေသကြီး ဂန့်ဂေါခရိုင် ယောဒေသအတွင်း စစ်ဘေးရှောင်ပြည်သူတွေအတွက် စားနက်ရိက္ခာ ဆေးဝါးနဲ့ ရေးပေါ် အကူညီတွေလိုအပ်နေတယ်လို့ ဂန့်ဂေါ PDF တပ်ရင်းကနေ သိရပါတယ်။

ဂန့်ဂေါခရိုင် ယောဒေသအတွင်းမှာ ပြည်သူ့ကာကွယ်ရေးတပ်ဖွဲ့တွေနဲ့ အကြမ်းဖက်စစ်တပ်တို့ တိုက်ပွဲတွေကြောင့် ဒေသခံပြည်သူ ၉၀၀၀ ကျော်လောက် ဘေးလွတ်ရာကို ထွက်ပြေး တိမ်းရှောင်နေကြရတယ်လို့ ဂန့်ဂေါ PDF တပ်ရင်းရဲ့ ပြန်ကြားရေးတာဝန်ခံက ပြောပါတယ်။

စစ်ဘေးရှောင်ပြည်သူတွေဟာ ဘေးလွတ်ရာ တောထဲနဲ့ နီးစပ်ရာ ဆွေမျိုးတွေဆီမှာ တိမ်းရှောင်နေရသလို့ တစ်ချို့နေရာတွေမှာတော့ စစ်ရှောင်စခန်းဖွင့်လှစ်ကာ တဲထိုးပြီး နေထိုင်ကြရတယ်လို့ ဆိုပါတယ်။

စစ်ဘေးရှောင်ပြည်သူတွေအတွက် အဓိက လိုအပ်တာကတော့ စားနပ်ရိက္ခာ၊ ဆေးဝါး၊ အဝတ်အထည်၊ မိုးကာနဲ့ စောင်တွေ အရေးပေါ်လိုအပ်ချက်ရှိနေပြီး ရာသီအကူး ဆောင်းရာသီကာလမှာ ဖျားနာသူတွေရှိနေတာကြောင့် ကျန်းမာရေးစောင့်ရှောက်မှုတွေလည်း လိုအပ်နေတယ်လို့ ပြောပါတယ်။

ဒါ့အပြင် ကျောက်ထုမြို့မှာ ချင်းပြည်နယ် မင်းတပ်မြို့နယ်က စစ်ရှောင်းစခန်းတွေမှာ လာရောက်ခိုလှုံနေတဲ့ ပြည်သူ ၁၀၀၀ ကျော်ရှိပြီး ပြင်ပမှာ ခိုလှုံနေတဲ့သူက ၂၀၀၀ လောက်ရှိတယ်လို့ ကျော်ထုစစ်ဘေးရှောင်အကူညီပေးရေးအဖွဲ့ ခေါင်းဆောင်က ပြောပါတယ်။

“စစ်ဘေးရှောင်ပြည်သူတွေဟာ ဖျားနာနေသူများပြားနေပြီး ဆေးဝါးက ရှိကိုမရှိတာ။ ဆေးဝါးတွေ၊ အနွေးထည်တွေ၊ စောင်တွေနဲ့ စားနပ်ရိက္ခာတွေကို စစ်ကောင်စီက သယ်ယူခွင့်မပေးတာကြောင့် ဆေးဝါးကတော့ လုံးဝပြတ်သွားပြီ။ စားနပ်ရိက္ခာကတော့ ကျနော်တို့တွေ အဆင်ပြေတဲ့ နည်းလမ်းတွေနဲ့ ဖြေရှင်းပံ့ပိုးပေးထားရတယ်။”

ရာသီအကူးပြောင်းကာလမှာ စစ်ရှောင်ပြည်သူ အများအပြား ဖျားနာနေပြီး ဆေးမစစ်တော့ တုတ်ကွေးလို့ ပြောကြပေမယ့် ကိုဗစ်ရောဂါဖြစ်တဲ့သူတွေရှိနိုင်တာကြောင့် ကျန်းမာရေးစောင့်ရှောက်မှုတွေနဲ့ ဆေးဝါးတွေ အရေးပေါ်လိုအပ်နေတာလို့ ဆိုပါတယ်။

ကျောက်ထုမြို့ပေါ်မှာတော့ နှစ်ဖက်တိုက်ပွဲ ဖြစ်ပွားတာမရှိပေမယ့် နယ်ဘက်တွေမှာတော့ ပြည်သူ့ကာကွယ်ရေးတပ်တွေနဲ့ စစ်ကောင်စီတပ်တွေ ရံဖန်ရံကာ တိုက်ပွဲဖြစ်နေကြတယ်လို့ ဆိုပါတယ်။

