ဂျပန်နိုင်ငံက ထိပ်တန်းနာမည်ကြီးတက္ကသိုလ်တွေဖြစ်တဲ့ Meiji University နဲ့ Sophia University တို့မှ ကျောင်းသားကျောင်းသူတွေက မြန်မာလူငယ်များအဖွဲ့နဲ့ ပူးပေါင်းပြီး စစ်ဘေးရှောင် တိုင်းရင်းသားပြည်သူတွေအတွက်  တိုကျိုမြို့ရဲ့ လူစည်ကားရာ ဂျီယူဂအိုခ ဘူတာရှေ့မှာ ဇူလိုင် ၃၁ ရက်က အလှူငွေကောက်ခံခဲ့ကြပါတယ်။

မြန်မာပြည်သူတွေ စစ်ကောင်စီလက်အောက်မှာ နေ့စဉ် အကြမ်းဖက် သတ်ဖြတ်ခံနေရပြီး ဒုက္ခရောက်နေရတာတွေ ကြားသိရလို့ အခုလို လာရောက်ပူးပေါင်းခဲ့တာပါလို့ မေဂျီတက္ကသိုလ်မှ တတိယနှစ်ကျောင်းသားတဦးက ဒီဗွီဘီကို ပြောပါတယ်။

မအင်ကြင်း လို့ မြန်မာအမည်ခံယူထားသူ Sophia တက္ကသိုလ်မှကျောင်းသူတဦးကလည်း “မြန်မာပြည်သူတွေ အားတင်းထားပါ။ မိမိတဦးတည်း မဟုတ်ကြပါဘူး၊ အားမလျော့ကြပါနဲ့ စစ်အာဏာရှင် လက်အောက်မှ လွတ်မြောက်အောင် ကမ္ဘာ့ပြည်သူတွေနဲ့အတူ ပူးပေါင်းတွန်းလှန်ကြရအောင်”လို့လည်း မြန်မာပြည်သူတွေကို သတင်းစကားပါးလိုက်ပါသေးတယ်။

မြန်မာလူငယ်အဖွဲ့မှ မသိရီသစ္စာက “မြန်မာနိုင်ငံကို မမေ့လျော့ပါဘူးလို့ အဓိပ္ပာယ်ရတဲ့ ဆိုင်းဘုတ်ကို ကိုင်စွဲပြီး မြန်မာလူငယ်အဖွဲ့နဲ့ ပူးပေါင်းအလှူငွေကောက်ခံခဲ့တာ  ယန်း ၃ သိန်းနီးပါး (မြန်မာငွေ ကျပ်သိန်း ၅၀ ခန့် ကောက်ခံရရှိကာ) ရရှိခဲ့တယ်။ အလှူငွေတွေ အားလုံးကို NUG အသိအမှတ်ပြုထားတဲ့ မှန်ကန်တဲ့ အဖွဲ့အစည်းတွေကနေတဆင့် ကရင်နီဒေသသို့ ပေးပို့လှူဒါန်းသွားမှာ ဖြစ်ပါတယ်”လို့ ဒီဗွီဘီကို ပြောပါတယ်။

ဂျပန်ရောက်မြန်မာနိုင်ငံသားတွေဟာ အကြမ်းဖက်စစ်ကောင်စီအောက်က လွတ်မြောက်ရေး လှုပ်ရှားမှုတွေကို ပုံစံအမျိုးအမျိုးနဲ့ ဆောင်ရွက်နေကြသလို  စစ်ဘေးရှောင်ဒုက္ခသည်တွေအပြင် မြန်မာပြည်သူတွေအတွက် လူစည်ကားရာနေရာတွေမှာ အလှူငွေကောက်ခံနေကြတာ ဖြစ်ပါတယ်။

ဂျပန်နိုင်ငံရောက် မြန်မာတွေကြားမှာ  ကိုဗစ်-၁၉ ရောဂါကူးစက်မှုမြင့်တက်နေပြီး တိုကျိုမြို့နေ အသက် ၅၄ နှစ်အရွယ် မြန်မာအမျိုးသား တစ်ဦး ဩဂုတ် ၂၈ ရက်က ဆေးရုံတခုမှာ ဆေးကုသမှုခံယူရင်း အဆုတ်ပျက်စီးကာ ကွယ်လွန်သွားပါတယ်။

