ဧရာ၀တီတိုင်း၊ ငပုတောမြို့နယ်၊ ပြင်ခရိုင်မြို့မှာနေထိုင်တဲ့ ကျေးရွာတွေနဲ့ မြို့ပေါ်ရပ်ကွက်တွေက အစ္စလာမ် ဘာသာဝင်တွေရဲ့ နေအိမ်တွေကို စစ်ကောင်စီတပ်ဖွဲ့ဝင်တွေက လိုက်လံစစ်ဆေးနေတယ်လို့ ဒေသခံတွေက ပြောပါတယ်။

ပြင်ခရိုင်မြို့မှာနေထိုင်တဲ့ အစ္စလာမ်ဘာသာဝင်တွေရဲ့ နေအိမ်တွေကို သီးသန့်ရွေးပြီး ဧည့်စာရင်းစစ်တာတွေ အိမ်ထောင်စာရင်း စစ်တာတွေ ပြုလုပ်နေတာလို့ ဆိုပါတယ်။

“တအိမ်တက်ဆင်းလိုက်စစ်တာ၊ ပြီးတော့ ဧည့်သည်တွေရောက်ရင် ဧည့်စာရင်းတိုင်ထားတာ ရှိလား စာရွက်စာတမ်းတွေ စစ်တယ်။ သူတို့ပြောတဲ့ပုံက ဧည့်သည်တွေ ဝင်လာတာကို လိုက်စစ်တဲ့ ပုံစံမျိုး စစ်နေတာ” လို့ ဒေသခံတဦးက ပြောပါတယ်။

စစ်ကောင်စီရဲ့တပ်သားတွေ တအိမ်တက်ဆင်း လိုက်လံစစ်ဆေးချိန်မှာ အစ္စလာမ်ဘာသာဝင်တွေ ဖမ်းဆီးခံရတာမျိုး မရှိသေးသလို ဘာကြောင့်စစ်တယ်ဆိုတာကိုတော့ တိတိကျကျ မသိရပေမယ့် ရခိုင်ဘက်ကနေ စစ်ကောင်စီသတင်းပေးတွေကို ရှင်းလင်းဖို့ ဝင်လာတာတွေ ရှိနိုင်တယ်ဆိုပြီး လိုက်လံစစ်ဆေးတာဖြစ်နိုင်တယ်လို့ ဆိုပါတယ်။

ဒါ့ပြင် ငပုတောမြို့နယ်ဟာ ရခိုင်ပြည်နယ်ကနေ ပင်လယ်ဘက်က လာလို့ရတာကြောင့် ရိုဟင်ဂျာတွေ ဝင်လာတဲ့ သတင်းမျိုးကြားလို့ လိုက်စစ်တာလည်း ဖြစ်နိုင်တယ်လို့ ပြောပါတယ်။

ဧရာဝတီတိုင်း၊ ငပုတောမြို့နယ်၊ ဟိုင်းကြီးမြို့မှာ ဧပြီ ၂၅ ရက်‌နေ့က မိန်းမဖြစ်သူအား စစ်ကောင်စီတပ်က ဖမ်းဆီးသွားပြီးနောက် ခင်ပွန်းဖြစ်သူ ဆွဲကြိုးချသေဆုံးခဲ့တယ်လို့ သိရပါတယ်။

ငါးပြေးမကျေးရွာအုပ်ချုပ်ရေးမှူး အသတ်ခံရတာနဲ့ပတ်သက်ပြီး ဇနီးဖြစ်သူ ဒေါ်ကုလားမစိန်ကို စစ်ကောင်စီ တပ်သားတွေက ၂ ကြိမ်ဖမ်းဆီးခဲ့တာကြောင့် မွန်းတည့် ၁၂ နာရီလောက်မှာ ခင်ပွန်းဖြစ်တဲ့ ဦးမောင်စိန်အောင် ဆွဲကြိုးချသေဆုံးသွားတာလို့ ဒေသခံတွေက ပြောပါတယ်။

“သူ့မိန်းမကို ၁၉ ရက်နေ့က ဖမ်းတယ်။ ၂၂ ရက်နေ့မှာ ပြန်လွှတ်တယ်။ ပြီးတော့ မနေ့က ၂၅ ရက်နေ့မှာ ထပ်လာဖမ်းတော့ သူ မခံနိုင်တော့လို့ အဲဒီလို လုပ်သွားတယ်ထင်တယ်။ ကြောက်တာလည်း ပါမှာပေါ့”လို့ ဒေသခံတဦးက ပြောပါတယ်။

ဒေါ်ကုလားမစိန်ကို လာဖမ်းတဲ့အချိန်မှာ စစ်ကောင်စီတပ်သားတွေက ရွာထဲ မူးရူးပတ်ဆဲပြီး ခြိမ်းခြောက်တာတွေလည်း ပြုလုပ်ခဲ့လို့ စိတ်ညစ်တာနဲ့ ကြောက်တဲ့စိတ်ပေါင်းပြီး ခုလိုမျိုး လုပ်သွားတာဖြစ်နိုင်တယ်လို့ ဆိုပါတယ်။

