ဂျပန်နိုင်ငံခြားရေးဝန်ကြီး ယိုရှီမာဆာ ဟာယာရှီဟာ ဂျပန်ဆေးဝါးကုမ္ပဏီဝန်ထမ်းတဦးကို ဖမ်းဆီးထိန်းသိမ်းမှုအပါအဝင် တခြားကိစ္စရပ်တွေကိုပါ ဆွေးနွေးနိုင်ဖို့အတွက်  တရုတ်နိုင်ငံ ပေကျင်းမြို့ကို ၂ ရက်ကြာ သွားရောက်မယ်လို့ မတ်လ ၃၁ ရက်က အတည်ပြုပြောပါတယ်။

တရုတ်နိုင်ငံရဲ့ အဆင့်မြင့်ချစ်ပ်ပြားထုတ်လုပ်နိုင်စွမ်းကို အဟန့်အတားဖြစ်အောင် ဂျပန်အစိုးရက အမေရိကန်နဲ့ တွန်းအားပေးမှုနဲ့အတူ တပိုင်းလျှပ်ကူးပစ္စည်း ထုတ်လုပ်ရေးဆိုင်ရာ ပို့ကုန် ၂၃ မျိုးအပေါ်ကန့်သတ်မယ့်အစီအစဉ်တွေကို ကြေညာခဲ့ပြီးနောက် ဒီခရီးစဉ် ထွက်ပေါ်လာခဲ့တာဖြစ်ပြီး ဧပြီ ၁ ရက်နေ့မှာ ဒီခရီးစဉ် စတင်မှာပါ။

အက်စ်တဲလက်စ်ဆေးကုမ္ပဏီဝန်ထမ်းကိစ္စအပြင် ယိုယွင်းပျက်စီးနေတဲ့ ဖူကူရှီးမား ဒိုင်အီချီ နျူးကလီးယား ဓာတ်အားပေးစက်ရုံက စွန့်ပစ်ရေတွေကို ပင်လယ်ထဲလွှတ်ချခဲ့ခြင်း ရှိ၊ မရှိ မေးမြန်းရာမှာ ဟာယာရှီက “ကျနော့်ရဲ့ တရုတ်နိုင်ငံခရီးစဉ်အတွင်း ဒီကိစ္စတွေနဲ့အတူ တခြားပြဿနာများစွာအတွက် ဂျပန်နိုင်ငံရဲ့ ရပ်တည်ချက်အပေါ် ရှင်းလင်းအောင် လုပ်ဆောင်ဖို့ စီစဉ်ထားပါတယ်” လို့ ဖြေဆိုပါတယ်။

တရုတ်နိုင်ငံမှာ အက်စ်တဲလက်စ်ကုမ္ပဏီက အလုပ်ခန့်ထားတဲ့ ဂျပန်အမျိုးသားတဦးဟာ အကြောင်းရင်းမသိရဘဲ ဖမ်းဆီးထိန်းသိမ်းခံထားရတာဖြစ်ကြောင်း မတ်လ ၂၆ ရက်မှာ ကုမ္ပဏီရဲ့ ပြောရေးဆိုခွင့်ရှိသူတဦးက ရိုက်တာသတင်းဌာနကို ပြောပါတယ်။

တရုတ်အာဏာပိုင်တွေအနေနဲ့ ဒီအမျိုးသားကို ပြန်လွှတ်ပေးဖို့ ဂျပန်အစိုးရဘက်က တောင်းဆိုထားတယ်လို့လည်း သတင်းမီဒီယာတွေမှာ ဖော်ပြထားပါတယ်။

ကချင်ပြည်နယ်၊ ဖားကန့်မြို့နယ်မှာ ကေအိုင်အေရဲ့ နှစ်ပတ်လည် တေးဂီတဖျော်ဖြေပွဲကို စစ်ကောင်စီက တိုက်လေယာဉ်တွေနဲ့ ဗုံးကြဲတိုက်ခိုက်ခဲ့လို့  အရပ်သား ပြည်သူတွေ သေဆုံးထိခိုက်ဒဏ်ရာရခဲ့တဲ့ လုပ်ရပ်အပေါ် ဂျပန်နိုင်ငံခြားရေးဝန်ကြီး ယိုရှီမာဆာဟာယာရှီက ရှုတ်ချကန့်ကွက်လိုက်ပြီး အကြမ်းဖက်မှုတွေချက်ချင်းရပ်ဖို့  စစ်အာဏာရှင်ကို တောင်းဆိုပါတယ်။ 

