ဧရာဝတီတိုင်း၊ ပုသိမ်မြို့မှာ မော်တော်ဆိုင်ကယ်စီးတဲ့ ပြည်သူတွေကို ယာဉ်ထိန်းရဲတွေသာမက အရန်မီးသတ်ဖွဲ့ဝင်တွေနဲ့ စစ်ကောင်စီဩဇာခံ ရပ်ကျေးအုပ်ချုပ်ရေးအဖွဲ့တွေကပါ စစ်ဆေးဖမ်းဆီး ဒဏ်ငွေတောင်းခံနေတယ်လို့ မြို့ခံတွေထံက သိရပါတယ်။
ပုသိမ်မြို့ခံတစ်ဦးက “အရင်က ဆိုင်ကယ်ဖမ်းရင် ယာဉ်ထိန်းတွေပဲ ဖမ်းတာ။ အခုက အရန်မီးသတ်တွေ၊ ရပ်ကွက်အုပ်ချုပ်ရေးကလူတွေပါ ဖမ်းတာ။ ဥပဒေမသိသူတွေ ဖမ်းတော့ ဖမ်းချင်သလိုဖမ်း၊ တောင်းချင်သလိုတောင်းကြတာ”လို့ ပြောပါတယ်။
ပုသိမ်မြို့ပေါ်အပြင် ကျေးရွာတွေအထိဆင်းဖမ်းနေပြီး ပြည်သူတွေဆီကနေ နည်းပေါင်းစုံနဲ့ ငွေတောင်းနေတာလို့လည်း ဒေသခံတယောက်က ပြောပါတယ်။
“အခု ဆိုင်ကယ်တွေ စစ်တာဆိုပြီး အကြောင်းအမျိုးမျိုးပြ ချလန်ဖြတ်မယ်ဆို လုပ်တာတွေများတဲ့ ချာလန်မဖြတ်ဖို့ အနိမ့်ဆုံး တစ်သောင်းက နှစ်သောင်းအထိ တောင်းယူတာတွေ လုပ်တာပေါ့။ ချာလန်ဖြတ်ရင် တရားရုံးသွားရရင်အချိန်ကုန်တော့ မသွားချင်ဘူးလေ။”
စစ်တပ်အာဏာသိမ်းပြီးနောက် ပုသိမ်မြို့မှာ ဆိုင်ကယ်ဖမ်းတာတွေ ပိုလုပ်ဆောင်လာကြောင်း၊ အထူးသဖြင့် စက်တင်ဘာနောက်ဆုံးပတ်ကစပြီး ပိုမိုဖမ်းဆီးနေတာဖြစ်ပြီး ယာဉ်စည်းကမ်းဖောက်ဖျက်လို့ တရားရုံးတင်ရင် ဒဏ်ငွေ ကျပ် ၃၀,၀၀၀ ပေးရတယ်လို့ မြို့ခံတွေထံက သိရပါတယ်။
ဗုံးခွဲမှုသံသယနဲ့ စွပ်စွဲဖမ်းဆီးခံထားရတဲ့ ရန်ကုန် အင်းစိန်ထောင်တွင်းက လူငယ်တွေကို ပြန်လွှတ်ပေးမယ်ဆိုပြီး မိသားစုဝင်တွေဆီကနေ အကြမ်းဖက်စစ်အုပ်စုက ပိုက်ဆံတောင်းယူတာတွေရှိနေတယ်လို့ ဖမ်းဆီးခံရသူတွေရဲ့ ဆွေမျိုးတွေထံက သိရပါတယ်။
ဖမ်းဆီးခံလူငယ်တစ်ဦးရဲ့ မိသားစုဝင်က“ သူ့ကို ဗုံးခွဲတယ်ဆိုပြီး ခေါင်းစဉ်တပ်ဖမ်းသွားတာပါ။ အထဲမှာ မသေရုံတမယ် ရိုက်နှက်ခံထားရတယ်လို့ အစ်ကိုတို့ ကြားရတယ်။ ကိုယ်မလုပ်တဲ့ အရာတစ်ခုအတွက် နှိပ်စက်ခံနေရတာ လုံးဝမတရားဘူး။ လွှတ်ပေးမယ် ပိုက်ဆံပေးဆိုလို့ ပိုက်ဆံတွေလည်း တော်တော်ကုန်နေပြီ။ ခုဆို သိန်း ၈၀ နီးပါးတောင်ရှိနေပြီး ခုထိ လွှတ်မပေးသလို ဘာသတင်းမှလည်းမကြားရဘူး” လို့ ပြောပါတယ်။
ထောင်ထဲမှာ ရိုက်နှက်စစ်ကြောမေးမြန်းခံနေရတာနဲ့ ပတ်သက်လို့လည်း မိသားစုဝင်တွေက စိုးရိမ်ပူပန်နေကြပါတယ်။
ရန်ကုန်မြို့တွင်းဖြစ်ပွားခဲ့တဲ့ ဗုံးပေါက်ကွဲမှုတွေနဲ့ ပတ်သက်လို့ အကြမ်းဖက်စစ်အုပ်စုက တွေ့ရာကြုံရာ အနီးအနားကလူတွေကို တရားခံအဖြစ်ဖမ်းဆီးပြီး မေးမြန်းဖို့ဆိုပြီး ခေါ်သွားတာတွေလည်း အများအပြားရှိနေပါတယ်။
ဖမ်းဆီးခံ တချို့လူငယ်တွေကိုလည်း ပုဒ်မအမျိုးမျိုးတပ်ပြီး စစ်ကောင်စီမီဒီယာတွေကနေ မဟုတ် မမှန်လုပ်ကြံသတင်းတွေနဲ့ ဝါဒဖြန့်နေတာတွေလည်း ရှိနေပါတယ်။
