ဧရာဝတီတိုင်း၊ ငပုတောမြို့နယ်၊ ငရုတ်ကောင်းမြို့ပင်လယ်ပြင်မှာ ဧပြီ ၁၉ ရက်နေ့က ဖမ်းဆီးခံခဲ့ရတဲ့ ရိုဟင်ဂျာ အယောက် ၇၀ ကို စစ်ကောင်စီလက်အောက်ခံ တရားရုံးကနေ ဧပြီ ၂၄ ရက်နေ့က ထောင်ဒဏ် ၂ နှစ်စီ ပြစ်ဒဏ်ချမှတ်လိုက်ပါတယ်။
ရခိုင်ပြည်နယ်နေ ထွက်ခွာလာတဲ့ ရိုဟင်ဂျာတွေကို စစ်ကောင်စီလက်အောက်ခံ ငပုတောမြို့နယ် တရားရုံးကနေ မှတ်ပုံတင်အက်ဥပဒေပုဒ်မ ၆၃ (က)နဲ့ ထောင်ဒဏ် ၂ နှစ်စီ ပြစ်ဒဏ်ချမှတ်ခဲ့တာလို့ ရဲတပ်ဖွဲ့နဲ့ နီးစပ်သူတွေက ပြောပါတယ်။
“ ခုက တရားရုံးတင်တာနဲ့ တန်းအမိန့်ချလိုက်တာ၊ အရင်ကဆို ရုံးချိန်း ပြန်ချိန်းတာတွေရှိတယ်၊ ခုက ဘာမှဖြေရှင်းခွင့်မပေးတော့ဘဲ တန်းချတဲ့သဘောမျိုးတော့ ဖြစ်သွားတာပေါ့။ သူတို့ကို လိုက်ပို့တဲ့ ပွဲစားနဲ့ စက်လှေသမားတွေတော့ အမိန့်မချသေးဘူး”လို့ ရဲတပ်ဖွဲ့နဲ့နီးစပ်သူတစ်ဦးက ပြောပါတယ်။
ဖမ်းဆီးခဲ့တဲ့ ရိုဟင်ဂျာတွေထဲမှာ အသက် ၁၈ နှစ်အပြည့်သေးတဲ့ အမျိုးသား ၂၆ ဦးကို ငှက်အော်စမ်းလူငယ်လေ့ကျင်ရေးစခန်းကို ပို့ဆောင်ပြီး အသက် ၇ နှစ်အောက် ကလေး ၂ ဦးကိုတော့ ပုသိမ်မြို့မှာရှိတဲ့ လူမှုဝန်ထမ်းဦးစီးဌာနကို အပ်နှံပေးခဲ့တယ်လို့ ဆိုပါတယ်။
ထောင်ဒဏ် ၂ နှစ်ချမှတ်ခံရတဲ့ ရိုဟင်ဂျာ ၄၂ ဦးကိုတော့ ဧပြီလ ၂၅ ရက်မှာ ငပုတောမြို့နယ်က နေ ပုသိမ်အကျဉ်းထောင်ကို လွှဲပြောင်းပို့ဆောင်ပေးခဲ့တယ်လို့ သိရပါတယ်။
ဖမ်းဆီးခံရတဲ့ ရိုဟင်ဂျာတွေကို ခေါ်ဆောင်လာတဲ့ ပွဲစားနဲ့ စက်လှေမောင်းသူ စုစုပေါင်း ၇ ဦး ကိုတော့ စစ်ကောင်စီလက်အောက်ခံ ရဲတပ်ဖွဲ့က လူကုန်ကူးမှုပုဒ်မနဲ့အမှုဖွင့်ပြီး စစ်ဆေးနေတယ်လို့ ရဲတပ်ဖွဲ့ကနေ သိရပါတယ်။
ဧရာဝတီတိုင်း၊ ငပုတောမြို့နယ်၊ ငရုတ်ကောင်းမြို့ သဲဖြူကျေးရွာက စက်တင်ဘာ ၂၅ ရက်ညပိုင်းက အသက် ၁၄ နှစ်အောက်လူငယ် ၁ ဦးအပါဝင် ရွာသား ၁၆ ဦးကို အကြမ်းဖက်စစ်ကောင်စီက ဖမ်းဆီး သွားပါတယ်။
သဲဖြူကျေးရွာက ရွာသား ၁၆ ဦးကို PDF တွေလို့ စွပ်စွဲကာ စစ်သား ၉၀ ကျော်က ညပိုင်း ရွာကို ပိတ်ဆို့စီးနင်းပြီး လက်နက်အင်အားအပြည့်နဲ့ ဝင်ရောက်ဖမ်းဆီးခဲ့တာလို့ ဒေသခံတွေက ပြောပါတယ်။
"စစ်သားတွေအများကြီးရောက်လာတာ ညဘက်ကြီး ရွာထဲကနေ ဝင်၊ ထွက်နိုင်တဲ့ လမ်းတွေကို ပိတ်ပြီး လိုက်ရှာနေတာ ခုဆို အဖမ်းခံရတာ ၁၆ ဦးရှိပြီ။ အချုပ်ခန်း ပုံစံဆောက်ပြီး ရွာထဲက လူငယ်တွေကိုလိုက်ဖမ်းနေတာ''လို့ ဒေသခံ တစ်ဦးက ပြောပါတယ်။
ရွာမှာအရင်တုန်းက ခုလိုအဖမ်းခံရတာမျိုး မရှိပေမဲ့ ခုတော့ စစ်တပ်သတင်းပေးကြောင့် ခုလို ရွာကို ဝင်ရောက်ရှာဖွေခံရတာဖြစ်ပြီး စစ်သားတွေက တောနင်းရှာဖို့ ပြောနေသံတွေလည်း ကြားရတယ်လို့ ဆိုပါတယ်။
စက်တင်ဘာ ၇ ရက်မှာ အမျိုးသားညီညွတ်ရေးအစိုးရက အရေးပေါ်အခြေအနေကြေညာပြီး နောက်ပိုင်း ဧရာဝတီတိုင်းက မြို့နယ်တိုင်းလိုလို ဧည့်စာရင်း စစ်တာတွေနဲ့ ပိတ်ဆို့ရှာဖွေတာတွေ ပိုမို ပြုလုပ်လာတာဖြစ်ပါတယ်။
