ယီမင်နိုင်ငံ မြို့တော်ဆာနာမှာ ဧပြီ ၂၀ ရက်က ရာမဒန် ဥပုသ်လ အထိမ်းအမှတ် ငွေကြေးကူညီထောက်ပံ့လှူဒါန်း အစီအစဉ်တခု ပြုလုပ်နေစဉ် လူတွေတိုးမိနင်းမိပြီး   အနည်းဆုံး ၇၈ ဦး သေဆုံးကာ ဒါဇင်နဲ့ချီပြီး ဒဏ်ရာရရှိခဲ့ပါတယ်။

အစ္စလာမ္မစ်နိုင်ငံ‌ရေးနဲ့ လက်နက်ကိုင်အဖွဲ့အစည်း ဖြစ်တဲ့ ဟူသီတွေက လူအုပ်ကိုထိန်းချုပ်ဖို့ ကြိုးပမ်းတဲ့အချိန်မှာ ကျည်ဆန်က လျှပ်စစ်ဝိုင်ယာကြိုးကို ထိမှန်ခဲ့ပြီး ပေါက်ကွဲခဲ့တဲ့အတွက် အထိတ်တလန့်နဲ့ လူအုပ်ပြိုမှု ဖြစ်ပွားခဲ့တယ်လို့ မျက်မြင်သက်သေတွေက ပြောပါတယ်။

ဟူသီထိန်းချုပ်ထားတဲ့ ပြည်ထဲရေးဝန်ကြီးဌာနရဲ့ ထုတ်ပြန်ချက်မှာတော့ ဖြစ်ခဲ့တဲ့ အဖြစ်အပျက်ဟာ ဝမ်းနည်းဖွယ်ကောင်းပြီး နာကျင်ဖွယ်ဖြစ်ကြောင်း၊ အခုလို ငွေကြေးထောက်ပံ့ပေး အစီအစဉ်ဟာလည်း ပြည်ထဲရေးဝန်ကြီးဌာနနဲ့ အဖွဲ့အစည်းတွေက မပါဝင်ဘဲ ကုန်သည်တွေရဲ့ ကျပန်းခွဲ‌ဝေမှုဖြစ်တယ်လို့ ဆိုပါတယ်။

“သေဆုံးဒဏ်ရာရရှိတဲ့လူတွေကို ဆေးရုံကိုပို့ထားပြီး ဒီကိစ္စနဲ့ပတ်သက်လို့ တာဝန်ရှိတဲ့ ကုန်သည်နှစ်ဦးကို ဖမ်းမိထားပါတယ်” လို့ ဟူသီ ပြည်ထဲရေးဝန်ကြီးဌာနက ပြောပါတယ်။

စုံစမ်းစစ်ဆေးမှုတွေ ပြုလုပ်နေဆဲဖြစ်တယ်လို့ ပြောရေးဆိုခွင့်ရှိသူ ဗိုလ်မှူးချုပ် အယ်လ်အဂျရီ က ပြောကြားခဲ့ပြီး သေဆုံးသူတွေရဲ့ မိသားစုတွေ အားလုံးကို စိတ်ရင်းမှန်နဲ့ ဝမ်းနည်းကြေကွဲကြောင်းလည်း ပြောခဲ့ပါတယ်။

ပေးအပ်တဲ့ငွေဟာ ယီမင် ရီယယ် ၅,၀၀၀ (ဒေါ်လာ ၂၀ နီးပါး) ဖြစ်ပြီး ငွေကြေးထောက်ပံ့ပေးတဲ့ နေရာကို ဟူသီတွေက ပိတ်ထားခဲ့ကာ သတင်းသမားတွေ ဝင်ရောက်ခွင့်ကိုလည်း ပိတ်ပင်ထားတယ်လို့ အေပီသတင်းဌာနက ရေးပါတယ်။

အီရန်ကျောထောက်နောက်ခံပြုတဲ့ ဟူသီတွေဟာ ၂၀၁၄ ခုနှစ်မှာ နိုင်ငံတကာ အသိအမှတ်ပြု အစိုးရကို ဖြုတ်ချခဲ့ပြီး ဆာနာကို ထိန်းချုပ်ထားခဲ့ပါတယ်။

ဆော်ဒီအာရဗျက ၂၀၁၅ မှာ ဝင်ရောက်စွက်ဖက်ဖို့ ကြိုးစားခဲ့ပေမဲ့ နောက်ပိုင်းမှာ အဲ့ဒီပဋိပက္ခတွေဟာ အီရန်ကိုဆန့်ကျင်တဲ့စစ်ပွဲ ဖြစ်လာပြီး ရလဒ်အနေနဲ့ လူပေါင်း ၁ သိန်း ၅ သောင်းကျော် သေဆုံးခဲ့ပြီး ကမ္ဘာ့အဆိုးရွားဆုံး လူသားချင်းစာနာမှုဆိုင်ရာ အန္တရာယ်တွေထဲက တခုလည်း ဖြစ်ပါတယ်။