သေဆုံးသူဟာ တိုကျိုမြို့က မြန်မာနိုင်ငံသား အများအပြားနေထိုင်ရာ အိုစုခမြို့မှာ နေထိုင်ကာ သူဟာကာကွယ်ဆေးလည်းမထိုးရသေးကြောင်းနဲ့ ကိုရိုနာဗိုင်းရပ်စ် ကူးစက်ခံသူ ဂျပန်ရောက်မြန်မာတွေအကြား ပထမဆုံးသေဆုံးမှုလည်း ဖြစ်ပါတယ်။ 

အလားတူ မြန်မာအများဆုံးနေထိုင်တဲ့ တခဒနော့ဘဘမှာလည်း အုပ်စုလိုက် ရောဂါကူး စက်မှု တွေရှိပါတယ်။ 

ကိုဗစ်ကူးစက်ခံ အမျိုးသားတစ်ဦးရဲ့ ဇနီးက “ ဆေးရုံတွေ လက်ခံနိုင်မှု အင်အားမမျှလို့ ထင်တယ် အမျိုးသားကို ဆေးရုံတက်စဉ် ၅၀ ရာခိုင်နှုန်းသာ မျှော်လင့်ချက်ရှိကြောင်း ပြောပေမဲ့ တပတ်နဲ့ ဆေးရုံက ဆင်းစေကာ အိမ်မှာပဲပြန်နေစေတယ်”လို့   ပြောပါတယ်။

အုပ်စုလိုက် ကိုရိုနာဗိုင်းရပ်စ် ကူးစက်မှုတွေကို တိုကျိုသာမက ဂွန်းမား၊ စိုင်တမ၊ အိုဆာကာ စတဲ့နေရာတွေမှာပါ ဂျပန်ရောက်မြန်မာနိုင်ငံသားတွေ ကူးစက်ခံနေရသူ ရာချီရှိနေပါတယ်။

အုပ်စုလိုက်စားသောက်မှု၊ အုပ်စုလိုက်နေထိုင်မှုတွေကြောင့် မိမိတို့ လုပ်ငန်းခွင်မှာ လုပ်ဖော်ကိုင်ဖက်တွေ တဆင့်ကူးစက်တာတွေရှိနေတယ်လို့ ကျန်းမာရေးဆေးခန်းတခုမှာ မြန်မာ ဘာသာပြန် လုပ်နေတဲ့ ဆရာမ တဦးက ပြောပါတယ်။

လက်ရှိဂျပန်မှာ ကိုဗစ်-၁၉ ရောဂါ ထိန်းချုပ်ဖို့ ဂျပန်အစိုးရက သြဂုတ် ၃၁ ရက်နေ့မှာ အရေးပေါ်အခြေအနေ သက်တမ်းကုန်ဆုံးမယ့် တိုကျို၊ အိုစာကာ၊ စိုင်းတာမ၊ ချိဘ၊ ခါနာ့ဂါဝနဲ့ အိုကီနာဝါ ဖူကုရှီမ၊ အိုင်းချိ၊ ရှိဂ၊ ခူမာမိုတို၊ ဟော့ကိုင်းဒိုးနဲ့ အိရှိခါဝ ခရိုင်တွေမှာတွေမှာလည်း စက်တင်ဘာ ၁၂ ရက်အထိ ကန့်သတ်ချက်သက်တမ်းကိုထပ်တိုးကာ မိယာဂီ၊ ယာမာ့နာ့ရှိ၊ တိုးယာမ၊ ဂီဖု၊ မီအဲ၊ အိုကာ့ယာမ၊ ဟီရိုရှီးမား၊ ခါ့ဂါ့ဝါ၊ အဲဟီမဲနဲ့ ခါဂိုးရှီမ ခရိုင်တို့ကိုပါ အရေးပေါ်အခြေအနေတွင်းထပ်ထည့်ထားပါတယ်။

ကိုဗစ်ကူးစက်ခံရသူဂျပန်ရောက်မြန်မာနိုင်ငံသားတွေကို အစားအသောက်နဲ့  တခြားကြုံနေရတဲ့ အခက်အခဲတွေကို ဝိုင်းဝန်းကူညီထောက်ပံ့ပေးဖို့  ဂျပန်ရှိလူမှုကူညီရေးမြန်မာအသင်းတွေက လှုံဆော်ဆောင်ရွက်နေပါတယ်။

သတင်း- ဓာတ်ပုံ ဇော်ဇော်လှိုင်