ငန်းနက်သားဟာ အဖိုးတန်တဲ့ စားနပ်ရိက္ခာ ရင်းမြစ်ဖြစ်တာကြောင့် ငန်းနက်သား စားကြဖို့ မြောက်ကိုရီးယားအစိုးရက သူ့နိုင်ငံသားတွေကို တိုက်တွန်းပြောကြားလိုက်ပါတယ်။
အသစ်တီထွင်ထားတဲ့ လုပ်ငန်းအဆင့် သားဖောက်နည်းစနစ်နဲ့အတူ နိုင်ငံတောင်ပိုင်း ဟမ်ဂျောင်းပြည်နယ်ထဲက ငန်းမွေးမြူရေး လုပ်ငန်းပြီးစီးပြီမို့ ပြည်သူတွေ လူနေမှုဘဝ တိုးတက်အောင် ကူညီတော့မယ်လို့လည်း အစိုးရရုပ်သံကတဆင့် ပြီးခဲ့တဲ့အပတ်က ပြောပါတယ်။
ငန်းနက်သားဟာ အရသာ ရှိပြီး ဆေးဘက်တန်ဖိုးတွေ ပါတယ်လို့လည်း အစိုးရ မီဒီယာက ပြောပါတယ်။
ကိုရီးယာကျွန်းဆွယ် ငြိမ်းချမ်းကြွယ်ဝရေးဌာန ဥက္ကဋ္ဌ ကင်မ်ဟျောင်ဆွတ်ခ်က “အသားစားနိုင်တဲ့ လူတန်းစားအုပ်စုတွေ လူ့အဖွဲ့အစည်းထဲမှာ ရှိနေလို့ စားစရာ အမျိုးစုံ တိုးချဲ့တာဟာ အဓိပ္ပာယ်ရှိတယ်ထင်တယ်။ သူတို့ဟာ ငန်းသား အရောင်းမြှင့်တင်ဖို့ ပစ်မှတ်ပဲ ထင်တယ်” လို့ ပြောပါတယ်။
ဒါပေမဲ့ စီးပွားရေး ပိတ်ဆို့မှု ခံနေရသရွေ့ ငန်းသားဟာ တိုင်းပြည်ရဲ့ ရေရှည်စားနပ်ရိက္ခာ ပြတ်လပ်မှု အခြေအနေကို ဖြေရှင်းနိုင်မှာ မဟုတ်ဘူးလို့ သူက ပြောပါတယ်။
အလှမွေး ငှက်တွေကို စားဖို့ မွေးမြူရေး သုတေသီတွေဟာ ၂၀၁၉ ခုနှစ်အစောပိုင်းမှာ စခဲ့တာပါ။ စားစရာတွေကို ကိုယ်တိုင် စိုက်ပျိုးဖို့၊ တကိုယ်တော် ဖူလုံအောင် ငါးနဲ့ တခြား တိရစ္ဆာန်တွေကို မွေးဖို့ အာဏာပိုင်တွေက ကျောင်းတွေ၊ စက်ရုံတွေနဲ့ စီးပွားရေး လုပ်ငန်းတွေကို ပြောခဲ့တယ်လို့ NK News သတင်းမှာ ဖော်ပြပါတယ်။
မြောက်ကိုရီးယားဟာ စားနပ်ရိက္ခာ မဖူလုံတာ ကြာပြီဖြစ်ကြောင်း၊ ကိုဗစ်-၁၉ ကပ်ရောဂါဘေး၊ သဘာဝ ကပ်ဘေးတွေနဲ့ နျူကလီးယား အစီအစဉ်ကြောင့် နိုင်ငံတကာက ချမှတ်တဲ့ ဒဏ်ခတ်ပိတ်ဆို့မှုတွေနဲ့ စီးပွားရေး တလွဲစီမံမှုတွေကြောင့် ဖြစ်တာလို့ လေ့လာသူတွေက ပြောပါတယ်။
မြောက်ကိုရီးယားခေါင်းဆောင် ကင်ဂျုံအန်းကတော့ စားနပ်ရိက္ခာ အခြေအနေ ကျပ်တည်းနေတာကို အသိအမှတ်ပြု ပြောဆိုခဲ့ပြီး ကိုရိုနာဗိုင်းရပ်စ် ကူးစက်မှု ဟန့်တားရေး ပြည်သူတွေက အနစ်နာခံ ပေးဆပ်နေရတာကြောင့် တောင်းပန်တယ်လို့ ပြောခဲ့ပါတယ်။