အောက်တိုဘာ ၂၅ ရက် ဒီကနေ့ ပြုလုပ်တဲ့ ပုံမှန်သတင်းစာ ရှင်းလင်းပွဲမှာ ဂျပန်နိုင်ငံခြားရေးဝန်ကြီးက ခုလိုပြောလိုက်တာဖြစ်ပြီး ဂျပန်နိုင်ငံအနေနဲ့ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်က စတင်ကာ စစ်အာဏာသိမ်းပြီးချိန်ကတည်းက အကြမ်းဖက်မှုတွေ ရပ်တန့်ဖို့ အစဉ်တစိုက် တောင်းဆိုလာတဲ့ကြားက ခုလို ဒေသခံပြည်သူအမြောက်အမြားထိခိုက်သေဆုံးရတဲ့ ဖြစ်စဉ်မျိုး ပေါ်ပေါက်လာရတဲ့အတွက် အထူးပင် စိုးရိမ်ပူပန်မိတယ်လို့ ဆိုပါတယ်။

ဒါကြောင့်မို့ ဂျပန်အစိုးရအနေနဲ့ အခြေအနေတွေ ပြေလည်စေဖို့ ဦးတည်ပြီး ဆက်လက်ပြီးတော့ ပြည်သူလူထုအပေါ် အကြမ်းဖက်လုပ်ရပ်တွေကို ချက်ချင်းရပ်ဆိုင်းဖို့၊ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် ထိန်းသိမ်းခံထားရတဲ့ ပုဂ္ဂိုလ်တွေကို ပြန်လွှတ်ပေးဖို့၊ ဒီမိုကရေစီနည်းလမ်းကျတဲ့ နိုင်ငံရေးစနစ် အမြန်ဆုံး ပြန်လည်ရရှိစေရေး လက်တွေ့ကျတဲ့ လုပ်ငန်းစဉ်တွေကို ဖော်ဆောင်သွားဖို့ လည်း မြန်မာစစ်အုပ်စုကို တိုက်တွန်းထားတာပါ။

ဒါ့အပြင် အာဆီယံရဲ့ ဘုံသဘောတူညီချက် ၅ ချက် ကိုလည်း အမြန်ဆုံး အကောင်အထည်ဖော် ဆောင်ရွက်ဖို့  အကြမ်းဖက်စစ်ကောင်စီအဖွဲ့ကို တိုက်တွန်းလိုက်ပါတယ်။

အောက်တိုဘာ ၂၃ ရက်ညက ကေအိုင်အေ တပ်မဟာ ၉ နယ်မြေ အနန့်ပါကျေးရွာမှာ   ကေအိုင်အိုရဲ့ ၆၂ နှစ်ပြည့်နေ့အထိမ်းအမှတ်အကြိုနေ့ တေးဂီတဖျော်ဖြေပွဲကျင်းပချိန်   စစ်ကောင်စီတပ်က ဂျက်တိုက်လေယာဉ် ၃ စီးနဲ့ လာရောက် ဗုံးကြဲတိုက်ခိုက်ခဲ့တာ ဖြစ်ပါတယ်။

လေကြောင်းတိုက်ခိုက်မှုကြောင့် ကချင်အနုပညာရှင်တွေ၊ ကချင်ဒေသခံလူကြီးတွေ၊ စီးပွားရေးလုပ်ငန်းရှင်တွေနဲ့  ကေအိုင်အေ အရာရှိနဲ့ တပ်ဖွဲ့ဝင်တွေအပါအဝင်  အနည်းဆုံး ပြည်သူ ၅၀ လောက် ထိခိုက်သေဆုံးခဲ့ပြီး ရာနဲ့ချီ ဒဏ်ရာရခဲ့တာ ဖြစ်ပါတယ်။

အဆိုပါ လေကြောင်းဗုံးကြဲတိုက်ခိုက်မှုနဲ့ပတ်သက်ပြီး အလွန်အမင်း စိုးရိမ်ပြီး ဝမ်းနည်းရတဲ့ အကြောင်း ကုလသမဂ္ဂ၊ ဥရောပသမဂ္ဂ (အီးယူ) နဲ့ အမေရိကန်အပါအဝင် နိုင်ငံတကာအသိုက်အဝန်းက ထုတ်ပြန်လိုက်ပြီး စစ်အာဏာရှင်အနေနဲ့ တာဝန်ယူ တာဝန်ခံရမယ်လို့ ဆိုပါတယ်။