မြန်မာနိုင်ငံကူးလက်မှတ် ပတ်စ်ပို့ လုပ်ဖို့ Online Booking QR စနစ်နဲ့ လျှောက်ထားကြရာမှာ လက်ရှိမှာ ပြည်ပကို ထွက်ခွာမယ့်သူတွေများပြားလွန်းတာကြောင့်  Booking ရက်ချိန်းက ၂၀၂၃ ခုနှစ် ဩဂုတ်လအထိ ပြည့်နေပြီဖြစ်ပြီး  အမြန်လုပ်ပေးမယ်ဆိုကာ ငွေကြေးလိမ်လည်မှုတွေ ရှိနေတယ်လို့ ကိုယ်တိုင်ကြုံတွေ့ခဲ့ရသူတွေက ပြောပါတယ်။

ကိုယ်တိုင်ကြုံခဲ့ရသူတစ်ဦးက ‘အခု ပတ်စ်ပို့ရုံးထဲမှာ ဘဏ်စနစ်မရှိတော့ဘူး၊ အခုက QR ရက်ချိန်းကို အမြန်လုပ်ပေးမယ်ပြောပြီး ဝန်ဆောင်ခ ၂ သိန်းအထိ ပိုက်ဆံယူပြီး QR စာရွက်တွေမှာ အချိန်အတုတွေ စာအတုတွေပြင်ပြီး ရုံးထဲက လူပါလို့ ပြောတယ်၊ ရုံးနားရောက်လို့ ဖုန်းဆက်လိုက်ရင် ရုံးထဲကလူမို့လို့ အထဲကို လာခဲ့လိုပြောတာ၊ ဂိတ်မှာ QR အတုကြီးဖြစ် နေလို့ ဝင်လို့မရတာတွေ၊ ဖုန်းစက်ပိတ်တာ၊ Block တာတွေလုပ်နေကြတာ”လို့ ပြောပါတယ်။

ဒါ့အပြင် Green Channel အနေနဲ့ လုပ်တဲ့အခါမှာလည်း နေပြည်တော် ရုံးအမှတ် (၁၀) ကို စာတင်ရမှာဖြစ်ပြီး ပြန်ကျမယ့်ရက်ကို အတိအကျမပြောနိုင်တဲ့ အခြေအနေတွေမှာ အမြန်စနစ်နဲ့ လုပ်ဆောင်ပေးမယ်ဆိုတဲ့ ငွေကြေးလိမ်လည်မှုတွေရှိနေပါတယ်။

တစ်ဖက်မှာလည်း QR ဘွတ်ကင် မလျှောက်တတ်တဲ့သူတွေအတွက် QR လျှောက်ပေးတဲ့ဝန်ဆောင်မှုတွေရှိနေပြီး QR ယူပေးဖို့ အလုပ်အပ်တဲ့သူတွေဘက်ကလည်း ပတ်စ်ပို့  ပွဲစားတွေအပေါ် လိမ်လည်မှုတွေလည်း ရှိနေတယ်လို့ သိရပါတယ်။

QR ယူပေးတဲ့အကျိုးဆောင်လုပ်ပေးနေတဲ့သူတစ်ဦးက  “သင်တန်းကျောင်းတစ်ခုက ကျနော်ဆီမှာ ပထမဆုံးအနေနဲ့ ပတ်စ်ပို့လုပ်ဖို့ တစ်ယောက်စအပ်တယ်၊ အဲဒီတုန်းက သူနဲ့ လူချင်းတွေ့လုပ်တာ၊ ပိုက်ဆံလည်း ကြိုပေးတော့ အဆင်ပြေတယ်။ နောက်တခေါက်ကတော့ ၁၅ ယောက် ထပ်အပ် တယ်၊ အဲ့ဒီ ၁၅ ယောက်မှာ ၈ ယောက်ကို ကျနော်က QR တင်ပေးတာ၊ QR လည်း ရသွားရော ပိုက်ဆံမရှင်းတာမျိုး လုပ်သွားတယ်” လို့  ပြောပါတယ်။

အန်အယ်လ်ဒီ အစိုးရလက်ထက်မှာ ပတ်စ်ပို့စာအုပ်ပြုလုပ်ခ ငွေကျပ် ၄၀,၀၀၀ ဝန်းကျင်သာရှိပေမဲ့ စစ်တပ်အာဏာသိမ်းပြီးနောက် QR စနစ်တွေနဲ့ စောင့်ဆိုင်းရတဲ့ အခြေအနေတွေကြောင့် ပတ်စ်ပို့အမြန်ပြုလုပ်ခ ငွေကျပ် ၃ သိန်းကနေ ၅ သိန်း၊ ၁၀ သိန်းအထိ ပေါက်ဈေးရှိနေတာ ဖြစ်ပါတယ်။

