ရန်ကုန်တိုင်း၊ ကြည့်မြင်တိုင်တဖက်ကမ်း တွံတေးမြို့နယ်ထဲက စက်ဆန်းရပ်ကွက်မှာ ရပ်ကွက်နေ ပြည်သူတွေအပေါ် မတရားငွေကောက်ခံနေတဲ့ စစ်ကောင်စီလက်အောက်ခံ EPC ရုံးတခုကို နိုဝင်ဘာ ၂၀ ရက် ည ၈ နာရီ ၁၀ မိနစ်လောက်က လက်လုပ်ဖောက်ခွဲရေးမိုင်းနဲ့ ဖောက်ခွဲတိုက်ခိုက်ခဲ့တယ်လို့ သိရပါတယ်။
ရပ်ကွက်နေ ပြည်သူတွေအပေါ် အပြောအဆိုရိုင်းဆိုင်းတာ၊ လျှပ်စစ်မီးဖြတ်တောက်တာတွေနဲ့ အနိုင်ကျင့် မတရားငွေကောက်ခံတဲ့အတွက် အခုလို ဆောင်ရွက်ရတာဖြစ်တယ်လို့ Union of Myanmar Civil Defence (UMCD) တာဝန်ရှိသူတဦးက ပြောပါတယ်။
“စက်ဆန်းရပ်ကွက် EPC ရုံးရဲ့ တာဝန်ခံရှိနေတဲ့အချိန်မှာ လက်လုပ်ဖောက်ခွဲရေးမိုင်း ၂ လုံးနဲ့ ဖောက်ခွဲတိုက်ခိုက်ခဲ့ပေမဲ့ ၁ လုံးမှာ Error ကြောင့် မပေါက်ကွဲခဲ့ဘဲ လက်လုပ်ဖောက်ခွဲရေးမိုင်း ၁ လုံးနဲ့သာ စစ်ဆင်ရေးကို ဆောင်ရွက်နိုင်ခဲ့သလို ဖောက်ခွဲမှုအပြီးမှာ စစ်ကောင်စီတပ်ဘက်က သေနတ်နဲ့ ၂ ချက်လောက် ရမ်းသန်းပစ်ခတ်ခဲ့ပြီး ထိခိုက်သေဆုံးမှု အသေးစိတ်ကိုတော့ စုံစမ်းနေဆဲဖြစ်တယ်။”
အခုလက်ရှိအချိန်ထိ စက်ဆန်းရပ်ကွက် အနီးအနား ပတ်ဝန်းကျင်မှာ စစ်ကောင်စီတပ်တွေနဲ့ ရဲတပ်ဖွဲ့က ကင်းလှည့်စစ်ဆေးတာတွေ ပြုလုပ်နေတယ်လို့ စက်ဆန်းရပ်ကွက်အတွင်း နေထိုင်သူတဦးက ပြောပါတယ်။
အဆိုပါ စစ်ဆင်ရေးကို Union of Myanmar Civil Defence (UMCD) ရဲ့ အင်အားစုဖြစ်တဲ့ Yangon Underground Youth Organization (Y.U.Y.O) က လုပ်ဆောင်ခဲ့တာဖြစ်ပြီး တော်လှန်ရေးအဖွဲ့သားတွေ ထိခိုက်မှုမရှိဘဲ ဘေးကင်းလုံခြုံတဲ့နေရာကို ရောက်ရှိနေပြီဖြစ်တယ်လို့ UMCD ရဲ့ လူမှုကွန်ရက် စာမျက်နှာပေါ်မှာ ထုတ်ပြန်ထားပါတယ်။
UMCD အင်အားစုအနေနဲ့ ၂၀၂၂ ခုနှစ် အောက်တိုဘာ ၂၅ ရက်ကလည်း မှော်ဘီ တိုးလ်ဂိတ်အနီးရှိ သန္ဓေပင်ကျေးရွာ အုပ်ချုပ်ရေးမှူးရုံးကို လက်ပစ်ဗုံးပစ်သွင်း တိုက်ခိုက်ခဲ့ပြီး အဝေးထိန်းမိုင်းနဲ့လည်း ထပ်မံဖောက်ခွဲခဲ့ပါသေးတယ်။
