ဘရာဇီးနိုင်ငံ၊ ရီယိုဒီဂျနေရိုမြို့ရဲ့ ဂွာနာဘာရာပင်လယ်အော်မှာ ပလတ်စတစ်အိတ် လည်ပင်းမှာ စွပ်လျက်သား သေဆုံးနေတဲ့ လိပ်တကောင် မျောပါနေတာကို စက်တင်ဘာ ၄ ရက်က တွေ့ရပါတယ်။

အငြိမ်းစားအရာရှိ တယောက်က ပင်လယ်အော်ဒေသမှာ အပန်းဖြေနေတုန်း သောင်တင်လာတဲ့ လိပ်သေကို တွေ့ခဲ့တာပါ။

“ကယ်လို့ ရဦးမယ်အထင်နဲ့ ပင်လယ်ထဲ ဆင်းကြည့်ရာမှာတော့ လိပ်က သေဆုံးနေပါပြီ။ ဇီဝဗေဒ ပညာရှင် မာရီယိုမိုစကာတယ်လီကတော့ အိတ်ကြောင့် လိပ်က အသက်ရှူကြပ်တာ ဒါမှမဟုတ် ကျောက်ဆူးလို ရေအောက်ထဲ ဆွဲချလို့ ရေနစ်သလို ဖြစ်တာ”လို့ ယုံကြောင်း ပြောပါတယ်။ 

နှစ်စဉ် ရာချီတဲ့ ရေနေသတ္တဝါတွေဟာ ရီယိုဒီဂျနေရိုမြို့ရဲ့ ပင်လယ်ရေပြင်မှာ စွန့်ပစ်ပစ္စည်းတွေနဲ့ ပလတ်စတစ် အမှိုက်တွေကြောင့် သေဆုံး ဒဏ်ရာရလေ့ ရှိပါတယ်။

နှစ်စဉ် ပလတ်စတစ်အမှိုက် တန်ချိန် ၁၁ သန်း ပင်လယ်ထဲကို စွန့်ပစ် ခံနေရတယ်လို့ ကုလသမဂ္ဂသဘာဝပတ်ဝန်းကျင်အစီအစဉ်က ဆိုပါတယ်။

ပလတ်စတစ် အမှိုက်တွေနဲ့ ရစ်ပတ်မိလို့ဖြစ်စေ စားမိလို့ဖြစ်စေ နှစ်စဉ် ပင်လယ်ပျော်ငှက်တွေနဲ့ ရေသတ္တဝါတွေ ရာထောင်ချီ သေဆုံးလေ့ရှိတယ်လို့လည်း ရိုက်တာသတင်းဌာနက ဖော်ပြပါတယ်။