မကွေးတိုင်း၊ ဂန့်ဂေါမြို့နယ်က စစ်ကောင်စီလက်အောက်ခံ ဌာနဆိုင်ရာတွေနဲ့ ရဲတပ်ဖွဲ့ဝင်တွေဟာ သူတို့ကို တခြားမြို့နယ်ဆီ ပြောင်းရွှေ့တာဝန်ထမ်း ဆောင်ခွင့်ပေးဖို့ အာဏာသိမ်းစစ်ခေါင်းဆောင်ဆီကို အသနားစာတင်ကြတယ်လို့ ဝန်ထမ်းတွေဆီက သိရပါတယ်။

ဂန့်ဂေါဒေသက ဌာနဆိုင်ရာရုံးတွေနဲ့ နယ်မြေရဲစခန်းတွေဟာ PDF တွေရဲ့ တိုက်ခိုက်မှုကြောင့်  သေဆုံး၊ ဒဏ်ရာရသူတွေ များလာပြီးနောက် ပြောင်းရွေ့ပေးဖို့ အသနားစာတင်ကြသူတွေ များတယ်လို့ ရဲဝန်ထမ်းတစ်ဦးက ပြောပါတယ်။

"ကျနော်တို့ ရဲတပ်ရင်း ၃၅ ဆို အာဏာသိမ်းကတည်းကဒီမှာရောက်နေတာ သူငယ်ချင်းတွေလည်း သေကုန်ပြီ သုံးနှစ်ရှိပြီ အခုထိ ပြောင်းရွှေ့ခွင့်မပေးဘူး။ တချို့ဆို ထွက်ပြေးသွားကြတယ်၊ စာတင်ထားတဲ့သူ အတော်များတယ်"လို့ ပြောပါတယ်။

ကျန်းမာရေး၊ ပညာရေး၊ လဝကနဲ့ ရဲတပ်ရင်းမှ ဝန်ထမ်း ၁၀၀ နီးပါး ပြောင်းရွှေ့ခွင့်ကို ဌာနဆိုင်ရာဝန်ကြီးတွေ၊ ရဲချုပ်နဲ့အာဏာသိမ်းစစ်ခေါင်းဆောင်ဆီကို ပြီးခဲ့တဲ့ ၂၀၂၂ ခုနှစ်ကတည်းက စာတင်ခဲ့တာဖြစ်တယ်လို့ လဝကဝန်ထမ်းတစ်ဦးက ပြောပါတယ်။

"ပြောင်းခွင့်တင်တာ တစ်နှစ်ကျော်ပြီ ဘာလို့လဲဆိုတော့ တစ်ခုခုဖြစ်ရင် ကူသူမဲ့ ကယ်သူမဲ့ဘဝကိုရောက်နေတာ တခါတလေ စစ်တပ်က လေကြောင်းနဲ့ လာပစ်ရင်တောင် ကျမတို့ခေါင်းပေါ်ကို ပစ်ချလိုက်ပါစေလို့ ဆုတောင်းတာမြန်မြန်သေအေးရော"လို့ ပြောပါတယ်။

ဂန့်ဂေါမြို့နယ်အတွင်းရှိ နယ်မြေရဲစခန်းနဲ့ ဌာနဆိုင်ရာရုံးတွေမှာ လုံခြုံရေးယူထားတဲ့ စစ်ကောင်စီတပ်နဲ့ရဲတွေ ဌာနဆိုင်ရာဝန်ထမ်းတွေဟာ ပြောင်းရွှေ့ခွင့်တင်လို့မရတာလို့ ထွက်ပြေးသူတွေလည်းရှိတယ်လို့  ဌာနဆိုင်ရာဝန်ထမ်းတွေဆီက သိရပါတယ်။

မကွေးတိုင်း၊ ဂန့်ဂေါမြို့နယ်မှာ Local PDF စခန်းတခုကို ပကဖက ဝင်ရောက်စီးနင်းခဲ့လို့ အမှန်တရားပေါ်ပေါက်ဖို့နဲ့ တရားမျှတမှုရှိဖို့ Phoenix Defence Battalion-PDB ရဲ့ တပ်ရင်းမှူးက တောင်းဆိုလိုက်ပါတယ်။

ဧပြီ ၂၀ ရက်မှာ  PDBနဲ့ ထောက်ပို့ပြည်သူတွေနဲ့ အစည်းဝေးလုပ်နေတဲ့အချိန်မှာ ဂန့်ဂေါခရိုင် တပ်ရင်း(၁၄)နဲ့ ပကဖ အဖွဲ့တွေက ပစ်ခတ်ဝင်ရောက်စီးနင်းခဲ့ကြတာလို့ ပြောပါတယ်။

ဒီဖြစ်စဥ်မှာ PDB ရဲဘော်တွေနဲ့ ထောက်ပို့အဖွဲ့ဝင် ၃၀ ကျော်လောက်ဖမ်းဆီးခံခဲ့ရပြီး တပ်ရင်းမှူး ကိုဗစ်အပါအဝင် ၃ ယောက်ကတော့ ထွက်ပြေးလွတ်မြောက်ခဲ့ပေမဲ့ လက်နက်ခဲယမ်းတွေနဲ့ ပြည်သူတွေထောက်ပံ့လှူဒါန်းထားတဲ့ ငွေကျပ် သိန်း ၂၀၀ သိမ်းဆည်းခံခဲ့ရတယ်လို့ ဆိုပါတယ်။

