မနေ့ညကကန်သွားတဲ့ ပရီးမီးယားလိဂ်ပွဲစဉ်မှာ လိဒ်ယူနိုက်တက်အသင်းကို ၃ ဂိုးပြတ်ရှုံးနိမ့်ခဲ့ရာမှာ ကစားသမားတွေရဲ့ တဦးချင်းအမှားတွေကို နည်းပြတူချယ်က ပြစ်တင်ဝေဖန်လိုက်ပါတယ်။
ချဲလ်ဆီးအသင်း ပေးလိုက်ရတဲ့ ဦးဆောင်ဂိုးဟာ ဂိုးသမားမန်ဒီရဲ့ ကြီးမားတဲ့ အမှားကြောင့်ဖြစ်ပြီး လက်ကျန်သွင်းဂိုးတွေမှာလည်း အသင်းသားတွေရဲ့ အပြစ်မကင်းခဲ့တာကို နည်းပြတူချယ်က ပွဲအပြီးမှာ ဝေဖန်ပြစ်တင်သွားတာပါ။
မိမိတို့အသင်းဟာ ကြီးမားလှတဲ့ တဦးချင်းအမှားတွေကို မကြာခဏ ကျူးလွန်နေပြီး ဒီအချက်က ပွဲရဲ့အဖြေဖြစ်စေခဲ့ကြောင်း နည်းပြကပြောပါတယ်။
ဒါ့အပြင် လူစာရင်းကို ပိုကောင်းလာဖို့ ကြိုးစားရမှာဖြစ်ပြီး အဲဒီလိုမလုပ်နိုင်ခဲ့ရင်တော့ ရှိတဲ့လူအင်အားနဲ့ တိုက်ပွဲဝင်သွားရမှာ ဖြစ်ကြောင်းလည်းပြောပါတယ်။
တူချယ်ဟာ လက်စတာနောက်ခံလူ ဖိုဖန်နာကို အလိုရှိနေသလို တိုက်စစ်မှူးနေရာအတွက် ဘာစီလိုနာက အူဘာမီယန်းကိုခေါ်ယူဖို့ တောင်းဆိုထားပါတယ်။
