ဧရာဝတီတိုင်း၊ ငပုတောမြို့နယ်၊ ဟိုင်းကြီးမြို့မှာ စက်တင်ဘာ ၁၅ ရက်နေ့က စစ်ကောင်စီလက်အောက်ခံ ရဲတပ်ဖွဲ့ဝင်တဦး ကြိုးဆွဲချသေဆုံးခဲ့တယ်လို့ ဒေသခံတွေက ပြောပါတယ်။
တိုင်းရဲတပ်ဖွဲ့ရဲ့ စာရင်းထဲမှာတော့ ကြိုးဆွဲချသေဆုံးခဲ့တဲ့ ရဲတပ်ဖွဲ့ဝင်ကို အရက်စွဲရောဂါကြောင့် သေဆုံးခဲ့တယ်လို့ စာရင်းထည့်သွင်းထားတယ်လို့ ရဲတပ်ဖွဲ့အသိုင်းဝိုင်းက ပြောပါတယ်။
“သတင်းတင်လာတာတော့ ကြိုးဆွဲချသေဆုံးတာမျိုးမဟုတ်ဘူး အရက်စွဲရောဂါကြောင့် သေဆုံးခဲ့တယ်လို့ ကြေးနန်းတင်လာတာတော့ရှိတယ်။ နာမည်နဲ့ ကိုယ်ပိုင်အမှတ်တော့ ပြောလို့မရဘူး၊ ဒီတပ်ဖွဲ့ဝင် သေဆုံးခဲ့တာတော့ အတည်ပြုလို့ရတယ်”လို့ တိုင်းရဲတပ်ဖွဲ့က လုံခြုံရေးအရ အမည်မဖော်လိုတဲ့ တပ်ဖွဲ့ဝင်တဦးက ပြောပါတယ်။
ကြိုးဆွဲချသေဆုံးခဲ့တဲ့ ရဲတပ်သားကို ဒေသခံအများစုက ကိုကရင်ကြီးလို့ အသိများပြီး အမှတ် ၂ ရပ်ကွက် ၂ လမ်းထိပ်က ရေတွင်းထဲမှာ ကြိုးဆွဲချသေဆုံးခဲ့တာလို့ ဒေသခံတွေက ပြောပါတယ်။
ကိုကရင်ကြီးက ဟိုင်းကြီးကျွန်းနယ်မြေရဲစခန်းက ရဲတပ်ဖွဲ့ဝင်တဦးဖြစ်ပြီး စစ်အာဏာသိမ်းပြီးနောက်ပိုင်းမှာ အချိန်ပြည့် အရက်သေစာသောက်စားကာ မူးနေခဲ့သူ ဖြစ်တာကြောင့် အကြိမ်ကြိမ်သတိပေးခံထားရတဲ့ တပ်ဖွဲ့ဝင်တဦးဖြစ်တယ်လို့ ရဲတပ်ဖွဲ့အသိုင်းအဝိုင်းက သိရပါတယ်။
ဧရာဝတီတိုင်း၊ ငပုတောမြို့နယ်မှာ အောက်တိုဘာ ၃၀ ရက် ဒီနေ့ မနက်ပိုင်းက Mytel တာဝါတိုင် ၃ တိုင် တချိန်တည်း မိုင်းခွဲ ဖျက်ဆီးခံခဲ့ရတယ်လို့ ဒေသခံတွေထံက သိရပါတယ်။
သစ်ရောင်းအုပ်စု၊ သံပါတ်ကွင်းကျေးရွာမှာရှိတဲ့ တာဝါတိုင်၊ သဲဖြူကုန်းအုပ်စု ကနစိုးကုန်းကျေးရွာမှာ ရှိတဲ့ တာဝါတိုင်နဲ့ မိုးတိမ်ပြင်အုပ်စု ပိတောက်ကုန်းကျေးရွာအုပ်စုမှာရှိတဲ့ စစ်အုပ်စုပိုင် Mytel တာဝါတိုင်တွေကို ဒီနေ့မနက် ၈ နာရီနဲ့ ၈ နာရီခွဲကြားမှာ မိုင်းခွဲဖျက်ဆီးခဲ့တာလို့ သိရပါတယ်။
“အဓိက စစ်အုပ်စုပိုင်တဲ့အရာတွေ ဖျက်ဆီးတာပါ။ ဒီစစ်အုပ်စုကို အထောက်အပံ့ပေးနေတဲ့ အရာတွေ အားလုံးကို ဆက်လိုက်တိုက်ခိုက်သွားမှာပါ”လို့ မြို့ပြပြောက်ကျားတပ်ဖွဲ့ဝင်တဦးက ပြောပါတယ်။
စစ်အုပ်စုပိုင် Mytel တာဝါတိုင်တွေကို ဧရိယာ-၁၄ အဖွဲ့နဲ့ ငပုတောမြို့ပြပြောက်ကျားတပ်ဖွဲ့တို့ ပူးပေါင်းဆောင်ရွက်ခဲ့တာဖြစ်ပြီး အထိအခိုက်မရှိအောင် လုပ်နိုင်ခဲ့တာဖြစ်တယ်လို့ ဆိုပါတယ်။
ဧရာဝတီတိုင်း၊ ငပုတောမြို့နယ်မှာ စစ်အုပ်စုပိုင် Mytel တာဝါတိုင် မိုင်းခွဲဖျက်ဆီးတာဟာ ပထမဆုံးအကြိမ်လည်း ဖြစ်ပါတယ်။