ဂန့်ဂေါခရိုင်မှာ တော်လှန်ရေးကာလအတွင်း အကြမ်းဖက်စစ်အုပ်စုတွေနဲ့ ပြောက်ကျားတိုက်ပွဲ ၆ ကြိမ်ဖြစ်ပွားခဲ့ပြီး စစ်ကောင်စီဘက်က ၁၀၀ နီပါးသေဆုံး၊ ၁၀၀ ကျော် ဒဏ်ရာရရှိခဲ့တယ်လို့ ဂန့်ဂေါ PDF တပ်က ပြောပါတယ်။

နှစ်ဘက်တိုက်ပွဲအတွင်းမှာ ဂန့်ဂေါ PDF တပ်ရင်းဘက်က တပ်ဖွဲ့ဝင် ၂ ယောက် ကျဆုံးခဲ့ရပြီး ၅ ယောက် ထိခိုက်ဒဏ်ရာရရှိခဲ့တယ်လို့ ပြောပါတယ်။

ဂန့်ဂေါ PDF တပ်ရင်းအနေနဲ့ မောင်းပြန်သေနတ်တွေနဲ့ ကျည်ဆန်တွေ အများအပြားလိုအပ်သလို ဖောက်ခွဲရေးပစ္စည်းတွေနဲ့ ဆက်သွယ်ရေး စကားပြောစက်တွေလည်း လိုအပ်နေတယ်လို့ ဆိုပါတယ်။

အကြမ်းဖက်စစ်အုပ်စုတွေက ဖုန်းလိုင်း၊ အင်တာနက်လိုင်းတွေဖြတ်တောက်ထားတာကြောင့် ဆက်သွယ်ရေးစကားပြောစက်ရှိမှသာ သတင်းအချက်လက်ရယူရလွယ်ကူမှာဖြစ်သလို ရာသီအကူးကာလမှာ တပ်ဖွဲ့ဝင်တွေ ဖျားနားတဲ့သူများပြားနေပြီး ဆေးဝါး၊ ရိက္ခာ၊ စောင်နဲ့ အနွေးထည်တွေ လိုအပ်နေပြီး ထောက်ပံတဲ့သူလည်း နည်းပါးလာတယ်လို့ပြောပါတယ်။

ဂန့်ဂေါ PDF တပ်ရင်းအနေနဲ့ ပြည်သူတွေအတွက် အသက်ပေးကာကွယ်ကာ တိုက်ပွဲဝင်နေပြီးတော့ ပြည်သူကို ဗဟိုပြုပြီး NUGအစိုးရရဲ့ လမ်းညွှန်ချက်နဲ့အညီဖွဲ့ထားတဲ့ တပ်ရင်းဖြစ်တာကြောင့် ပြည်သူလူထုရဲ့ အထောက်ပံ့ များစွာလိုအပ်ပြီး ထောက်ပံ့ပေးနေတဲ့ ပြည်သူလူထုကိုလည်း ကျေးဇူးတင်တယ်လို့ ဆိုပါတယ်။

မကွေးတိုင်း ဂန့်ဂေါခရိုင်အတွင်းမှာရှိတဲ့ စစ်ကောင်စီရဲ့ ဝန်ထမ်းတွေအနေနဲ့  နိုဝင်ဘာလ ၅ ရက်နေ့ နောက်ဆုံးထားပြီး တာဝန်ကနေ အမြန်ဆုံးနုတ်ထွက်ကြဖို့ ယောဒေသကာကွယ်ရေးတပ်ဖွဲ့ YDF က နိုဝင်ဘာ ၁ ရက်နေ့က သတိပေးထုတ်ပြန်ပါတယ်။

ဂန့်ဂေါ၊ ကျော၊ ထီးလင်း၊ ကျောက်ထုနဲ့ ဆောမြို့နယ်တွေက စစ်ကောင်စီရဲ့ ဒေါက်တိုင် ဌာနဆိုင်ရာ ဝန်ထမ်းတွေအနေနဲ့ အကြမ်းဖက်စစ်ကောင်စီကို အားပေးအားမြှောက်ပြုလုပ်ပြီး ရုံးတက်တာတွေ ရပ်တန့်ကာ နိုဝင်ဘာ ၅ ရက်နေ့ နောက်ဆုံးထားပြီးတော့ အလုပ်လုပ်တဲ့ ရုံးတွေက အမြန်ဆုံးထွက်ကြဖို့ အထူးသတိပေးတယ်လို့ ဆိုပါတယ်။