စစ်ကောင်စီလက်အောက်ခံ မြန်မာနိုင်ငံကူးလက်မှတ်ထုတ်ပေးရေးအဖွဲ့အနေနဲ့ ရန်ကုန်က မြန်မာနိုင်ငံကူး လက်မှတ်ထုတ်ပေးရေးရုံးမှာ အသစ်ထုတ်ပြန်ထားတဲ့ QR စနစ်နဲ့ တရက်ကို နိုင်ငံကူးလက်မှတ် လျှောက်ထားသူ အယောက် ၂၅၀၀ ကို နေ့တိုင်း ဆောင်ရွက်ပေးနေရတယ်လို့ ထုတ်ပြန်ထားပါတယ်။

နိုင်ငံကူးလက်မှတ်လျှောက်ထားလိုသူတွေအနေနဲ့ ရန်ကုန်မြို့မှာရှိတဲ့ မြန်မာနိုင်ငံကူးလက် မှတ်ထုတ်ပေးရေးရုံးမှာ မတ် ၁၄ ရက်ကစလို့ Online Booking စနစ်နဲ့ ရက်ချိန်းယူတဲ့စနစ်ကို စတင်ပြောင်းလဲ ကျင့်သုံးနေတာလည်းဖြစ်ပါတယ်။

ဟွာဝေးဘဏ္ဍာရေးအရာရှိချုပ် မုံဝမ်ကျိုဟာ သူ့အပေါ် ငွေကြေးဆိုင်ရာ ဘဏ်လိမ်လည်မှုနဲ့ ပတ်သက်တဲ့ပြစ်မှုကို အဆုံးသတ်ဖို့ အမေရိကန်အစိုးရရှေ့နေတွေနဲ့ သဘောတူညီမှုရရှိခဲ့တယ်လို့ စက်တင်ဘာ ၂၄ ရက်မှာ တာဝန်ရှိသူတွေက ပြောကြားလိုက်ပြီး တရုတ်နဲ့အမေရိကန်အကြား တင်းမာမှုကို ဖြေလျှော့ပေးတဲ့အနေနဲ့ ကနေဒါနိုင်ငံကို ထွက်ခွာခွင့် ပြုလိုက်ပါတယ်။ 

ကြားနာမှုအပြီး တရားရုံးကထွက်လာချိန်မှာ မုံဝမ်ကျိုက သူ့အမှုကို တရားစီရင်ရေး လုပ်ငန်းစဉ်မှာ သူ့ရဲ့တရားမျှတမှုကို ဆောင်ကြဉ်းပေးသူအားလုံးကို ကျေးဇူးတင်ကြောင်း နာမည်ဖော်ပြ ပြောဆိုသွားပြီး သူ့ရဲ့ဘဝ ပြောင်းပြန်ဖြစ်ခဲ့ရတဲ့ ၃ နှစ်တာ ခက်ခဲတဲ့အချိန်ကာလအတွင်းမှာ ဘာအဆိုးတွေကြုံကြုံ တနေ့အကောင်းဖြစ်လာမယ်လို့ ယုံကြည်ထားခဲ့ကြောင်း ပြောသွားပါတယ်။

ဟွာဝေးတည်ထောင်သူ ရန်ကျန်ဖှေးရဲ့သမီးဖြစ်သူ မုံဝမ်ကျိုကို ၂၀၁၈ ခုနှစ် ဒီဇင်ဘာလက ဗန်ကူဗာ နိုင်ငံတကာလေဆိပ်မှာ အမေရိကန်က ဖမ်းဝရမ်းနဲ့ ဖမ်းဆီးခဲ့တာပါ။ 

အမေရိကန် ဆန်ရှင်လုပ်ထားတဲ့ အီရန်နိုင်ငံရှိ ဆက်သွယ်ရေးပစ္စည်းကိရိယာကုမ္ပဏီကြီးကို စီးပွားရေးဆက်ဆံမှုနဲ့ ပတ်သက်ပြီး HSBC ကို လှည့်ဖြားခဲ့တဲ့အတွက် ဘဏ်နဲ့ကြေးနန်းဆိုင်ရာ လိမ်လည်မှု စွပ်စွဲချက်နဲ့ တရားစွဲခံခဲ့ရပါတယ်။

