ယူရို ဘီလီယံတဝက်လောက်ရှိတဲ့ ငွေကြေးခဝါချမှုနဲ့ အခွန်ရှောင်မှု သံသယနဲ့ ရုရှားစီးပွားရေးသမားတယောက်ရဲ့ နေအိမ်ကို စက်တင်ဘာ ၂၁ ရက်က ဂျာမန်ရဲတွေနဲ့ အာဏာပိုင်တွေ ဝင်ရောက်စီးနင်းခဲ့ပါတယ်။

ဘာဗာရီးယား အပါအဝင် ပြည်နယ်လေးခုမှာ အာဏာပိုင်တွေက စုစုပေါင်း အိမ်ရာ ၂၄ လုံးကို ရှာဖွေခဲ့ပြီး စစ်ဆင်ရေးမှာ အရာရှိ ၂၅၀ ပါဝင်ခဲ့ကြောင်း မြူးနစ်အစိုးရရှေ့နေရုံးက ပြောကြားခဲ့ပါတယ်။

ရုရှားနိုင်ငံသားတယောက်နဲ့ တခြားသံသယရှိသူလေးယောက်ရဲ့ နေအိမ်မှာ ကျယ်ကျယ်ပြန့်ပြန့် ဝင်ရောက်စီးနင်းမှု ဖြစ်ပွားခဲ့ကြောင်းလည်း ဆိုပါတယ်။

ဂျာမန်မီဒီယာတွေမှာတော့ ဒီစစ်ဆင်ရေးဟာ သူဌေးကြီး  အလီရှာအပ်စ်မာနော့ဗ်ကို ဗဟိုပြု လုပ်ဆောင်တယ်လို့ ဖော်ပြကြပါတယ်။

ပစ်မှတ်ထား ရှာဖွေခံရတဲ့ နေရာတွေထဲက တခုဟာ တောင်ပိုင်းပြည်နယ်ရှိ တီဂါနက်စီ  ရေကန်ပေါ်က အက်စ်မာနော့ဗ် နေထိုင်တဲ့နေရာဖြစ်ကြောင်း ဂျာမန်ရုပ်သံလွှင့်ဌာန BR နဲ့ MDR တို့က ကြေညာပါတယ်။

ဖေဖော်ဝါရီ ၂၄ ရက်က ရုရှားက ယူကရိန်းကို သိမ်းပိုက်ပြီးနောက်မှာ ကျယ်ပြန့်တဲ့ စီးပွားရေးကဏ္ဍတွေရှိတဲ့  အက်စ်မာနော့ဗ် ကို အနောက်နိုင်ငံတွေရဲ့ ပိတ်ဆို့မှုစာရင်းမှာ ထည့်သွင်းခဲ့တာပါ။

Forbes  မဂ္ဂဇင်းရဲ့  အဆိုအရ သူ့မှာ အသားတင်ပိုင်ဆိုင်မှု ဒေါ်လာ ၁၄ ဒသမ ၆ ဘီလီယံ ရှိတယ်လို့ ခန့်မှန်းပါတယ်။

အစိုးရရှေ့နေရဲ့ သတင်းထုတ်ပြန်ချက်အရ သံသယရှိသူတွေထဲက တယောက်ဟာ သူ့ရဲ့ ကျယ်ပြန့်ပြီး ရှုပ်ထွေးတဲ့ ကုမ္ပဏီတွေနဲ့ လုပ်ငန်းကွန်ရက်တွေကို အသုံးပြုခဲ့တယ်လို့ သိရပါတယ်။

လွှဲပြောင်းပေးတဲ့ငွေတွေဟာ ရာဇဝတ်မှု ကျူးလွန်တာတွေကနေ အစပြုပြီး အထူးသဖြင့် အခွန်ရှောင်ခြင်းဆိုင်ရာ ပြစ်မှုတွေဖြစ်ကြောင်း သံသယရှိနေတာပါ။

စုံစမ်းစစ်ဆေးမှုရဲ့ လက်ရှိအခြေအနေအရ လွှဲပြောင်းပေးတဲ့ ရန်ပုံငွေရဲ့ ငွေပေးငွေယူ ပမာဏဟာ သန်းပေါင်းများစွာ ရှိနေတယ်လို့ ဆိုပါတယ်။