YDF တပ်ဖွဲ့အနေနဲ့ စစ်အာဏာရှင် အမြစ်ပြတ်ရေးလုပ်ငန်းစဥ်တွေကို အစဥ်တစိုက် လုပ်ဆောင်မှာဖြစ်ပြီး CDM ဝန်ထမ်းတွေကို ကာကွယ်ကာ မိမိကိုကျိုးတစ်ခုတည်းကို ကြည့်ပြီး CDM ဝန်ထမ်းတွေကို ဖိအားပေးနေတဲ့ Non-CDM ဝန်ထမ်းတွေကို အရေးယူတော့မယ်လို့ ကြိုတင်သတိပေးထားပါတယ်။

အကြမ်းဖက်စစ်ကောင်စီအနေနဲ့ မြန်မာ့ပြည်တွင်းရေးကို ဆက်လက်ခြယ်လှယ် လုပ်ကိုင်နိုင် အောင် အားပေးနေတဲ့ သူမှန်သမျှကို အရေးယူတော့မှာဖြစ်ပြီး တစ်နိုင်ငံလုံး လွတ်မြောက်ရေး အတွက် ပါဝင်မှာလား၊ ကိုယ်ကျိုးအတွက် စစ်အုပ်စုကို ပံ့ပိုးမှာလားဆိုတာကို ရန်ငါစည်း ပြတ်သားစွာ ဆုံးဖြတ်ရမယ့် အချိန်ဖြစ်တယ်လို့ သတိပေးထားပါတယ်။

မကွေးတိုင်းဒေသကြီး ထီးလင်းမြို့နယ်မှာတော့ ရပ်ကျေးစာရေး တစ်ယောက်အသတ်ခံရပြီးနောက် ရပ်ကျေးစာရေးတွေ အများအပြား နုတ်ထွက်စာတင်ထားတယ်လို့ ဒေသခံတွေဆီကနေ သိရပါတယ်။

ထီးလင်းမြို့နယ် ဘူးတောင်း၊ အကြည်ဘန်း၊ ညောင်ရွာ၊ နတ်အင်း၊ အိုင်းမ၊ အကြည်ဝါးဘင်း၊ စို့ပြား၊ ဒန့်ဒီး၊ အညာဝါးဘင်းနဲ့ ကြာဥယျာဥ် ကျေးရွာအုပ်စုတွေက ရပ်ကျေးစာရေးတွေ တပြိုင်နက်တည်း နုတ်ထွက်စာတင်ကြတာလို့ ဒေသခံတစ်ယောက်က ပြောပါတယ်။

နုတ်ထွက်စာတင်ထားကြတဲ့ ရပ်ကျေးစာရေးတွေကတော့ ကိုဝေလင်းအောင်၊ ကိုဆန်းဝင်းအောင်၊ ကိုဘိုဘိုအောင်၊ ဒေါ်လှဝေ၊ ကိုဝင်းမင်းပိုင်၊ ကိုဝင်းအောင်၊ ကိုကျော်မျိုးတင့်၊ ကိုတင်နိုင်လင်း၊ ဒေါ်ကြူကြူဝင်းနဲ့ ကိုလှိုင်ဝင်းအောင်တို့ ဖြစ်ပြီး နုတ်ထွက်သူအရေအတွက် ထပ်တိုးလာနိုင်တယ်လို့ ဆိုပါတယ်။

အဲဒီရပ်ကျေးစာရေးတွေဟာ ကျန်းမာရေးအကြောင်းပြသူတစ်ချို့ရှိသလို ဌာနကပေးအပ်တဲ့ လုပ်ငန်းတာဝန်တွေကို ဆက်လက်ထမ်းဆောင်နိုင်ခြင်းမရှိတာကြောင့် နုတ်ထွက်စာတင်ထားတဲ့ စာတွေကို သူတို့ရဲ့ လူမှုကွန်ရက်စာမျက်နှာတွေမှာ ဖော်ပြထားကြတယ်လို့ ပြောပါတယ်။

ထီလင်းမြို့နယ် ကျားခဲကျေးရွာမှာ အောက်တိုဘာလ ၂၉ ရက်နေ့မှာ ဒလန်ရှင်းလင်းရေးအဖွဲ့တွေက ရပ်ကျေးစာရေးတစ်ယောက်နဲ့ ပျူစောထီး ၂ ယောက်ကို သုတ်သင်ရှင်းလင်းပြီးတဲ့နောက်မှာ အခုလို နုတ်ထွက်စာ တင်ထားကြတာလို့ သိရပါတယ်။