စီးပွားရေးလုပ်ငန်းရှင် ဦးမောင်ဝိတ်က ဒေါ်ခင်ကြည်ဖောင်ဒေးရှင်းအတွက် ငွေလှူဒါန်းခဲ့တာကို အကြောင်းပြုပြီး နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို စစ်ကောင်စီက စွပ်စွဲထားတဲ့ အဂတိအမှု ၂ ခုကို မေ ၃၁ ရက်က နေပြည်တော်၊ ဇမ္ဗူသီရိအထူးတရားရုံးမှာ ဆက်လက်စစ်ဆေးခဲ့ပါတယ်။

ဒီနေ့ရုံးချိန်းမှာ တရားလိုပြသက်သေ ဦးမောင်ဝိတ် လာရောက်ခဲ့ပြီး ဒေါ်ခင်ကြည်ဖောင်ဒေးရှင်းကို ငွေကြေးလှူဒါန်းခဲ့တာသာဖြစ်တယ်လို့ ထွက်ဆိုခဲ့ပါတယ်။

စေပိုင်ကုမ္ပဏီဥက္ကဋ္ဌ စီးပွားရေးလုပ်ငန်းရှင် ဦးမောင်ဝိတ်က   ဒီကနေ့ရုံးချိန်း အမှုစစ်ဆေးပြီးချိန်မှာ ဒေါ်အောင်ဆန်းစုကြည်ကို   ကန်တော့ခဲ့တယ်လို့ သိရပါတယ်။

ဒီနေ့ရုံးချိန်းကိုရောက်လာတဲ့ အတိုင်ပင်ခံပုဂ္ဂိုလ်ဟာ ကျန်းမာရေးကောင်းမွန်တဲ့ အနေအထားမှာရှိနေတယ်လို့ တရားရုံးနဲ့နီးစပ်သူတွေကပြောပါတယ်။

"ဒီနေ့ အတိုင်ပင်ခံကိုစွပ်စွဲထားတဲ့ အဂတိအမှု ၃ နဲ့ ၄ကို ဆက်စစ်တယ်။ ဦးမောင်ဝိတ် ရောက်လာပြီး ထွက်ဆိုတယ်။ သူကတော့ လှူတယ်ပဲ ထွက်ဆိုခဲ့တာပါ။ ညနေပိုင်းမှာတော့ တရားလို ဦးရဲထက်ကို စစ်ဆေးခဲ့ပါတယ်။" လို့ တရားရုံးနဲ့နီးစပ်သူတစ်ယောက်က ပြောပါတယ်။

စေပိုင်ကုမ္ပဏီဥက္ကဋ္ဌ စီးပွားရေးလုပ်ငန်းရှင် ဦးမောင်ဝိတ်က ဒေါ်ခင်ကြည်ဖောင်ဒေးရှင်းကို လှူဒါန်းခဲ့တဲ့ ငွေကြေးတွေနဲ့ပတ်သက်ပြီး စစ်ကောင်စီက ဒေါ်အောင်ဆန်းစုကြည်ကိုစွဲဆိုထားတဲ့ အဂတိအမှု ၂ မှုကို မေလ ၂ ရက်နေ့က နေပြည်တော်၊ ဇမ္ဗူသီရိအထူးတရားရုံးမှာ စတင်ကြားနာခဲ့ပါတယ်။

တရားလိုအဖြစ်  စစ်ကောင်စီလက်အောက်ခံ အဂတိလိုက်စားမှုတိုက်ဖျက်ရေးကော်မရှင်အဖွဲ့ဝင် ဦးရဲထက်က စွဲဆိုထားတာပါ။

၂၀၂၁ ခုနှစ် ဖေဖော်ဝါရီ ၁ ရက် စစ်အာဏာသိမ်းပြီးနောက် ထိန်းသိမ်းခံခဲ့ရသူတွေထဲမှာ NLDနဲ့ နီးစပ်သူတဦးဖြစ်တဲ့ လုပ်ငန်းရှင်ဦးမောင်ဝိတ်လည်းပါဝင်ခဲ့ပြီး သူ့ကို ဘယ်နေရာမှာထိန်းသိမ်းထားတယ်ဆိုတာ မသိရပါဘူး။

ဦးမောင်ဝိတ်ဟာ မန္တလေးတိုင်းဝန်ကြီးချုပ်ဒေါက်တာဇော်မြင့်မောင်၊ နေပြည်တော်မြို့တော်ဝန် ဒေါက်တာမျိုးအောင်တို့ကို စွဲဆိုထားတဲ့အဂတိအမှုတွေမှာလည်း စစ်ကောင်စီက တရားလိုပြသက်သေအဖြစ် တင်သွင်းတာကိုခံခဲ့ရပါတယ်။

ဦးမောင်ဝိတ်ကတော့ NLD နဲ့ပတ်သက်တဲ့အမှုတွေအားလုံးမှာ သူ့ဘက်က လှူဒါန်းတာတွေသာဖြစ်တယ်လို့ တရားရုံးမှာထွက်ဆိုထားပါတယ်။