ဘရာဇီးနဲ့ အာဂျင်တီးနားအသင်းတို့ ယှဉ်ပြိုင်မယ့် ကမ္ဘာ့ဖလားခြေစစ်ပွဲမှာ တိုက်စစ်မှူး မက်ဆီ ပါဝင်ကစားမယ်လို့ အာဂျင်တီးနားနည်းပြ စကာလိုနီက အတည်ပြု ပြောကြားလိုက်ပါတယ်။
နည်းပြ စကာလိုနီက “ဥရုဂွေးနဲ့ပွဲမှာ မိနစ်နည်းနည်းပဲ ကစားတာက သူ့အတွက် အကောင်းဆုံးဖြစ်မယ်လို့ ထင်တယ်။ ဘရာဇီးနဲ့ပွဲမှာ သူကစားမယ်လို့ အတည်ပြုနိုင်ပြီး သူ့ ကြံ့ခိုင်မှုကောင်းမွန်ဖို့ မျှော်လင့်တယ်” လို့ ပြောပါတယ်။
မက်ဆီဟာ ဥရုဂွေးအသင်းနဲ့ ယှဉ်ပြိုင်ကစားခဲ့တဲ့ပွဲမှာ ၁၅ မိနစ်လောက်ပဲ လူစားဝင်ကစားသမား အဖြစ် ပါဝင်ကစားခဲ့ပါတယ်။
ဒါပေမဲ့ သူ့ရဲ့ တံကောက်ကြောဒဏ်ရာနဲ့ ဒူးဒဏ်ရာမှာ ပျောက်ကင်းနေပြီဖြစ်တာကြောင့် ဘရာဇီးနဲ့ ပွဲအတွက် အနားပေးထားတာဖြစ်နိုင်ကြောင်း သုံးသပ်နေကြတာပါ။
ပီအက်စ်ဂျီအသင်းနဲ့ အာဂျင်တီးနား ဘောလုံးအဖွဲ့ချုပ်တို့အကြား မက်ဆီရဲ့ ပွဲကစားချိန်နဲ့ ပတ်သက်ပြီး သဘောတူညီမှု ရယူထားတယ်လို့လည်း သတင်းထွက်ခဲ့ပါသေးတယ်။