ဟွာဝေးဟာ ၂၀၁၉ ခုနှစ် အမေရိကန်ကုန်သွယ်ရေးအမည်ပျက်စာရင်းမှာ ပါဝင်ခဲ့ပြီး အမေရိကန် အမျိုးသားလုံခြုံရေးနဲ့ နိုင်ငံခြားရေး မူဝါဒအကျိုးစီးပွားကို ဆန့်ကျင်တဲ့ လုပ်ဆောင်ချက်တွေကြောင့် ကုမ္ပဏီရောင်းအားကို ကန့်သတ်ခံခဲ့ရပါတယ်။

မုံဝမ်ကျိုနဲ့ ဟွာဝေးကိုလည်း ရာဇ၀တ်မှုလို့ အမည်ပျက်စာရင်းထဲ ထည့်ခဲ့ပါတယ်။ ဟွာဝေးကို ရာဇ၀တ်မှုလုပ်ငန်းတစ်ခုအနေနဲ့လုပ်ဆောင်ခြင်း၊ ကုန်သွယ်ရေးလျှို့ဝှက်ချက်တွေကိုခိုးယူခြင်းနဲ့ ငွေကြေးအဖွဲ့အစည်းများကို လိမ်လည်ခြင်းတွေအတွက် တရားစွဲခံခဲ့ရပါတယ်။ 

ဟွာဝေးကတော့ အပြစ်မရှိဘူးလို့ လျှောက်လဲခဲ့တာပါ။ မုံဝမ်ကျိုရဲ့ ဗန်ကူးဗားမှာ တရားခံ လွှဲပြောင်းရေးအမှုအပေါ် တရားစီရင်ကြားနာတာကို သြဂုတ်လမှာ အဆုံးသတ်ခဲ့ပြီး အောက်တိုဘာ ၂၁ ရက်မှာ အပြီးသတ် အမိန့်ချမယ်လို့ ရက်သတ်မှတ်ခဲ့ပါတယ်။ 

အမေရိကန်ဟာ မုံဝမ်ကျိုနဲ့ ရက်ရွှေ့ဆိုင်းတရားစီရင်ဖို့ သဘောတူညီချက် ရသွားပြီ ဆိုတဲ့ သတင်းကို ရိုက်တာသတင်းဌာနက ဖော်ပြပါတယ်။

ဒီသဘောတူညီချက်ဟာ  မုံဝမ်ကျိုနဲ့သာ သက်ဆိုင်ပြီး ဟွာဝေးကုမ္ပဏီအပေါ် အမေရိကန်ရဲ့ တရားစွဲဆိုထားမှုတွေကတော့ ကျန်ရှိနေဆဲဖြစ်ပါတယ်။ 

အမေရိကန်နဲ့ တရုတ်အကြား အငြင်းပွားမှုကို ဖြေရှင်းရေးအပြင် ဒီသဘောတူညီချက်ဟာ ၂၀၁၈ ခုနှစ်က မုံဝမ်ကျိုကို ထိန်းသိမ်းထားပြီး သိပ်မကြာခင်မှာပဲ တရုတ်နိုင်ငံမှာ အဖမ်းခံထားရတဲ့ ကနေဒါနိုင်ငံသားနှစ်ဦးဖြစ်တဲ့ စီးပွားရေးလုပ်ငန်းရှင် မိုက်ကယ်စပါဗွာနဲ့ သံတမန်ဟောင်း  မိုက်ကယ် ကိုဗာရင်တို့ လွတ်မြောက်ရေးအတွက် လမ်းခင်းပေးနိုင်တယ်လို့ ခန့်မှန်းထားပါတယ်။

မုံဝမ်ကျိုရဲ့ရှေ့နေတွေကတော့ မုံဟာ အင်အားကြီး နှစ်နိုင်ငံကြားက နိုင်ငံရေးတိုက်ပွဲမှာ အပေါင်ပစ္စည်းသဘောမျိုး ဖြစ်ခဲ့တယ်လို့ ဆိုပါတယ်။ 

အမေရိကန်အဆင့်မြင့်အရာရှိတွေကတော့  မုံရဲ့အမှုကို တရားရေးဌာနကသာ ကိုင်တွယ်နေပြီး အမေရိကန်အစိုးရက တရုတ်နဲ့ ဆက်ဆံရေးချဉ်းကပ်မှုအပေါ် ဆက်နွှယ်မှုမရှိဘူးလို့ ပြောကြားပါတယ်။