ငါးပြေးမကျေးရွာအုပ်ချုပ်ရေးမှူး အသတ်ခံရတာနဲ့ ပတ်သက်ပြီး စစ်ကောင်စီတပ်သားတွေက ဧပြီ ၁၉ ရက်နေ့ညပိုင်းမှာပဲ အသက်မပြည့်သေးတဲ့သူတွေအပါအဝင် ဒေသခံပြည်သူ ၁၀ ဦးကျော်ကို ဖမ်းဆီးသွားပြီး ဧပြီ ၂၂ ရက်နေ့မှာ ၈ ဦး ပြန်လွှတ်ပေးခဲ့တာလို့ ဒေသခံတွေက ပြောပါတယ်။

ဇနီးဖြစ်သူ ဒုတိယအကြိမ် အဖမ်းခံရချိန်မှာ ဆွဲကြိုးချသေဆုံးခဲ့တဲ့ အသက် ၆၀ အရွယ် ဦးမောင်စိန်အောင်ရဲ့ အလောင်းကို ဆေးရုံမှာ ရင်ခွဲစစ်ဆေးတာတွေပြုလုပ်ခဲ့တယ်လို့ သိရပါတယ်။

ပုသိမ်မြို့မှာ ဧပြီလ ၂ ရက်နေ့ကလည်း ထောင်ထဲမှာ ဖမ်းဆီးခံထားရတဲ့ နိုင်ငံရေးအကျဉ်းသား တဦးရဲ့ ဇနီးဖြစ်သူ အဆိပ်သောက် သေဆုံးမှုဖြစ်ပွားခဲ့ပါသေးတယ်။

ဧရာဝတီတိုင်း၊ ငပုတောမြို့နယ်မှာ ဧပြီ ၂၃ ရက်နေ့က NLD ပါတီရဲ့ လွှတ်တော်အမတ်ဖြစ်သူ ဦးသက်ပိုင်စိုးကို မတွေ့တာကြောင့် ဇနီးဖြစ်သူနဲ့ အသက် ၁၀ လအရွယ် ကလေးငယ်အပါအဝင် ၆ ဦးကို စစ်ကောင်စီတပ်သားတွေက လာရောက်ဖမ်းဆီးသွားတယ်လို့ သိရပါတယ်။

ငပုတောမြို့နယ်ထဲက ကညင်ချောင်းကျေးရွာမှာ သွားရောက်တိမ်းရှောင်နေတဲ့ ဦးသက်ပိုင်စိုးရဲ့ ဇနီးဖြစ်သူနဲ့ သမီး ၂ ယောက်အပါအဝင် အိမ်နီးနားချင်း ဒေသခံတွေကို စစ်ကောင်စီတပ်သား တွေက ဖမ်းဆီးသွားတာလို့ ဒေသခံတွေက ပြောပါတယ်။

“ကိုသက်ပိုင်စိုးရဲ့ မိန်းမရော ကလေး ၂ ယောက်ရောဖမ်းတဲ့။ ပြီးတော့ အိမ်ဘေးက ဦးလေးနဲ့ သူ့မိန်းမနဲ့ ကလေးကိုပါ ထပ်ဖမ်းသွားတာ အဆက်သွယ်မရသေးဘူး” လို့ ဒေသခံတဦးက ပြောပါတယ်။

စစ်ကောင်စီတပ်သားတွေက ဦးသက်ပိုင်စိုးကို မတွေ့တာကြောင့် ရပ်ကွက်ထဲက ဒလန်တယောက်ရဲ့ သတင်းပေးမှုကြောင့် ဝင်ရောက်ရှာဖွေချိန်မှာ ခုလိုမျိုး အသက်မပြည့်သေးတဲ့ ကလေး ၃ ဦးအပါဝင် စုစုပေါင်း ၆ ဦးကို ဖမ်းဆီးသွားတာလို့ ဆိုပါတယ်။

ငပုတောမြို့နယ် NLD ပါတီရဲ့ လွှတ်တော်အမတ်ဖြစ်သူ ဦးသက်ပိုင်စိုးဟာ စစ်တပ်အာဏာသိမ်းပြီးနောက်ပိုင်း ပုဒ်မ ၅၀၅ နဲ့ ဖမ်းဝရမ်းထုတ်ခံရလို့ တိမ်းရှောင်နေရသူတဦးဖြစ်ပါတယ်။

စစ်ကောင်စီတပ်သားတွေက ဦးသက်ပိုင်းစိုးရဲ့ မိသားစုဝင်တွေ အပါဝင် ၆ ဦးကိုဖမ်းဆီးခဲ့ပြီး ၃ ရက်ကြာတဲ့အထိ အဆက်သွယ်မရသေးတာကြောင့် ကလေးငယ်လည်း ပါဝင်သွားလို့ စိတ်ပူနေရတယ်လို့ ဒေသခံတွေက ပြောပါတယ်။