အမျိုးသားညီညွတ်ရေးအစိုးရ (NUG)၊ ကာကွယ်ရေးဝန်ကြီးဌာန အမြဲတမ်းအတွင်းဝန် ဦးနိုင်ထူးအောင် ပါဝင်ဆွေးနွေးသွားမယ့် "တကျော့ပြန် ဖက်ဆစ်တော်လှန်ရေး" စကားဝိုင်း ကျင်းပသွားဖို့ ရှိနေပါတယ်။

မတ်လ ၂၇ ရက် အခုညနေ ၃ နာရီမှာ ပြုလုပ်မယ့် ဒီစကားဝိုင်းမှာတော့ ဦးနိုင်ထူးအောင်နဲ့အတူ CDM ဗိုလ်ကြီး ကိုလင်းထက်အောင်၊(PDF ရဲဘော်တယောက်ဖြစ်တဲ့ ဂျော့ရှ်၊ Student Armed Force က ရဲဘော်တယောက်ဖြစ်တဲ့ မဟန်နီနွေဦးတို့ကလည်း ပါဝင်ဆွေးနွေးသွားကြမယ်လို့ ဆိုပါတယ်။

မြန်မာနိုင်ငံလွတ်လပ်ရေးရဖို့ တော်လှန်ခဲ့တဲ့ ဖက်ဆစ်ဂျပန် တော်လှန်ရေးဟာ ၇၈ ပြည့်ပြီဖြစ်ပေမယ့် လတ်တလောအချိန်မှာတော့ စစ်အာဏာရှင်ကိုတော်လှန်တဲ့ တကျော့ပြန် ဖက်ဆစ်တော်လှန် ရေးကတော့ ၂ နှစ်ပြည့်ခဲ့ပြီ ဖြစ်ပါတယ်။

မြန်မာပြည်သူတွေဟာ ဒီမိုကရေစီအတွက် နှစ်ရှည်လများ ငြိမ်းချမ်းစွာဆန္ဒထုတ်ဖော်ခဲ့ကြပေမဲ့ စစ်အာဏာရှင်တွေဟာ ပြည်သူဆန္ဒကို လစ်လျူရှုပြီး ပြည်သူကို အကြမ်း ဖက်ရက်စက်ခဲ့ကြလို့ လက်နက်ကိုင် ဖက်ဆစ်တော်လှန်ရေးအဖြစ် ကူးပြောင်းလာပုံ၊ စစ်ပွဲတစ်ခုမှာ လေကြောင်းထိုးစစ်က ဘယ်လောက် အရေးကြီးလဲ၊ စစ်ပွဲတစ်ခု အနိုင်အရှုံးအတွက် အဆုံးအဖြတ်ကဘာဖြစ်မလဲစတာတွေဆွေးနွေးကြမှာပါ။

ဒါ့အပြင်တကျော့ပြန် ဖက်စစ်တော်လှန်ရေးလူငယ်တွေဖြစ်ကုန်ကြရတဲ့ အပေါ် လူငယ်တွေရဲ့အမြင်၊ Dragon Fly လို Campaign က ပြည်သူတွေရဲ့ ထည့်ဝင်မှုတွေက တော်လှန်ရေးကို ဘယ်လို အထောင်အကူပြုနေပြီလဲ၊ ပြောသင့်တာမပြောပြန်ရင် ထိန်ချန်မှု၊ မပြောသင့်တာ ပြောမိပြန်ရင် ပေါက်ကြားမှု ဒီအစွန်း ၂ ဘက်မှာ စစ်ရေး၊ လုံခြုံရေးနဲ့ တော်လှန် ရေးအတွက် ဘယ်လို ချိန်ညှိသင့်လဲ၊ တော်လှန်ရေးမှာ fundraiserတွေရဲ့ အရေးပါပုံ၊ အခက်အခဲနဲ့ အချို့စစ်ရေး၊ လုံခြုံရေးနဲ့ပတ်သက်တဲ့ကိစ္စတွေမှာ အခြေအနေအရ အလုံးစုံ ပြန်လည်အသိမပေးနိုင်တဲ့ အခြေ အနေ ဘာတွေရှိနေလဲ စတဲ့အကြောင်းအရာတွေကို ဆွေးနွေးသွားကြမယ်လို့ သိရပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာဖြစ်ပြီး နိုင်ငံတဝန်းမှာတော့ သခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။

"ကရင်နီစစ်ရေးနှင့် နိုင်ငံရေးအရွေ့" စကားဝိုင်းကို လာမယ့် မတ် ၂၉ ရက်ညပိုင်းမှာ ကျင်းပသွားဖို့ရှိနေပြီး အားလုံးပါဝင် ဆွေးနွေးနိုင်ဖို့ ဖိတ်ခေါ်ထားပါတယ်။

ဒီစကားဝိုင်းကိုတော့ စည်းရိုးပရောဂျက်အဖွဲ့သားတွေက စီစဉ်ပြီး ကရင်နီအမျိုးသားများ ကာကွယ်ရေးတပ် (KNDF)ရဲ့ဥက္ကဋ္ဌ  ကရင်နီပြည်နယ် အုပ်ချုပ်ရေးကောင်စီ ဒုတိယ ဥက္ကဋ္ဌ ဖြစ်သူ ခွန်းဘီထူး၊ KNDF ဒုစစ်ဦးစီးချုပ်မာဝီနဲ့ ကရင်အမျိုးသမီးအစည်းအရုံးက ဆရာမနော်ဆဲဆဲတို့က ပါဝင်ဆွေးနွေးသွားကြမှာ ဖြစ်ပါတယ်။

