ပြီးခဲ့တဲ့ နှစ်သစ်ကူးကာလက ထိုင်းကို အလည်အပတ်ရောက်ရှိလာတဲ့ ထိုင်ဝမ်သရုပ်ဆောင် မင်းသမီး အန်းယူချင်း (ခ) ချာလီအဲန်းနဲ့ သူ့အပေါင်းအဖော်တွေ ထိုင်းရဲရဲ့ ငွေညှစ်မှုခံခဲ့ရတဲ့ အမှုမှာ ပါဝင်ပတ်သက်တဲ့  ရဲဝန်ထမ်း ၆ ဦးကို တာဝန်ရှိသူတွေက ဖေဖော်ဝါရီ ၂ ရက်မှာ ဖမ်းဆီးအရေးယူလိုက်ပါတယ်။

အဆိုပါ ရဲဝန်ထမ်း ၆ ဦးမှာ ဟွေ့ခွမ်နယ်မြေရဲတပ်ဖွဲ့မှ ဒုရဲအုပ်အဆင့် ၂ ဦး၊ ရဲတပ်ကြပ်ကြီး ၁ ဦးနဲ့ ဒုရဲတပ်ကြပ် ၃ ဦးတို့ ပါဝင်ပြီး ပုဒ်မ ၁၄၉ လာဘ်စားမှုနဲ့ အမှုဖွင့်ခံရကာ ရာဇဝတ်မှုဆိုင်ရာ တရားရုံးအချုပ်ခန်းကို ပို့လိုက်ပြီလို့ ဟွေ့ခွမ်နယ်မြေရဲတပ်ဖွဲ့ အထူးစုံစမ်းစစ်ဆေးရေးမှူး ရဲမှူး ထီရဒေ့ချ် ထမ်းဆုရီက ပြောပါတယ်။

အဆိုပါ ပုဒ်မ ၁၄၉ အရ ပြစ်မှုအကြီးအသေးပေါ်မူတည်ပြီး ထောင်ဒဏ် အနည်းဆုံး ၅ နှစ်မှ နှစ် ၂၀ ထိ သို့မဟုတ် ထောင်ဒဏ်တသက် ဒါမှမဟုတ် ငွေဒဏ် ဘတ် ၁ သိန်းမှ ၄ သိန်းထိ ဒါမှမဟုတ် သေဒဏ်ထိ ကျခံရနိုင်တယ်လို့ ဆိုပါတယ်။

ငွေတောင်းခံတဲ့နေရာမှာ မူလက ရဲ ၇ ဦးရှိပေမဲ့ ၁ ဦးက နောက်ထပ်အမှုအခင်း ၁ ခု ပေါ်လာလို့ အဲဒီနေရာက ထွက်သွားတာကြောင့် သူကတော့ အမှုကနေ လွတ်သွားပါတယ်။

အဆိုပါစစ်ဆေးရေးဂိတ်မှာ ရဲဝန်ထမ်း ၁၄ ဦး တာဝန်ထမ်းဆောင်ခဲ့ပြီး လမ်းရဲ့ တဖက်တချက်မှာ ၇ ဦးစီ စောင့်ဆိုင်းခဲ့ကြောင်း၊ ၁၄ ဦးစလုံးကတော့ ဒီမတိုင်ခင် ရှေ့က တာဝန်ဝတ္တရား ပေါ့လျော့လစ်ဟင်းမှုနဲ့ ပုဒ်မ ၁၅၇ အရ ရာထူးမှရွှေ့ပြောင်းခံထားရပြီး ဖြစ်ပါတယ်။

ထိုင်ဝမ်မင်းသမီးနဲ့ အပေါင်းအဖော်တွေဆီက ဥပဒေကတားမြစ်ထားတဲ့ လျှပ်စစ်စီးကရက် တွေ့ပါလျက်၊ ပတ်စပို့ အထောက်အထား မပြည့်စုံပါလျက်နဲ့ ရဲစခန်းမှာ ခေါ်မလာဘဲ ပြန်လွှတ်လိုက်တာနဲ့ ပတ်သက်လို့ ၁၄ ဦးလုံး တာဝန်ဝတ္တရားလစ်ဟင်းမှုနဲ့ အရေးယူခံရတာ ဖြစ်ပါတယ်။

ဒီမတိုင်ခင် ရဲတပ်ဖွဲ့က အဆိုပါအမှုကို လှည့်ပတ်အချိန်ဆွဲနေခဲ့ပြီး ထိုင်းလွှတ်တော်အမတ်ဟောင်း ခွန်ချူဝစ်ကမွန်ဝိဆစ်က ရဲကို ကိုယ်တိုင်ငွေပေးခဲ့ရတယ်ဆိုတဲ့ ထိုင်ဝမ်မင်းသမီးရဲ့ သူငယ်ချင်းကို စင်ကာပူနိုင်ငံကနေ ခေါ်ယူခဲ့ကာ ယမန်နေ့က သက်သေအဖြစ် လာရောက်ရှင်းလင်းစေခဲ့ပါတယ်။

