ဂျပန် တော်ဝင်မင်းသမီးဟောင်း မာကို စေ့စပ်တဲ့ကိစ္စကို သတင်းဖော်ပြရာမှာ အမှားတွေ ဆိုးရွားတဲ့ကိစ္စတွေ ဖော်ပြခဲ့တဲ့အတွက် မီဒီယာတွေကို ဂျပန်အိမ်ရှေ့စံမင်းသားက နိုဝင်ဘာ ၃၀က ဝေဖန်ပြစ်တင်လိုက်ပါတယ်။

တော်ဝင်မင်းသမီး မာကိုဟာ တော်ဝင် မဟုတ်တဲ့သူကို အရင်လက လက်ထပ်ဖို့ တော်ဝင်အဆင့် သတ်မှတ်ချက်ကို စွန့်လွှတ်ခဲ့သူပါ။

မာကိုဟာ ခေးအိခိုမုရိုနဲ့ လက်ထပ်မယ့်ကိစ္စမှာ သတို့သားရဲ့မိခင် ပါဝင်ပတ်သက်နေတဲ့ ကျော်မကောင်း ကြားမကောင်းမှုအတွက် အတိုက်အခံကိစ္စရပ်တွေကို ရင်ဆိုင်ခဲ့ရလို့ လက်ထပ်ပွဲကို ၃ နှစ် ရွှေ့ဆိုင်းခဲ့ပါတယ်။

ဒီကိစ္စကို ဖော်ထုတ်ရာမှာ မီဒီယာတွေရဲ့ အလွန်အကျွံ စိစိပေါက်ပေါက် စိစစ်ချက်နဲ့ ဝေဖန်ချက်တွေ ပါဝင်ခဲ့ပြီး မာကိုဟာ အဲဒီကာလမှာ စိတ်ဒဏ်ရာ အလွန်စိတ်ဖိစီးမှုဝေဒနာတွေ ခံစားခဲ့ရပါတယ်။

မီဒီယာဖော်ပြချက်တွေနဲ့ မာကိုရဲ့ ကျန်းမာရေးပတ်သက်မှုကို မေးရာမှာ လက်ရှိဘုရင်ရဲ့ ညီဖြစ်သူ အိမ်ရှေ့စံမင်းသား အာ့ခိရှိနိုက မီဒီယာ ဖော်ထုတ်ချက်တွေထဲမှာ လုပ်ကြံ ဖန်တီးထားတာတွေ အများကြီး ပါသလို နားထောင်သင့်တယ်ဆိုတဲ့ ထင်မြင်ချက်တွေလည်း ပါတယ်လို့ အသက် ၅၆ နှစ်ပြည့် မွေးနေ့အတွက် သတင်းစာရှင်းလင်းပွဲထဲမှာ ပြောပါတယ်။

ဂျပန်ဥပဒေအရ မာကိုဟာ တော်ဝင်အဆင့်အတန်းကို စွန့်လွှတ်ခဲ့ပြီး ဒေသန္တရရုံးမှာ စာရွက်စာတမ်းတွေကို တင်သွင်း လက်ထပ်ခဲ့ပြီးတဲ့နောက် အမေရိကန်နိုင်ငံ နယူးယောက်မြို့မှာ နေထိုင်ဖို့ ထွက်ခွာသွားခဲ့ပါတယ်။