PDB တပ်ရင်းမှူး ကိုဗစ်က “ကျနော်တို့ဆီကိုတော့ ပြဿနာရှိတဲ့အကြောင်းကို ဖုန်းဆက်အကြောင်းကြားထားတာလည်းမရှိဘူး။ စာထုတ်ထားတာလည်းမရှိဘူးဗျ။ ရုတ်တရက်ဝင်ရောက်စီးနင်းပြီး ပစ်ခတ်ခံလိုက်ရမှ ကျနော်တို့ ပြေးလိုက်ရတာ။ ကျနော်တို့ တော်လှန်ရေးတပ်ဖွဲ့တွေမှာ မှားယွင်းတာမျိုးရှိတယ်ဆိုရင်၊ တိုင်ကြားထားတာမျိုးရှိတယ်ဆိုရင် ပထမအဆင့် ဖုန်းဆက်ပြီးဖြစ်ဖြစ် စာပို့ပြီးဖြစ်ဖြစ်ခေါ်စေချင်တယ်။ အဲလိုခေါ်လို့မှမလာဘူးဆိုမှသာ ဒီလိုဝင်စီးတာမျိုးလုပ်သင့်တယ်လို့ ဆိုပါတယ်။ သက်ဆိုင်ရာပအဖ ခေါင်းဆောင်တွေကို ဆက်သွယ်မေးမြန်းရာမှာ အရေးပေါ်ဝင်ရောက်ဖမ်းဆီးလိုက်ရတာလို့ အကြောင်းပြန်တယ်။ ကျနော်တို့ ပြဿနာတွေရှိရင် ဒေသတွင်းက အဖွဲ့စည်းပေါင်းစုံရဲ့ရှေ့မှာ စစ်ဆေးခံပြီး ပေးတဲ့အပြစ်ကို ခံယူဖို့ပြောပေမဲ့သူတို့ ဘက်ကလက်မခံဘဲ ကျန်တဲ့အဖွဲ့စည်းတွေကို အသိမပေးဘဲ ရှင်းချင်တယ်”လို့ ပြောပါတယ်။

ဒေသခံ Local အဖွဲ့ဆိုပေမယ့် NUG ရဲ့လက်အောက်ခံအဖွဲ့အဖြစ်နဲ့ ရပ်တည်ဖို့အတွက် တိုင်းအဆင့်ထိသွားရောက်ပြီး စာတင်ထားကြောင်းနဲ့ ကစတွေ၊ ပျူတွေ၊ ရဲတွေ၊ ဒလန်တွေနဲ့ ပူးပေါင်းလုပ်ဆောင်တာ လုံးဝမလုပ်ပဲ တော်လှန်ရေးပြီးတဲ့အထိ ဖြူစင်ရိုးသားစွာနဲ့ ကြိုးစားသွားမယ်လို့ဆိုပါတယ်။

ဘာကြောင့်ဝင်ရောက်စီနင်း ဖမ်းဆီးတယ်ဆိုတာကို မသိရှိရသေးဘဲ ဖမ်းဆီးခံရတဲ့အထဲ PDFရဲဘော်တွေ၊ ထောက်ပို့အဖွဲ့တွေ၊ ကလေးသူငယ်တွေပါဝင်နေပြီး မှားတာ ရှိရင် အပြစ်ဒဏ်ကိုခံယူဖို့ အသင့်ဖြစ်သလို မှန်ရင်လည်း ဖမ်းဆီးသွားတဲ့သူတွေကို ပြန်လွှတ်ပေးကာ သိမ်းဆည်းခံခဲ့ရတဲ့ လက်နက်ခဲယမ်းတွေနဲ့ ပျက်စီးဆုံးရှုံးမှုတွေ ပြန်ပေးဖို့ ကိုဗစ်က ပြောပါတယ်။

ဂန့်ဂေါမြို့နယ် ပြည်သူ့အုပ်ချုပ်ရေးအဖွဲ့ (ပအဖ) တာဝန်ရှိသူတယောက်ကတော့ ဒီကိစ္စတွေအားလုံးကို ဝန်ကြီးဌာနကို တင်ပြထားပြီး ပြောရေးဆိုခွင့်မရှိတာကြောင့် ဝန်ကြီးဌာနကို တိုက်ရိုက်ဆက်သွယ်မေးမြန်းဖို့ ပြောပါတယ်။

NUG ကာကွယ်ရေးဝန်ကြီးဌာနရဲ့ အမြဲတမ်း အတွင်းဝန် ဦးနိုင်ထူးအောင်က “ကျနော်တို့ဆီကိုတော့ ဒီဟာနဲ့ပတ်သက်ပြီးတော့ သတင်းရောက်ရှိခြင်းမရှိသေးပါဘူး။ ကျနော်တို့ စုံစမ်းမှု ဆက်လုပ်သွားပါမယ်လို့"ပြောပါတယ်။

PDB ဒေသကာကွယ်ရေးတပ်ဖွဲ့ဟာ ပကဖတွေ ပအဖအဖွဲ့တွေ မဖွဲ့ခင်ကတည်းက စစ်ကောင်စီရဲ့ ယာဥ်တန်းတွေကို မိုင်းဆွဲတိုက်ခိုက်ကာ တော်လှန်ခဲ့တဲ့ အဖွဲ့စည်းတခုဖြစ်ပြီး နောက်ပိုင်းမှာ ယောကာကွယ်ရေးတပ်-YDF ရဲ့တပ်ရင်းတခုအဖြစ်ရပ်တည်ခဲ့ကာ YDF တပ်ရင်းကနေ နုတ်ထွက်ခဲ့ပြီး သီးခြားရပ်တည်နေတဲ့ တော်လှန်ရေးတပ်ဖွဲ့ဖြစ်ပါတယ်။