စကိုင်းလို့ခေါ်တဲ့ အဆိုပါ စင်ကာပူနိုင်ငံသားကလည်း အဲဒီညက သူတို့သူငယ်ချင်း မွေးနေ့ကအပြန် ရဲတွေနဲ့တွေ့ကြောင်း၊ ရဲတွေက သူတို့အိတ်ထဲ စစ်ဆေးရှာဖွေရာမှာ အီးစီးကရက် ၃ လိပ်တွေ့လို့ ပြဿနာစရှာတယ်လို့ ဆိုပါတယ်။

သူတို့ကတော့ အဆိုပါစီးကရက်ကို ဘန်ကောက် ညဈေးမှာ ချရောင်းနေတာတွေ့လို့ ဝယ်ခဲ့ပြီး ဥပဒေက တားမြစ်မှန်းလည်း မသိဘူးလို့ ပြောပါတယ်။

အဲဒီနောက် ပတ်စပို့မေးရာမှာ ၄ ယောက်ထဲမှာ ၁ ယောက်ပဲ ပါလာကြောင်း၊ မိတ္တူပဲရှိတယ် စာအုပ်က ဟိုတယ်မှာ ကျန်ခဲ့တယ်၊ ပြန်သွားယူရမလားလို့မေးတော့ ရဲက မလိုဘူး သွားလေရာ ပတ်စပို့မဆောင်လို့ အပြစ်ရှိတယ်လို့ ပြောပါတယ်။

အီးစီးကရက်ပါတဲ့အတွက် ၁ လိပ်ကို ဘတ် ၈,၀၀၀၊ ၃ လိပ်အတွက် ဘတ် ၂၄,၀၀၀၊ ပတ်စပို့ဆောင်မထားလို့ ၁ ဦးကို ဘတ် ၁,၀၀၀ နဲ့ ၃ ဦးအတွက် ဘတ် ၃,၀၀၀ စုစုပေါင်း ဘတ်ငွေ ၂၇,၀၀၀ ဆောင်ရမယ်၊ မဆောင်ရင် ရဲစခန်းမှာ ၃ ညအိပ်ပြီး တရားရင်ဆိုင်ရမယ်လို့ ပြောတာကြောင့် လွန်စွာစိတ်ညစ်သွားကြပြီး ငွေပေးလိုက်ရတာလို့ ထွက်ဆိုသွားပါတယ်။

ခွန်ချူဝစ်က ဟွေ့ခွမ်ရဲစခန်းရှိ ရဲဝန်ထမ်းအားလုံးပါ ဓာတ်ပုံပြပြီး အဲဒီညက ငွေတောင်းသူတွေကို လက်ညှိုးထိုးပြခိုင်းခဲ့ရာမှာ စကိုင်းကလည်း ၆ ဦးရဲ့ပုံတွေ လက်ညှိုးထိုးပြခဲ့ပါတယ်။

သူတို့သတင်းစာရှင်းပွဲပြီးတာနဲ့ ဟွေ့ခွမ်ရဲတပ်ဖွဲ့ တာဝန်ရှိသူတွေ ရောက်လာပြီး စကိုင်းကို ထပ်မံစစ်ဆေးမေးမြန်းခဲ့ပါတယ်။ အဲဒီနောက် သက်သေအထောက်အထား ခိုင်လုံတာနဲ့ ပါဝင်ပတ်သက်သူ ရဲ ၆ ဦးကို ဖမ်းလိုက်တာဖြစ်ပါတယ်။

ထိုင်ဝမ်မင်းသမီး အန်းယူချင်းကလည်း ခွန်ချူဝစ်ကို ဗီဒီယိုကော်လ်ခေါ်ကာ အမှန်တရားဘက်က ရပ်တည်ပေးတဲ့အတွက် ကျေးဇူးတင်ကြောင်း၊ ခွန်ချူဝစ်ကို ဆွေမျိုးသားချင်းလို သဘောထားပြီး လိုအပ်တဲ့အကူအညီ ပေးမယ့်အကြောင်း ပြောကြားခဲ့ပါတယ်။

ခွန်ချူဝစ်က ရဲတွေ အခုလိုငွေညှစ်ပြီး ရလာတဲ့ငွေတွေဟာ သူတို့အိပ်ကပ်ထဲ တန်းပြီးဝင်တာ မဟုတ်ဘဲ အထက်အရာရှိဆီ ပို့ပေးပြီးမှ အချိုးကျပြန်ရကြောင်း၊ နခွန်းဘန်နယ်မြေထဲမှာ လက်အောက်ခံ ရဲစခန်းပေါင်း ၈၈ ခုရှိပြီး ရဲစခန်း ၁ ခုမှာ တနေ့ကို ဒဏ်ငွေ ဘတ် ၁ သိန်း ရှာပေးရကြောင်း၊ ဒါကြောင့် နခွန်းဘန်နယ်မြေရဲတပ်ဖွဲ့ရဲ့ တလဝင်ငွေဟာ ၂၆၄ သန်းရှိတယ်၊ ဒါတောင် ဘန်ကောက် တခြားနယ်မြေတွေ မပါသေးဘူး၊ ရဲတွေဟာ ကာစီနိုရုံကနေ ငွေမရလို့ စစ်ဆေးရေးဂိတ်ချပြီး ငွေရှာနေတာလို့ သံပုံးတီးပြီး အားလုံးသိအောင် ပြောလိုက်မယ်ဆိုပြီး သတင်းစာရှင်းပွဲမှာ ပြောသွားပါတယ်။

