ဧရာဝတီတိုင်း၊ ရေကြည်မြို့နယ်၊ ငါးသိုင်းချောင်းမြို့မှာ ဧပြီလ ၂၇ ရက် မနက်ပိုင်းက မှုခင်းသတင်းထောက်တယောက်  သေနတ်နဲ့ပစ်သတ်ခံခဲ့ရတယ်လို့ ဒေသခံတွေထံက သိရပါတယ်။

မရင်းကူးကျေးရွာမှာနေထိုင်တဲ့ မှုခင်းသတင်းထောက် ဦးတင်သန်းဟာ မနက် ၇ နာရီလောက်မှာ သေနတ်နဲ့ ၂ ချက်အပစ်ခံရပြီး သေဆုံးခဲ့တာဖြစ်တယ်လို့ ဒေသခံတွေကပြောပါတယ်။

“သူက အမှုပွဲစားလည်းလုပ်တယ်၊ မှုခင်းသတင်းထောက်လို့လည်းပြောတယ်၊ တွေ့တာတော့ စစ်တပ်နဲ့ရော ရဲနဲ့ရော အမြဲတွေ့ရတယ်၊ သူ့ကြောင့် အဖမ်းခံရတာလည်းရှိတော့ အဲ့တာကြောင့် အရှင်းခံရတာဖြစ်နိုင်တယ်”လို့ ဒေသခံတစ်ဦးက ပြောပါတယ်။

မှုခင်းသတင်းထောက် ဦးတင်သန်းကို အမည်မသိလက်နက်ကိုင်အဖွဲ့က သူနေထိုင်ရာ နေအိမ်မှာ လာရောက်ပစ်ခတ်သွားတာဖြစ်ပြီး ရင်ဘတ်ကိုထိကာ သေဆုံးခဲ့တာလို့ ဆိုပါတယ်။

ဒေသခံအများစုကတော့ မှုခင်းသတင်းထောက် ဦးတင်သန်းဆိုသူဟာ အမှုပွဲစား လုပ်သလို စစ်ကောင်စီတပ်သားတွေနဲ့ပေါင်းပြီး မကျေနပ်တဲ့သူတွေကို ခေါ်ဖမ်းခိုင်းတာမျိုးတွေရှိ တာကြောင့် ကျေးရွာနေပြည်သူတွေက သူ့ကိုကြောက်လန့်နေရတာမျိုး ရှိတယ်လို့ ဆိုပါတယ်။

မှုခင်းသတင်းထောက် ဦးတင်သန်းကို ပစ်ခတ်ရှင်းလင်းတာနဲ့ ပတ်သက်ပြီး ဘယ်အဖွဲ့အစည်းက လုပ်တယ်ဆိုတာ မသိရသေးသလို ပုသိမ်ခရိုင်အတွင်းက တော်လှန် ရေးအင်အားစုတွေဘက်ကလည်း သတင်းထုတ်ပြန်တာ မရှိသေးပါဘူး။

ဧရာဝတီတိုင်း၊ ရေကြည်မြို့နယ်၊ ငါးသိုင်းချောင်းမြို့မှာ စက်တင်ဘာ ၅ ရက် ညပိုင်းက စစ်ကောင်စီ ပြန်ကြားရေးဌာနလက်အောက်ခံ ပြန်ဆက်ရုံး ရှေ့ ဗုံး ၂ လုံး ဆက်တိုက်ပေါက်ကွဲခဲ့ပါတယ်။

သရက်ကုန်းလမ်းထိပ်မှာရှိတဲ့ ပြန်ဆက်ရုံးရှေ့မှာ ည ၉ နာရီနဲ့ ၉ နာရီခွဲလောက်မှာ ဗုံး ၂ လုံး ၁၅ မိနစ်လောက်စီခြားပြီး ပေါက်ကွဲခဲ့တာဖြစ်တယ်လို့ ဒေသခံတွေက ပြောပါတယ်။

“ပေါက်တာကတော့ အသံတော်တော်ကျယ်တယ်။ မြေကြီးတွေပါ တုန်သွားတာ။ အပြင်မထွက်ရ အချိန်ဆိုတော့ နေရာသေချာမသိကြဘူး။ ဒီမနက်မှ နေရာသိရတာ”လို့ ပြောပါတယ်။

ဗုံးပေါက်ကွဲခဲ့တဲ့ ပြန်ဆက်ရုံးရှေ့ကို အကြမ်းဖက်စစ်ကောင်စီရဲ့ တပ်တွေက လမ်းပိတ်ဆို့ပြီး စစ်ဆေးတာတွေ ပြုလုပ်ခဲ့တယ်လို့ ဆိုပါတယ်။

ငါးသိုင်းချောင်းမြို့မှာ စစ်တပ်အာဏာသိမ်းပြီးနောက်ပိုင်း မေလပိုင်းက စတင်ကာ ပေါက်ကွဲမှုတွေ ဖြစ်ပွားခဲ့ပြီး စက်တင်ဘာ ၅ ရက်နေ့ထိ ဗုံးပေါက်ကွဲမှု ၁၀ ကြိမ်မကရှိခဲ့တယ်လို့ သိရပါတယ်။