ကစားသမားဘဝကနေ အနားမယူခင်မှာ အမေရိကနဲ့ မက္ကဆီကိုလိဂ်တစ်ခုခုမှာ ကစားချင်သေးတယ်လို့ အီတလီဂိုးသမားကြီး ဘက်ဖွန်က ပြောပါတယ်။
လာမယ့် ဇန်နဝါရီမှာ အသက် ၄၄ နှစ်ပြည့်တော့မယ့် ဘက်ဖွန်ဟာ လက်ရှိအချိန်မှာ ကစားသမားဘဝ စတင်ခဲ့တဲ့ ပါးမားအသင်းမှာ ကစားနေဆဲ ဖြစ်ပါတယ်။
စီးရီးဘီပွဲစဉ် ၁၈ ပွဲကစားထားပြီး ၆ ပွဲ ဂိုးမပေးရအောင် စွမ်းဆောင်ထားတဲ့ ဘက်ဖွန်ဟာ အသက် ၄၄ နှစ်ကျော်တဲ့အထိ အနားယူဖို့စိတ်ကူးမရှိသေးတာပါ။
“ချန်ပီယံလိဂ်ဖလားရခဲ့မယ်ဆိုရင်တော့ ကျနော်တို့ အနားယူပြီးနေပါပြီ။ ခုတော့ အနားမယူချင်သေးလို့ မက္ကဆီကို ဒါမှမဟုတ် အမေရိကမှာ ကစားချင်သေးတယ်။ ဘာတွေဖြစ်လာမလဲဆိုတာတော့ မသိနိုင်သေးပါဘူး”လို့ ဘက်ဖွန်က ပြောပါတယ်။
အနာဂတ်မှာ အသင်းမန်နေဂျာ သို့မဟုတ် နည်းပြလုပ်ဖို့ အစီအစဉ်လည်း မရှိသေးဘဲ ခြေစွမ်းတိုးတက်လာအောင်ဆက်ပြီး ကြိုးစားသွားချင်သေးတယ်လို့ ဘက်ဖွန်က ပြောပါတယ်။
ဘက်ဖွန်ဟာ ဂျူဗင်တပ်စ်ကနေ ပီအက်စ်ဂျီအသင်းဆီ တစ်ရာသီကြာ ပြောင်းရွှေ့ကစားခဲ့ပြီး ပြီးခဲ့တဲ့ နှစ်က ဂျူဗင်တပ်စ်အသင်းဆီ ပြန်လည်ပြောင်းရွှေ့လာခဲ့ပြီး ၂၉ ပွဲကစားခဲ့ပါသေးတယ်။
