အမေရိကန်နိုင်ငံမှာ ငွေကြေးဖောင်းပွနှုန်း မတ်လကစတင်ပြီး မြင့်တက်လာနေတာကြောင့် စားသုံးသူ ကုန်ဈေးနှုန်း အညွှန်းကိန်းက ၈ ဒသမ ၅ ရာခိုင်နှုန်းထိ တက်လာခဲ့ပါတယ်။

ဒါဟာ ၁၉၈၁ ဒီဇင်ဘာလကတည်းကနေ ခုထိ နှစ် ၄၀ အတွင်း အမြင့်ဆုံးအဆင့်ပဲလို့ အမေရိကန် အလုပ်သမားဝန်ကြီးဌာနက ဧပြီ ၁၂ ရက်မှာ အစီရင်ခံပါတယ်။

နောက်ဆုံးရ အချက်အလက်တွေက ငွေကြေးဖောင်းပွမှု ဆက်ပြီး မြင့်တက်နေတာကြောင့် လာမယ့် မူဝါဒရေးရာ အစည်းအဝေးတွေမှာ အမေရိကန် ဗဟိုဘဏ်ရဲ့ အတိုးနှုန်းတွေ ပိုမြင့်နိုင်ချေအတွက် အကြောင်းပြချက် ခိုင်လုံနေတယ်လို့ မီဒီယာတွေက သုံးသပ်ပါတယ်။

ငွေကြေးဖောင်းပွနှုန်း ကျဆင်းဖို့ အရေးကြီးတယ်လို့ ဗဟိုဘဏ် အုပ်ချုပ်ရေးမှူးက မကြာခင်က ပြောခဲ့သေးတာပါ။

ငွေကြေးဖောင်းပွမှုဆိုင်ရာ ညွှန်းကိန်းတွေ အာမခံချက်ရှိကြောင်း ပြနေရင် ဗဟိုဘဏ်ဟာ ပိုအားကောင်းကောင်း အရေးယူဖို့ ပြင်ဆင်ထားတယ်လို့လည်း သူက ဆိုပါတယ်။

အမေရိကန်ဒေါ်လာ ၉၅ ဘီလီယံဖိုး လစဉ်အသုံးစရိတ်ကို ထောက်ခံကြောင်း အရာရှိတွေက အချက်ပြလိုက်ခြင်းအားဖြင့် ဗဟိုဘဏ်ရဲ့ ငွေစာရင်းရှင်းတမ်း အရွယ်အစားကို မေလ အစောဆုံးထား လျှော့ချနိုင်ပြီလို့လည်း ရိုက်တာသတင်းမှာ သုံးသပ်ဖော်ပြထားပါတယ်။

ရုရှား-ယူကရိန်း ပဋိပက္ခကြောင့် ဥရောပနိုင်ငံတွေမှာ ပျမ်းမျှငွေကြေးဖောင်းပွနှုန်း ၇ ဒသမ ၅ ရာခိုင်နှုန်းရှိခဲ့ပြီး ဂရိနိုင်ငံမှာလည်း မတ်လက ပျမ်းမျှ ငွေကြေးဖောင်းပွမှု ၈ ရာခိုင်နှုန်းအထိ တက်ခဲ့ပါတယ်။

ဖေဖော်ဝါရီ ၂၄ ရက်နေ့တည်းက စတင်ခဲ့တဲ့ ရုရှား-ယူကရိန်း စစ်ပွဲကြောင့်ဟာ ဥရောပတလွှားမှာ စွမ်းအင်ဈေးနှုန်းတွေ တက်နေသလို စားနပ်ရိက္ခာနဲ့ တခြား ကုန်စည်ဈေးနှုန်းတွေပါ တက်လာနေပါတယ်။

ဂရိနိုင်ငံမှာတော့ စီးပွားရေးလုပ်ငန်းတွေနဲ့ အိမ်ထောင်စုတွေဟာ ကုန်ဈေးနှုန်း အကြီးအကျယ် တက်တဲ့ဒဏ်ကို ဆက်ပြီး ရင်ဆိုင်နေရသလို အစိုးရကလည်း ဒီဖြစ်ရပ်တွေကို ကိုင်တွယ် ရုန်းကန်နေရတာပါ။

ပုံမှန်ထက်ပိုပြီး လောင်စာဆီကို အစိုးရက ထောက်ပံ့နေရသလို စီးပွားရေး လုပ်ငန်းတွေနဲ့ ကျောင်းသားတွေအတွက် ရောင်းခွန်ကို လျှော့ချပေးနေပါတယ်။ ဒါပေမယ့် လျှပ်စစ်မီးနဲ့ လောင်စာဈေးနှုန်းကြောင့် စားသုံးသူဈေးနှုန်းဟာ နှစ် ၄၀ အတွင်း အမြင့်ဆုံးထိ တက်နေပါတယ်။

ဂရိနိုင်ငံမှာ မနှစ်က လျှပ်စစ်မီတာခ ၇၀ ရာခိုင်နှုန်းနဲ့ သဘာဝဓာတ်ငွေ့ ၇၈ ရာခိုင်နှုန်း ဈေးတက်ခဲ့ပါတယ်။ ဂရိရဲ့ စွမ်းအင် ၄ဝ ရာခိုင်နှုန်းဟာ ပြည်ပကနေ တင်သွင်းလာတဲ့ သဘာဝဓာတ်ငွေ့ကနေ ရတာပါ။

ဂရိဟာ ၂၀၀၈ ဘဏ္ဍာရေး အကျပ်အတည်းရဲ့ အကြွေးတွေကို ပေးနေရဆဲ နိုင်ငံဖြစ်လို့ ငွေကြေးဖောင်းပွနှုန်း မြင့်တာဟာ စီးပွားရေး နာလန်ထူဖို့ အဓိက အခက်အခဲ ဖြစ်နေပါတယ်။