ကြည့်မြင်တိုင်မြို့နယ်၊ စက်ဆန်းရပ်ကွက်၊ ဖွံ့ဖြိုးရေးလမ်းရှိ ကျူးကျော်နေအိမ်တလုံးမှာ ဒီကနေ့ ညနေပိုင်းက ဗုံးပေါက်ကွဲမှုဖြစ်ခဲ့ရာ အမျိုးသားတဦး သေဆုံးခဲ့တယ်လို့ ရပ်ကွက်နေသူတွေက ပြောပါတယ်။
နေအိမ်အနောက်ဘက် အိမ်သာသွားတဲ့ ဝါးတံတားပေါ်မှာ ဗုံးပေါက်ကွဲမှုဖြစ်ခဲ့ပြီး အမျိုးသားတဦး သေဆုံးခဲ့တယ်လို့ ရပ်ကွက်နေသူတဦးက ဒီဗွီဘီကို ပြောပါတယ်။
“အုန်းခနဲ အသံကြားပြီး ဗုံးပေါက်မှ သိတာ။ အဲဒီလူက ဗိုက်ပွင့်ပြီး သေနေတာ အိမ်သာသွားတဲ့အချိန် ဗုံးပေါက်တာလားမသိဘူး။ ဘယ်လိုပေါက်လဲတော့ မသိဘူး” လို့ ပြောပါတယ်။
ဗုံးပေါက်ကွဲတဲ့နေအိမ်မှ အိမ်ရှင် ကိုဖြိုးဝေမှာ တိမ်းရှောင်သွားတာကြောင့် စစ်ကောင်စီတပ်နဲ့ ရဲတွေက စစ်ဆေးမှုတွေ ပြုလုပ်နေတယ်လို့ အုပ်ချုပ်ရေးနဲ့နီးစပ်သူတစ်ဦးက ဒီဗွီဘီကို ပြောပါတယ်။
“အိမ်ရှင်က ထွက်ပြေးသွားတော့ သေတဲ့သူကို အတည်ပြုဖို့က ခက်နေတယ်။ ဗုံးစမ်းရင်း ပေါက်တာလား၊ ဘယ်လိုပေါက်လဲတော့မသိဘူး။”
လက်တလောမှာ စစ်ကောင်စီတပ်တွေနဲ့ရဲတွေဟာ ဖွံ့ဖြိုးရေးလမ်းရှိ ကျူးကျော်နေအိမ်တွေကို စစ်ဆေးမှုတွေပြုလုပ်နေတယ်လို့ ရပ်ကွက်နေသူတွေက ပြောပါတယ်။
ဒီကနေ့ မနက်ပိုင်းကလည်း ရွှေပြည်သာမြို့နယ် အမှတ် ၁၅ ရပ်ကွက်၊ နီလာစျေးမှာ ထ/၁၆ ရပ်ကွက်က ရာအိမ်မှူး ဦးဝင်းဇော် သေနတ်နဲ့ပစ်ခတ်ခံရပြီး သေဆုံးခဲ့လို့ ရာအိမ်မှူးဟောင်း ဦးခင်စိုးကိုလည်း စစ်ကောင်စီတပ်တွေက သေနတ်နဲ့ပစ်ခတ်ဖမ်းဆီးခဲ့ပါတယ်။
အလားတူပင် မရမ်းကုန်းမြို့နယ် ဘုရင့်နောင် ၃ ရပ်ကွက် ဦးရေခဲလမ်းနဲ့ အောင်သိဒ္ဓိလမ်းဆုံမှာ ဗုံးနှစ်ကြိမ် ပေါက်ကွဲခဲ့ပေမဲ့ ထိခိုက်ဒဏ်ရာရရှိသူ မရှိဘူးလို့ ရပ်ကွက်နေသူတွေက ပြောပါတယ်။
