ရောဂါကပ်ဘေးကြောင့် ကလေးတွေကာကွယ်ဆေး ပုံမှန်ထိုးနှံတဲ့နှုန်း ကျဆင်းလာတာကနေ ဆေးထိုးနှုန်းပြန်တက်လာအောင်လုပ်ဖို့ ကမ္ဘာ့ကျန်းမာရေးအဖွဲ့ကြီး (WHO) က ဘီလ်အန် မလင်ဒါဂိတ်စ် ဖောင်ဒေးရှင်းနဲ့ တခြား အကျိုးအမြတ်မယူတဲ့ အဖွဲ့အစည်းတွေ၊ အေဂျင်စီတွေနဲ့ လက်တွဲ ဆောင်ရွက်နေတယ်လို့ ရိုက်တာသတင်းဌာနက ထုတ်ပြန်ပါတယ်။
WHO, UNICEF, the GAVI ကာကွယ်ဆေးထိုးနှံရေး မဟာမိတ် ၃ ဖွဲ့နဲ့ ဘီလ်အန် မလင်ဒါဂိတ်စ် ဖောင်ဒေးရှင်းတို့ရဲ့ ကနဦးခြေလှမ်းကို ဧပြီ ၂၄ ရက်မှာ စတင်ခဲ့တာပါ။
ဝက်သက်နဲ့ အသားဝါဖျားရောဂါလို ကာကွယ်ဆေးနဲ့ ဟန့်တားနိုင်တဲ့ ရောဂါကူးစက်မှုတွေကနေ ကာကွယ်ဖို့ ကြိုးစားနေကြပါတယ်။
၂၀၂၁ ခုနှစ်တည်းက ကာကွယ်ဆေးမထိုးရတဲ့ ကလေး ၇၅ ရာခိုင်နှန်းရှိနေတဲ့ နိုင်ငံ ၂၀ မှာ ကာကွယ်ဆေးထိုးနှုန်း တိုးမြှင့်ဖို့ အာရုံစိုက် အားထုတ်နေတာပါ။
ကိုဗစ်-၁၉ ကပ်ဘေးအတွင်း ဆေးထိုးအပ်နဲ့ တခြား ဆေးဘက်အထောက်အပံ့တွေ သယ်ယူပို့ဆောင်ရေး အနှောင့်အယှက် ဖြစ်ခဲ့သလို အသွားအလာ ပိတ်ဆို့ကန့်သတ်ချက်တွေနဲ့ ဆေးရုံဆေးခန်းတွေမှာ ဝန်ပိနေတာတွေကြောင့် ကလေးတွေရဲ့ ကာကွယ်ဆေးထိုးနှုန်း ကျဆင်းခဲ့ပါတယ်။
၂၀၂၁ ခုနှစ်မှာ အသက်တနှစ်အောက် ကလေး ၂၅ သန်းဟာ အခြေခံကာကွယ်ဆေးတွေ မထိုးခဲ့ရဘဲ တကမ္ဘာလုံး ကလေးတွေ ကာကွယ်ဆေး ထိုးနှုန်းဟာလည်း ၅ ရာခိုင်နှုန်း ကျဆင်းပြီး ၈၁ ရာခိုင်နှုန်းဆီ ရောက်ခဲ့တယ်လို့ WHO က ပြောပါတယ်။
ကမ္ဘာ့ဖွံ့ဖြိုးတိုးတက်ရေးဘဏ်တွေဟာ ဆင်းရဲတဲ့နိုင်ငံတွေမှာ ရာသီဥတုပြောင်းလဲမှုရဲ့ သက်ရောက်မှုတွေကို လိုက်လျောညီထွေဖြစ်အောင် ဦးစားပေးလုပ်ဆောင်ဖို့ လိုတယ်လို့ ဘီလ် အန် မယ်လင်ဒါဂိတ်စ် ဖောင်ဒေးရှင်းရဲ့ အမှုဆောင်အရာရှိချုပ် မာ့ခ် ဆက်ဇ်မဲန်းက ရိုက်တာသတင်းဌာနကို ပြောခဲ့ပါတယ်။
အီဂျစ်နိုင်ငံ၊ ရှမ်အယ်လ်ရှိတ်မြို့မှာ ကျင်းပနေတဲ့ COP27 ရာသီဥတုဆိုင်ရာ ဆွေးနွေးပွဲရဲ့ ဆက်စပ်အစည်းအဝေးမှာ မာ့ခ် ဆက်ဇ်မဲန်းက ပြောလိုက်တာပါ။
လိုက်လျောညီထွေဖြစ်အောင်နေတဲ့ ဘဏ္ဍာရေးကဏ္ဍမှာ ရင်းနှီးမြှုပ်နှံမှုတွေ တိုးလာပေမဲ့ လိုအပ်တာထက် နည်းပါးနေသေးတယ်လို့လည်း သူက ပြောပါတယ်။
လိုက်လျောညီထွေဖြစ်ရေး ခေါင်းစဉ်ကို နိုဝင်ဘာ ၈ ရက်နေ့ကျင်းပတဲ့ ညီလာခံရဲ့ အဓိက အကြောင်းအရာအဖြစ် သတ်မှတ်ထားပါတယ်။
ဖောင်ဒေးရှင်းဟာ အသေးစား တောင်သူလယ်သမားတွေ ရာသီဥတုဘေးကို ပိုမိုခံနိုင်ရည် ရှိလာစေရေး ကူညီပေးဖို့ ဒေါ်လာ ၁ ဒသမ ၄ ဘီလီယံ ကတိပြုခဲ့ပါတယ်။ ဒါဟာ အခုအချိန်အထိ လိုက်လျောညီထွေဖြစ်စေရေး အကြီးမားဆုံး ပံ့ပိုးကူညီမှုဖြစ်ခဲ့ပါတယ်။
ကမ္ဘာ့အကြီးဆုံး ဘက်စုံဖွံ့ဖြိုးတိုးတက်ရေးဘဏ် MDBs တွေဟာ ဆင်းရဲနွမ်းပါးတဲ့နိုင်ငံတွေ အတွက် ၂၀၂၁ ခုနှစ်မှာ လိုက်လျောညီထွေဖြစ်တဲ့ ဘဏ္ဍာငွေအတွက် ဒေါ်လာ ၁၇ ဘီလီယံ သုံးစွဲခဲ့တယ်လို့ ငွေချေးသူတွေရဲ့ မကြာသေးမီက အစီရင်ခံစာထဲမှာ ဖော်ပြထားပါတယ်။
ယူကရိန်းပဋိပက္ခကြောင့် ကမ္ဘာလုံးဆိုင်ရာ စွမ်းအင်နဲ့ စားနပ်ရိက္ခာဖူလုံမှု အကျပ်အတည်းတွေ၊ ရာသီဥတုဖောက်ပြန်မှုတွေ ပိုဆိုးလာလို့ ကမ္ဘာ့ဘဏ်လို MDBs တွေ စုပေါင်းပြီး ဝင်ငွေနည်းတဲ့ အလယ်အလတ်နိုင်ငံတွေအတွက် ဘဏ္ဍာငွေ အများဆုံးပံ့ပိုးမှုတွေ ပိုလုပ်ဖို့လိုတယ်လို့ ဆက်ဇ်မဲန်းက ပြောခဲ့ပါတယ်။