စစ်ကိုင်းတိုင်း၊ စစ်ကိုင်းမြို့မှာ ဒေသခံ လူငယ် ၁ ဦးကို စစ်ကောင်စီက ဖမ်းဆီးသွားပြီး  မိသားစုထံကနေ ကျပ်ငွေ ၁၈ သိန်း အဓမ္မ ငွေညှစ်ယူဆောင်သွားခဲ့တယ်လို့   သူနဲ့ နီးစပ်တဲ့ ဒေသခံတွေရဲ့ ပြောပြချက်အရ သိရပါတယ်။

ရွှေမင်းဝံရပ်ကွက်ထဲက ကိုအောင်ဖြိုးကျော်(ခ)ဖိုးကျော်ကို PDFဖြစ်တယ်ဆိုပြီး စစ်ကောင်စီက သတင်းလွှင့်စွပ်စွဲလိုက်ဖမ်းနေတာကြောင့် ကိုဖိုးကျော်ဟာ အိမ်မနေရဲဘဲထွက်ပြေးနေစဉ် မိသားစုကို ဓားစားခံအဖြစ်ဖမ်းမယ်လို့ ခြိမ်းခြောက်တာကြောင့်  အိမ်ကိုပြန်လာခဲ့ရပြီး မတ်လ ၂၄ ရက် မနက် ၁၀ နာရီလောက်မှာ ဖမ်းဆီးခံခဲ့ရပါတယ်။

အခုလို ဖမ်ဆီးထားစဉ် ငွေပေးရင် ပြန်လွှတ်ပေးမယ်ဆိုပြီး စစ်ကောင်စီက   ကိုဖိုးကျော်ရဲ့ မိသားစုထံကနေ ငွေညှစ်နေတာလို့   မိသားစုနဲ့နီးစပ်သူတစ်ဦးက ပြောပါတယ်။

“ကိုဖိုးကျော်ကို လာဖမ်းတုန်းကလည်း စစ်ကောင်စီတွေက  ငွေ၃ သိန်းကို ပိုက်ဆံထည့်ထားတဲ့အန်ဆွဲထဲကနေ  နေယူသွားတယ်။ နောက်ထပ်လည်း ကိုဖိုးကျော်ကို လွှတ်ပေးမယ်  ၁၅ သိန်းထပ်ပေးလို့ ပြောတယ်။ မိသားစုက လည်းထပ်ပေးလိုက်တယ်။ စုစုပေါင်းဆို ၁၈ သိန်းပေးလိုက်ရတယ်။ အခုလည်း ကိုဖိုးကျော်ကိုဖမ်းထားတယ်။ လွှတ်မပေးသေးဘူး။ လွတ်မပေးတဲ့အပြင် မိသားစုကြောက်တာကို အခွင့်ကောင်းယူပြီး နေအိမ်ကို ထပ်ပြီးချိပ်ပိတ်မခံရအောင် ငွေ ကျပ် သိန်း ၄၀ ထပ်တောင်းနေတယ်။”

စစ်ကိုင်းမြို့ပေါ်မှာ စစ်ကောင်စီတပ်က အခုလိုအပစ်မဲ့ပြည်သူတွေကို ဖမ်းဆီးပြီး ငွေတောင်း ငွေညှစ်နေတာကြောင့်   စစ်ကိုင်းမြို့ခံတွေက  စိုးရိမ်နေကြပါတယ်။

ရန်ကုန်၊ မန္တလေးအပါအဝင် တခြားမြို့တွေမှာလည်း စစ်အာဏာရှင်ဆန့်ကျင်တဲ့ တက်ကြွလှုပ်ရှားသူတွေ၊ လူငယ်လူရွယ်တွေရဲ့ နေအိမ်တွေကို စစ်ကောင်စီတပ်နဲ့ ရဲတွေက ဝင်ရောက်ပြီး ပြည်သူပိုင်ပစ္စည်းတွေနဲ့ ငွေတွေကို အဓမ္မယူသွားတာရှိသလို အဖမ်းခံရတဲ့ အခါမှာလည်း နယ်မြေရဲစခန်းတွေက ငွေညှစ်တောင်းခံတာတွေ ကျယ်ကျယ်ပြန့်ပြန့် လုပ်ဆောင်နေပါတယ်။