မန်ယူအသင်းနဲ့ ကစားရမယ့် အက်ဖ်အေဖလားဆီမီးဖိုင်နယ်ပွဲစဉ်ဟာ စိတ်လှုပ်ရှားစရာကောင်းပြီး ဂုဏ်ယူစွာနဲ့ ယှဉ်ပြိုင်သွားမယ်လို့ ဘရိုက်တန်နည်းပြ ဒီဇာဘီက ပြောပါတယ်။
အက်ဖ်အေဖလားပွဲစဉ်ဟာ အင်္ဂလန်မှာ အရေးပါတဲ့ပြိုင်ပွဲဖြစ်ပြီး ဘရိုက်တန်အသင်းအနေနဲ့ ပိုကောင်းတဲ့အသင်းဖြစ်ချင်တယ်ဆိုရင် ဒီလိုပွဲကြီးပွဲကောင်းတွေ ယှဉ်ပြိုင်ကစားရမှာဖြစ်တယ်လို့ နည်းပြက ပြောပါတယ်။
ဘရိုက်တန်နည်းပြဒီဇာဘီက “ကျနော်တို့အသင်းက ဖိအားတွေနဲ့ အသားကျနေပါပြီ။ ဒီလိုပွဲကစားရတာဟာ ဂုဏ်ယူစရာကောင်းပြီး ကျနော့် ကစားသမားတွေအပေါ် သံသယဖြစ်စရာမရှိပါဘူး။ မန်ချက်စတာယူနိုက်တက်အသင်းက ယူကေမှာ အကောင်းဆုံး အသင်းတစ်သင်းဖြစ်တယ်။ ပိုကောင်းတဲ့အသင်း ဖြစ်ချင်တယ်ဆိုရင် ဒီလိုပွဲစဉ်မျိုးကစားရမှာပါပဲ” လို့ ပြောပါတယ်။
မန်ယူနည်းပြတန်ဟတ်ဂ်ကတော့ ဘရိုက်တန်က ခက်ခဲတဲ့အသင်းဖြစ်ပြီး အနိုင်ယူဖို့ဆိုရင် အကောင်းဆုံးခြေစွမ်း ရဖို့လိုအပ်ကြောင်း၊ ယူနိုက်တက်အသင်းအနေနဲ့ ပိုကောင်းတဲ့အရာတွေကို လုပ်နိုင်စွမ်းရှိတယ်လို့ ယုံကြည်ကြောင်းပြောသွားပါတယ်။