ကရင်နီပြည်ကတော့ နွေဦးတော်လှန်ရေးကာလ ၂ နှစ်ကျော်အတွင်း တိုက်ပွဲအရှိန်တွေ ပြင်းထန်နေတဲ့ ဒေသတခုဖြစ်ကာ ပြီးခဲ့တဲ့ မတ် ၁၆ ရက်တုန်းကတော့ ကရင်နီ (ကယား) ပြည်နယ်၊ သံလွင်အရှေ့ခြမ်းရှိ  စစ်ကောင်စီစစ်တပ် ခလရ ၁၃၅ ရှေ့တန်းစခန်းကို ကရင်နီ ကွန်မန်ဒိုတပ်ဖွဲ့က တိုက်ခိုက်သိမ်းပိုက်နိုင်ခဲ့တယ်လို့ ကရင်နီစစ်ဘက်ဆိုင်ရာဗဟို သတင်းထုတ်ပြန်ရေးအဖွဲ့က ထုတ်ပြန်ပါတယ်။

ကရင်နီကွန်မန်ဒိုတပ်ဖွဲ့က အဆိုပါ စခန်းကို မတ် ၁၆ ရက်နေ့ ညနေ ၅ နာရီကနေ ၆ နာရီအထိ တနာရီကြာ တိုက်ခိုက်သိမ်းပိုက်ခဲ့တာဖြစ်ပြီး အလောင်း ၃ လောင်း၊ လက်နက်ခဲယမ်းတွေနဲ့ ဆက်သွယ်ရေးစက်ကြီး တလုံးတို့ကို သိမ်းဆည်းရမိခဲ့တယ်လို့ ဆိုပါတယ်။

ဒါ့အပြင် ပြီးခဲ့တဲ့ ရက်ပိုင်းကလည်း ဒီးမော့ဆိုမြို့နယ်ထဲမှာ မတ် ၂၀ ရက်ကနေ ၂၃ ရက်အထိ ၄ ရက်တာအတွင်းဖြစ်ပွားခဲ့တဲ့ တိုက်ပွဲတွေမှာ စစ်ကောင်စီ တပ်တွေဘက်က အရာရှိတွေအပါအဝင် အယောက် ၉၀ ကျော် သေဆုံးပြီး ၅၀ ထက်မနည်း ထိခိုက်ဒဏ်ရာရခဲ့ကာ လက်နက်ခဲယမ်းတွေ သိမ်းဆည်းရရှိခဲ့တယ်လို့ ကရင်နီအမျိုးသားများကာကွယ်ရေးတပ် KNDF ဗဟိုသတင်းနှင့် ပြန်ကြားရေးဌာနက ထုတ်ပြန်ထားပါတယ်။

လတ်တလောမှာတော့ ကရင်နီဒေသက တပ်ရင်းတွေအတွက် ထုတ်လုပ်ရေးစရိတ်လိုအပ်ချက်တွေ ရှိနေသလို ထောက်ပံ့ကူညီနိုင်ရေးအတွက် စည်းရိုးပရောဂျက်ကိုလည်း လုပ်ဆောင်နေပါတယ်။

အခုပြုလုပ်မယ့် "ကရင်နီစစ်ရေးနှင့် နိုင်ငံရေးအရွေ့" စကားဝိုင်းမှာတော့ ဘာကြောင့် စည်းရိုးပရောဂျက်မှာ ပါဝင်သင့်တာလဲ၊ ကရင်နီနဲ့ စစ်ရေးရဲ့ နိုင်ငံရေးက ဘယ်ကို ရွေ့နေပြီလဲ၊ ကရင်နီရဲ့ စစ်ရေး၊ နိုင်ငံရေးအရွေ့က တနိုင်ငံလုံးအတွက် ဘယ်လောက်ထိ အရေးပါလဲစတဲ့ မေးခွန်းတွေကို အချက်အလက်နဲ့ အတွေ့အကြုံတွေကို ကိုးကားပြီး ဖြေကြားပေးသွားမယ်လို့ ဆိုပါတယ်။

စည်းရိုးပရောဂျက်မှာ ပါဝင်ထောက်ပံ့လိုတယ်ဆိုရင်တော့ ဖော်ပြပါ တရားဝင် ဖေ့စ်ဘွတ်ခ်အင်တာနက်လူမှုကွန်ရက်စာမျက်နှာ - https://www.facebook.com/permalink.php?story_fbid=pfbid02CCA6Y1JkCHJtm99u2KZMPcDMHGP2xCowkLG8kvLLWjTM3nH1VuGJbK63YkYDWEZ2l&id=100090713422974 ကတဆင့် နိုင်ငံတကာက ကိုယ်စားလှယ်အသီးသီးနဲ့ ဆက်သွယ်ကူညီနိုင်မှာ ဖြစ်ပါတယ်။