ကမ္ဘာတဝန်း ပရိသတ် အခိုင်အမာ ရရှိထားတဲ့ အသက် ၂၈ နှစ်အရွယ် အဆိုတော် ဂျပ်စတင်ဘီဘာဟာ ဇန်နဝါရီ ၂၄ ရက်နေ့မှာ သူ့ရဲ့ မူပိုင်သီချင်း အားလုံးကို ရောင်းချလိုက်ပြီလို့ တရားဝင်ဝက်ဘ်ဆိုက်တွေမှာ ဖော်ပြထားပါတယ်။
ကမ္ဘာကျော် အဆိုတော် ဂျပ်စတင်ဘီဘာဟာ သူထုတ်ခဲ့သမျှ သီချင်းအားလုံးရဲ့ ၁၀၀ ရာခိုင်နှုန်း မူပိုင်ခွင့်ကို အမေရိကန်ဒေါ်လာ သန်း ၂၀၀ နဲ့ “Hipgnosis” ကုမ္ပဏီကို ရောင်းချလိုက်ပြီ ဖြစ်ပါတယ်။
အဲဒီလို ရောင်းချလိုက်တဲ့အတွက် သူ့ပရိသတ်တွေက ဂျပ်စတင်တယောက် ဂီတလောက ကနေ ထွက်သွားမှာကို စိုးရိမ်ပူပန်နေကြပါတယ်။
ဂျပ်စတင်ဘီဘာရဲ့ မူပိုင်ခွင့်ရောင်းချမှုဟာ ဒီမျိုးဆက်မှာ တန်ဖိုးအမြင့်ဆုံးအဖြစ် သတ်မှတ်ခံလိုက်ရပြီး ဒီလိုရောင်းချလိုက်တာကြောင့် သီချင်းတွေအားလုံးရဲ့ မူပိုင်ခွင့်ကို ဆုံးရှုံးသွားပြီး ရှိုးပွဲတွေမှာလည်း “Hipgnosis” ရဲ့ ခွင့်ပြုချက်မပါဘဲ ဆိုချင်တဲ့သီချင်းကို လွတ်လွတ်လပ်လပ် ဆိုလို့မရတော့ဘူးလို့ သိရပါတယ်။
ဂျပ်စတင်ရဲ့သီချင်းတွေကို ဘယ်လိုအကြောင်းပြချက်နဲ့ပဲဖြစ်ဖြစ် အသုံးပြုချင်ရင် “Hipgnosis” ကုမ္ပဏီနဲ့သာ တိုက်ရိုက်သက်ဆိုင်တော့မှာ ဖြစ်ပါတယ်။
အသက် ၇၁ နှစ်ရှိပြီဖြစ်တဲ့ ကမ္ဘာကျော်အဆိုတော် Sting ဟာလည်း ၂၀၂၂ ဖေဖော်ဝါရီလတုန်းက သူ့ရဲ့ သီချင်းမူပိုင်ခွင့် တခုလုံးကို Universal Music Publishing ကုမ္ပဏီကို ရောင်းချခဲ့ပြီး ဒေါ်လာသန်း ၂၅၀ နဲ့အထက် ရရှိခဲ့တယ်လို့ The New York times က ဖော်ပြထားပါတယ်။
ကနေဒါပေါ့ပ်အဆိုတော် ဂျပ်စတင် ဒရူး ဘီဘာဟာ ဆန်ဒီယေဂိုမှာ ဖေဖော်ဝါရီ ၁၈ ရက်က နယ် လှည့်ဖျော်ဖြေပွဲ စတင်ပြီး နောက်တရက်မှာပဲ ကိုဗစ်-၁၉ ရောဂါကူးစက်ခံခဲ့ရတယ်လို့ သူ့ရဲ့ ပြောရေးဆိုခွင့် ရသူက အတည်ပြု ပြောလိုက်ပါတယ်။
ဒါကြောင့်မို့ လက်စ်ဗီးဂက်စ်မှာ ဖေဖော်ဝါရီ ၂၀ မှာ ကျင်းပမယ့် ရှိုးပွဲကို လာမယ့် ဇွန် ၂၈ ရက်ကို ရွှေ့ဆိုင်းလိုက်ရပြီး နောက်ထပ်ဖျော်ဖြေပွဲတွေကိုလည်း ထပ်မံပြီးတော့ ရွှေ့ဆိုင်းလိုက်ရတယ်လို့ ဆိုပါတယ်။
ဂျပ်စတင်ဘီဘာရဲ့ အဖွဲ့ထဲက တခြားဖျော်ဖြေရေးအဖွဲ့သားတွေမှာရော ကိုဗစ်-၁၉ ရောဂါ ကူးစက်ခံရထားရခြင်း ရှိ၊ မရှိဆိုတာကိုတော့ အဆိုတော်ရဲ့ ပြောရေးဆိုခွင့်ရှိသူက ဖြေကြားဖို့ ငြင်းဆန်ထားပေမယ့် ရွှေ့ဆိုင်းလိုက်တဲ့ ရှိုးပွဲနဲ့ ပတ်သက်တဲ့ ထုတ်ပြန်ချက်မှာတော့ “အဖွဲ့ထဲမှာ ကိုဗစ်-၁၉ ကူးစက်ဖြစ်ပွားမှုကြောင့်”လို့ ဖော်ပြထားခဲ့တာပါ။
Justice in Action လို့ အမည်ပေးထားတဲ့ ဘီဘာရဲ့ နယ်လှည့်ဖျော်ဖြေပွဲဟာ ကိုဗစ်-၁၉ ကပ်ဘေးကြောင့် အရင်ကတည်းက ကျင်းပနိုင်ခြင်းမရှိဘဲ ကြန့်ကြာနေခဲ့ရတာ ဖြစ်ပါတယ်။
ဒီနယ်လှည့်ဖျော်ဖြေပွဲအတွင်း ဘီဘာဟာ ၁၃ လအတွင်းမှာ နိုင်ငံပေါင်း ဒါဇင်နဲ့ချီ သွားရောက်ဖျော်ဖြေနိုင်ဖို့ စီစဉ်ထားခဲ့တာဖြစ်ပြီး ရာဇ၀တ်ပြစ်မှုဆိုင်ရာ ပြုပြင်ပြောင်းလဲရေးနဲ့ ရာသီဥတု ပြောင်းလဲမှုတွေအပါအဝင် ကိစ္စရပ်တွေနဲ့ပတ်သက်ပြီး အသိပညာပေးနိုင်ဖို့ ရည်ရွယ်ထားတာ ဖြစ်ပါတယ်။
