မြန်မာနိုင်ငံမှာ ဖမ်းဆီး တရားစွဲဆိုခံထားရတဲ့ ဂျပန်လူမျိုး Mr.Toru Kubota ကို ၁၆ ရက် ဒီနေ့ည အစောပိုင်းမှာ ပြန်လွှတ်ပေးနိုင်တယ်လို့ ဂျပန်အခြေစိုက် အဆဟီတီဗွီသတင်းက ကြေညာပါတယ်။

ဂျပန်လူမျိုး မှတ်တမ်းရုပ်ရှင်ဒါရိုက်တာ Mr.Toru Kubota ကို ပြီးခဲ့တဲ့ ဇူလိုင် ၃၀ ရက်နေ့က ရန်ကုန်မြို့ ဆန္ဒပြပွဲအတွင်း အကြမ်းဖက်စစ်ကောင်စီက ဖမ်းဆီးခဲ့ပြီး ဆန္ဒပြပွဲမှာ ပါဝင်ခဲ့မှု၊ လူဝင်မှုကြီးကြပ်ရေးဥပဒေ ချိုးဖောက်မှုတို့နဲ့ တရားစွဲဆိုထားတာပါ။

ဒီကိစ္စနဲ့ပတ်သက်ပြီး လစ်ဘရယ်ဒီမိုကရက်တစ်ပါတီရဲ့ ပြန်လည်တည်ဆောက်ရေးဝန်ကြီးဟောင်း အောက်လွှတ်တော်အမတ် Mr.Hiromichi Watanabe ပြီးခဲ့တဲ့ သီတင်းပတ် မြန်မာနိုင်ငံမှာ အကြမ်းဖက်စစ်ခေါင်းဆောင်နဲ့ သွားရောက်တွေ့ဆုံခဲ့စဉ်က မကြာမီကာလအတွင်း မစ္စတာ Kubota ကို လွှတ်ပေးမယ်ဆိုပြီး စစ်ကောင်စီက ကတိပြုခဲ့ကြောင်း သူ့ရဲ့ လူမှုကွန်ရက် SNS မှာ ဒီနေ့ ရေးသားဖော်ပြခဲ့ပါတယ်။

အင်းစိန်ထောင်တွင်း ရောက်ရှိနေတဲ့ မစ္စတာ Kubota ရဲ့ တရားရုံးချိန်းကို ဒုတိယအကြိမ် ဒီနေ့ ကြားနာဖို့ စီစဉ်ထားကာ စီရင်ချက်ချပြီးနောက် ချက်ချင်း ဂျပန်နိုင်ငံကို ပြည်နှင်ဒဏ်ပေးခံရဖွယ် ရှိတယ်လို့ နီးစပ်တဲ့အသိုက်အဝန်းက သိရကြောင်း အဆဟီသတင်းက ကြေညာခဲ့ပါတယ်။

၂၀၂၁ ခုနှစ် ဧပြီလတုန်းကလည်း ဂျပန်လူမျိုးသတင်းထောက် Mr. Kitazumi Yuki ကို စစ်ကောင်စီက ဖမ်းဆီးခဲ့ပြီး မှားယွင်းတဲ့ သတင်းအချက်အလက်တွေ ဖြန့်ဝေမှုအပါအဝင် စွဲချက်တွေနဲ့ အမှုအတင်ခံခဲ့ရကာ သူ့ကို လွှတ်ပေးဖို့ ဂျပန်အစိုးရက တောင်းဆိုပြီး တလအကြာမှာ ပြန်လွတ်လာခဲ့ပါတယ်။

လက်ရှိ အင်းစိန်ထောင်မှာ ရောက်ရှိသူ Mr.Toru Kubota ကို စွဲဆိုထားတဲ့ ပုဒ်မ -၁၃(၁) မှာ အနည်းဆုံး ထောင်ဒဏ် ခြောက်လမှ အများဆုံး ထောင်ဒဏ် ငါးနှစ်အထိ ချမှတ်နိုင်ပြီး နိုင်ငံတော်အကြည်ညိုပျက်စေမှု ပုဒ်မ ၅၀၅(က) ကတော့ ထောင်ဒဏ်နှစ်နှစ်အထိဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်နိုင်ပါတယ်။

မြန်မာနိုင်ငံမှာ စစ်ကောင်စီရဲ့ ဖမ်းဆီးခံနေရတဲ့ မှတ်တမ်းရုပ်ရှင်ရိုက်ကူးသူ ဒါရိုက်တာ တိုရုခုဘိုတ  ပြန်လွတ်မြောက်ရေးအတွက်  သူ့ရဲ့ မိသားစုလုပ်ဖော်ကိုင်ဖက် မိတ်ဆွေတွေက   ဩဂုတ် ၁ ရက်နေ့မှာ တိုကျိုမြို့ရှိ ဂျပန်နိုင်ငံခြားရေးရုံးရှေ့မှာကို စုပေါင်းသွားရောက်ပြီး တောင်းဆို ဆန္ဒပြခဲ့ကြပါတယ်။

