ရေစက်မကုန်လို့ ပြန်ဆုံကြတဲ့ အချစ်ဇာတ်လမ်းတပုဒ်အဖြစ် လူပြောများနေတဲ့ အဆိုတော် ဂျနီဖာ လိုပက်ဇ်နဲ့ သရုပ်ဆောင် ဘန်းအဖလက်ခ်တို့ လက်စ်ဗီးဂတ်စ်မှာ ထိမ်းမြားလက်ထပ်စာချုပ် ထုတ်ယူသွားတာ မှန်ကန်တဲ့အကြောင်း ဒေသအရာရှိတယောက်က ဇူလိုင် ၁၇ ရက်မှာ အတည်ပြုပါတယ်။
ကလာ့ခ်ကောင်တီစီရင်စုနယ်မြေရုံးမှာ လက်ထပ်စာချုပ် ဇူလိုင် ၁၆ ရက်က လာယူသွားတဲ့အကြောင်း နယ်မြေစာရေးရုံးက အွန်လိုင်းပေါ်မှာ အထောက်အထားတွေနဲ့ တကွ အသိပေးထားပါတယ်။
လွန်ခဲ့တဲ့ နှစ် ၂၀ က တွဲခဲ့ဖူးတဲ့ သူတို့ နှစ်ယောက် တရားဝင် လက်ထပ်စာချုပ် ချုပ်ပြီးပြီးလား ဆိုတာကတော့ လောလောဆယ်မှာ မသိရသေးပါဘူး။
အနုပညာရှင်တွေရဲ့ အတွင်းသတင်းတွေကို အသားပေးဖော်ပြတဲ့ TMZ ဝက်ဆိုက်နဲ့ People မဂ္ဂဇင်အပါအဝင် တခြားမီဒီယာတွေမှာတော့ သူတို့ နှစ်ယောက် တရားဝင် လက်ထပ်လိုက်ကြပြီ လို့ ရေးသားဖော်ပြနေကြပါတယ်။
ဘန်နီဖာ "Bennifer" လို့ နာမည်တွင်တဲ့ စုံတွဲဟာ နှစ်ပေါင်း ၂၀ ကြာအောင် ကိုယ့်လမ်း ကိုယ်လျှောက်ခဲ့ကြပြီးမှ မနှစ်က ပြန်တွဲခဲ့ကြပြီး ဒီနှစ် ဧပြီလမှာ စေ့စပ်ခဲ့ကြတာ ဖြစ်ပါတယ်။
၂၀၀၂ ခုနှစ်တုန်းက ဘန်းက ဂျနီဖာအတွက် ၆ ကာရတ် ကျော်တဲ့ ပန်းရောင် စိန်လက်စွပ်တကွင်းကို စေ့စပ်လက်စွပ်အဖြစ် ပေးခဲ့ပါတယ်။
ဒါပေမဲ့ ၂၀၀၃ ခုနှစ်မှာ မင်္ဂလာဆောင်ဖို့ သူတို့ အစီအစဉ်ကို ရုတ်တရတ် ဖျက်သိမ်းခဲ့ကြပြီး လပိုင်းအကြာမှာတော့ သူတို့ နှစ်ယောက် လမ်းခွဲခဲ့ကြပါတယ်။
