ရန်ကုန်တိုင်း၊ သင်္ဃန်းကျွန်းမြို့နယ်၊ ငမိုးရိပ်ရပ်ကွက် ၉ လမ်းက လူငယ်နှစ်ဦး မတ် ၂၅ ရက် ည ၁၀ နာရီလောက်မှာ ကွမ်းယာထွက်ဝယ်ချိန် လုံခြုံရေးကင်းလှည့်တဲ့ ကားနဲ့တွေ့ပြီး ဖမ်းဆီးခေါ်ဆောင်ခံခဲ့ရတယ်လို့ ရပ်ကွက်နေပြည်သူတွေက ပြောပါတယ်။

အဲဒီလူငယ်နှစ်ဦးကို ညမထွက်ရအချိန် အပြင်ထွက်လို့ဆိုတဲ့ အကြောင်းပြချက်နဲ့ ဖမ်းဆီးခဲ့တာဖြစ်ပြီး ရန်ကုန်မှာ သတ်မှတ်ထားတဲ့ညမထွက်ရအချိန်က ည ၁၂ နာရီဖြစ်တာကြောင့် ငွေညှစ်ချင်တာကြောင့် ဖမ်းတဲ့သဘောဖြစ်တယ်လို့ ဆိုပါတယ်။

ငမိုးရိပ်ရပ်ကွက်မှာနေထိုင်သူတဦးက "ဒီမနက်ဘဲ တယောက်ငါးသောင်းနဲ့ ပြန်ရွေးထုတ်လာကြတယ်။ သူတို့ လမ်းထိပ်ထွက်တဲ့အချိန် ကင်းလှည့်တဲ့ကားနဲ့တိုးပြီး ဖမ်းခံရတာလို့ ပြောတယ်" ရပ်ကွက်နေသူတဦးက ပြောပါတယ်။

ဖမ်းဆီးခံရသူနှစ်ဦးအနက် တဦးက အဲဒီလမ်းက ဒလန်တဦးရဲ့သားဖြစ်နေလို့ ဒီလောက်ငွေပမာဏ နဲ့ ပြန်လွှတ်ပေးလိုက်ပုံရတယ်လို့ ရပ်ကွက်အတွင်း နေထိုင်သူတွေက ပြောပါတယ်။

ရန်ကုန်မြို့မှာ အခုနောက်ပိုင်း လူငယ်တွေကို စစ်ကောင်စီတပ်နဲ့ရဲတွေက အကြောင်းမဲ့ ပစ်မှတ်ထားဖမ်းဆီးပြီး ငွေနဲ့ ပြန်ရွေးခိုင်းတာတွေ ဆက်တိုက်ပြုလုပ်နေကြတယ်လို့ မြို့ခံတွေကပြောပါတယ်။ 

မန္တလေးတိုင်း၊ ကျောက်ဆည်မြို့နယ်၊ မင်းဝံကျေးရွာက အသက် ၁၅ နှစ်အောက် ကလေးငယ် ၁၀ ဦးကို စစ်ကောင်စီတပ်သားတွေက ဖမ်းဆီးသွားပြီး ဒီဇင်ဘာ ၁၄ ရက်နေ့မှာ မိဘတွေက ငွေနဲ့ပြန်ရွေးခဲ့ရတယ်လို့ ဒေသခံတွေဆီက သိရပါတယ်။

အမည်မဖော်လိုသူတဦးက “ဒီဇင်ဘာ ၁၀ ရက်နေ့ အသံတိတ်သပိတ်နေ့က ကလေးတွေက လက်သုံးချောင်းထောင်လိုင်းပေါ်တင်ခဲ့ပြီးတဲ့နောက် အိမ်တွေကို လာဖမ်းသွားကြတာ။ ဖမ်းဆီးခံရတာ ကလေးငယ် ယောကျ်ားလေး ၆  ယောက်နဲ့ မိန်းကလေး ၄ ယောက်၊ စုစုပေါင်း ၁၀  ယောက်ပေါ့” လို့ ပြောပါတယ်။

စစ်ကောင်စီတပ်သားတွေဟာ ဒီဇင်ဘာ ၁၄ ရက်နေ့၊ နေ့လယ် ၂ နာရီထက် နောက်မကျစေဘဲ ကလေးတွေကို ငွေနဲ့လာရွေးဖို့ ဖမ်းဆီးခံရတဲ့ကလေးတွေရဲ့ အုပ်ထိန်းသူတွေဆီကို ဆက်သွယ်လာတယ်လို့ ဒေသခံတွေက ပြောပါတယ်။

“ကလေးတွေကို မနေ့က နေ့လယ် ၂ နာရီမတိုင်ခင် ကလေး ၁ ယောက် ငွေ ၆ သိန်းနဲ့လာရွေးရမယ်။ မဟုတ်ရင် ထောင်ချမယ်လို့ ခြိမ်းခြောက်လို့သွားရွေးရတာ။ စျေးညှိရင်းနဲ့ကလေး ၁ ယောက် ၅ သိန်းနှုန်းနဲ့ သိန်း ၅၀ ပေးမှ ကလေးတွေကို ပြန်လွှတ်ပေးတယ်” လို့ ငွေပေးပြန်ရွေးခဲ့ရတဲ့ မိဘတွေနဲ့နီးစပ်သူတဦးက ပြောပါတယ်။

စစ်ကောင်စီတပ်သားတွေ ကလေးငယ်တွေကို ဖမ်းဆီးပြီး ငွေတောင်းခံတဲ့ဖြစ်စဉ်မှာ စစ်ကောင်စီခန့် မင်းဝံကျေးရွာ အုပ်ချုပ်ရေးမှူးဟာ အဓိကပါဝင်သူတဦးဖြစ်တယ်လို့  ဒေသခံကျေးရွာသားတွေက သုံးသပ်ပြောဆိုနေကြပါတယ်။

ပြီးခဲ့တဲ့ ဒီဇင်ဘာ ၁၂ ရက်နေ့ကလည်း ကျောက်ဆည်မြို့၊ ရဲစုရပ်ကွက်က ယခင်ရပ်ကွက်အုပ်ချုပ်ရေးမှုးဟောင်း ဦးတိုးကို ပုဂ္ဂိုလ်ရေးအမြင်မကြည်လင်တဲ့ လက်ရှိအုပ်ချုပ်ရေးမှူးက စစ်ကောင်စီကို မဟုတ်မမှန် သတင်းပေးခဲ့တာကြောင့် အကြမ်းဖက်ဖမ်းဆီးခံရသေးတယ်လို့ သိရပါတယ်။