ဂျပန်အစိုးရ ဒုတိယအတွင်းဝန်ချုပ် မစ္စတာခိဟရကလည်း မစ္စတာ တိုရုခုဘိုတအမြန်ဆုံး လွတ်မြောက်နိုင်ဖို့အတွက် မြန်မာစစ်ကောင်စီကို ဖိအားပေးဆောင်ရွက်သွားမယ်လို့  ဒီကနေ့ ပြောကြားလိုက်ပါတယ်။

ဒါရိုက်တာ  မစ္စတာ တိုရုခုဘိုတဟာ ဇူလိုင် ၃၀ ရက်က  ရန်ကုန်၊ တောင်ဒဂုံမြို့နယ်မှာ ပြုလုပ်ခဲ့တဲ့  စစ်အာဏာရှင်ဆန့်ကျင် ပြောက်ကျားဆန္ဒပြပွဲကို မှတ်တမ်းတင် ရုပ်ရှင်ရိုက်ကူးရင်း စစ်ကောင်စီတပ်ရဲ့  ဖမ်းဆီးခံခဲ့ရတာ ဖြစ်ပါတယ်။ 

သူ့ရဲ့မိတ်ဆွေလည်းဖြစ် မြန်မာနိုင်ငံမှာသတင်းယူရင်း ၂ ကြိမ်ဖမ်းဆီးခံခဲ့ရဖူးသူလည်းဖြစ်တဲ့ ဂျပန်သတင်းထောက် ယူကီခိတဇူမီ က “ကျနော့်ရဲ့လုပ်ဖော်ကိုင်ဖက်  တိုရုခုဘိုတက မှတ်တမ်းတင်ဒါရိုက်တာတယောက်ပါ။ သူဟာ သူ့အလုပ်သူလုပ်တာပါ။ သတင်းသမာ၊ နိုင်ငံရေးသမား၊ ဒီမိုကရေစီလှုပ်ရှားသူတွေက ရာဇဝတ်သားတွေမဟုတ်လို့ သူတို့ကို အမြန်ဆုံးပြန်လွှတ်ပေးဖို့ တောင်းဆိုပါတယ်”လို့ ဒီဗွီဘီကို ပြောပါတယ်။ 

ဒါရိုက်တာ တိုရုခုဘိုတ ဟာ မြန်မာနိုင်ငံအကြောင်းကို စိတ်ဝင်စားပြီး တက္ကသိုလ်နောက်ဆုံးနှစ်ကတည်းက ကျောင်းသားဘဝနဲ့  မှတ်တမ်းတင်ရုပ်ရှင်ရိုက်ကူးခဲ့သူဖြစ်ပြီး နိုင်ငံတကာက ပေးအပ်တဲ့ ဆုတွေလည်း ရခဲ့ဖူးသူဖြစ်ပါတယ်။

ဒါရိုက်တာ တိုရုခုဘိုတဟာ မြန်မာနိုင်ငံကိုအကြိမ်ကြိမ်သွားရောက်ပြီး မြန်မာနိုင်ငံရဲ့လူနေမှုဘဝ၊ ဘာသာဓလေ့ထုံးစံတွေကို မှတ်တမ်းတင်နေတဲ့ ဂျာနယ်လစ်တယောက်ဖြစ်တယ်လို့လည်း ယူကီ ခိတဇူမီက ပြောပါတယ်။

Japan PEN Club ဥက္ကဋ္ဌ  မစ္စတာ နာဆူရိုခီရီနိုကလည်း ဒါရိုက်တာ တိုရုခုဘိုတကို အမြန်ဆုံး ပြန်လွှတ်ပေးဖို့ မနေ့က ကြေညာချက်ထုတ်တောင်းဆိုလိုက်ပြီး  မြန်မာနိုင်ငံနဲ့ ပြည်ပရှိ သတင်းထောက်တွေရဲ့ လွတ်လပ်စွာ ထုတ်ဖော်ပြောဆိုခွင့်ကို အကာအကွယ်ပေးဖို့ တောင်းဆိုထားပါသည်။

စစ်ကောင်စီဘက်ကတော့ အဆိုပါ ဖမ်းဆီးမှုနဲ့ ပတ်သက်လို့ တရားဝင် ထုတ်ဖေါ်ပြောဆိုတာ မရှိသေးပေမဲ့ မြန်မာနိုင်ငံဆိုင်ရာဂျပန်သံရုံးကတော့ ဂျပန်အမျိုးသားတယောက် ဖမ်းဆီးထိန်း သိမ်းခံခဲ့ရကြောင်း AFP သတင်းဌာနကို အတည်ပြုပြောကြားခဲ့ပြီး  သံရုံးအနေနဲ့ မြန်မာစစ်ကောင်စီတာဝန်ရှိသူတွေနဲ့  ဆက်သွယ်ပြီး ပြန်လွှတ်ပေးဖို့ ဆောင်ရွက်နေတယ်လို့ သိရပါတယ်။

ဒါရိုက်တာ တိုရုခုဘိုတ လွတ်မြောက်ရေးလက်မှတ်ရေးထိုးတောင်းဆိုတဲ့ လှုပ်ရှားမှုကိုလည်း ပြုလုပ်နေကြပြီး ဂျပန်ရောက် မြန်မာနိုင်ငံသားတွေကလည်း  ဒီလှုပ်ရှားမှုမှာ ပူးပေါင်းပါဝင် ကြဖို့ အစီအစဉ် ရှိနေပါတယ်။