စပိန်ဆေးရုံတရုံဟာ နံရိုးတွေကိုခွဲထုတ်ပြီး ရင်ဘတ်ကိုဖွင့်ဖို့ မလိုအပ်တော့ဘဲ စက်ရုပ်နဲ့ ရှေ့ဆောင်ရှေ့ပြေး နည်းပညာကို အသုံးပြုထားတဲ့ လမ်းကြောင်းအသစ်နဲ့ အဆုတ်အစားထိုး ကုသမှု ပြုလုပ်ခဲ့ကြောင်း ကျွမ်းကျင်သူတွေက ပြောပါတယ်။
ဘာစီလိုနာမြို့ရှိ ဗားလ်ဒယ်ဘရွန်ဆေးရုံက ခွဲစိတ်ဆရာဝန်တွေဟာ ဒါဗင်ချီလို့ အမည်ပေးထားတဲ့ လက်တံ ၄ ခုပါ စက်ရုပ်ကို အသုံးပြုပြီး ပျက်စီးနေတဲ့အဆုတ်ကို ဖယ်ရှားပြီးတော့ ရင်ဘတ်ရိုးရဲ့ အောက်ပိုင်း၊ ရင်ဝမ်းတားကြွက်သားရဲ့ အထက်ပိုင်းရှိ ၈ စင်တီမီတာ ခွဲစိတ်မှုကနေတဆင့် အဆုတ်အသစ်တခုကို ထည့်သွင်းဖို့ လူနာရဲ့ အရေပြား၊ အဆီနဲ့ ကြွက်သားတွေပါရှိတဲ့ အစိတ်အပိုင်းငယ်တခုကို ဖြတ်တောက်ခဲ့ပါတယ်။
ခွဲစိတ်မှုအသစ်ဟာ လူနာအတွက် နာကျင်မှုနည်းပါးပြီး ဒဏ်ရာကလည်း အလွယ်တကူ ပိတ်နိုင်တာကြောင့် ၃၀ စင်တီမီတာရှိတဲ့ ခွဲစိတ်မှုနဲ့ အလွန်ဂရုတစိုက် အသေးစိတ်ရတဲ့ ခွဲစိတ်ပြီးချိန်ကာလ လိုအပ်တဲ့ သမားရိုးကျနည်းလမ်းထက် ပိုဘေးကင်းတယ်လို့ ဆိုပါတယ်။
အခုချိန်ထိ အဆုတ်ကင်ဆာကို ကုသဖို့သာ အသုံးပြုခဲ့တဲ့ ရှေ့ဆောင်လုပ်ထုံးလုပ်နည်းကို အဆုတ်အစားထိုးကုသဖို့ လိုအပ်တဲ့ အသက် ၆၅ နှစ်အရွယ် ဇာဗီယာ အမည်ရှိ လူနာကို ပထမဆုံး လုပ်ဆောင်ကုသခဲ့တာပါ။
စပိန်ဟာ ၂၀၂၂ ခုနှစ်မှာ ပျမ်းမျှအလှူရှင် ၇ ဦးနဲ့ အစားထိုးကုသမှု ၁၅ ခုတို့နဲ့ ကိုယ်တွင်းအင်္ဂါ အစားထိုးခြင်းဆိုင်ရာ ကမ္ဘာလုံးဆိုင်ရာ ဦးဆောင်နိုင်ငံဖြစ်ကြောင်း စပိန်ကျန်းမာရေးဝန်ကြီးဌာနရဲ့ အချက်အလက်တွေအရ သိရပါတယ်။
စင်ကာပူနိုင်ငံမှာ ရဲတပ်ဖွဲ့တာဝန်ထမ်းဆောင်နေတဲ့ စက်ရုပ် 'Xavier' ဟာ လမ်းမတွေပေါ်မှာ ကင်းလှည့်ရင်း နိုင်ငံကြီးသား မပီသတဲ့ မြို့သားမဆန် ပြုမူသူတွေကို သတိပေးချက်တွေ၊ လမ်းညွှန် အကြံပြုချက်တွေ ထုတ်ပြန်ပေးဖို့ အဆင်သင့်ဖြစ်နေပါပြီ။
စင်ကာပူရဲ့ Home Team သိပ္ပံနဲ့နည်းပညာအေဂျင်စီမှတီထွင်တဲ့ မျက်လုံးခုနစ်လုံး (သို့) ကင်မရာတွေပါရှိတဲ့စက်ရုပ်ဟာ ဘီးလေးဘီးပေါ်မှာ လိမ့်နေတာပါ။
အလိုအလျောက်မောင်းနှင်နိုင်တဲ့ စက်ရုပ်နှစ်စီးဟာ စက်တင်ဘာလက ကင်းလှည့်ခဲ့ပြီး လူစည်ကားတဲ့ ဈေးဝယ်နေရာနဲ့ လူနေဧရိယာမှာ မှားယွင်းတဲ့ အပြုအမူတွေကို စောင့်ကြည့်ခဲ့ ပါတယ်။
ခြေကျင်လျှောက် လူသွားလမ်းတွေပေါ်မှာ စကူတာဆိုင်ကယ်တစီး မှားယွင်းရပ်ထားတာကို တွေ့ရတဲ့အခါ Xavier စက်ရုပ်ရဲ့မျက်နှာပြင်ပေါ်မှာ မော်တော်ဆိုင်ကယ်တွေ မစီးရ၊ မရပ်နားရပါ ဆိုတဲ့ စာတန်းက တဖျပ်ဖျပ်နဲ့ပေါ်လာပါတယ်။
စက်ရုပ်တွေကို တရားမ၀င်ဆေးလိပ်သောက်ခြင်းနဲ့ လက်ရှိ COVID-19 အုပ်စုအရွယ်အစား ကန့်သတ်ချက်ထက်ကျော်လွန်နေတဲ့ လူစုဝေးခြင်းတွေကို စောင့်ကြည့်ဖို့ ဒီဇိုင်းထုတ်ထားပါတယ်။ စမ်းသပ်ကာလအတွင်းမှာ လူတွေကို သင့်တော်မှန်ကန်တဲ့ အပြုအမူတွေအတွက် ပညာပေးဖို့နဲ့ စောင့်ကြည့်ဖို့အတွက်သာ စက်ရုပ်တွေကို အသုံးပြုမှာဖြစ်ပြီး ဥပဒေစိုးမိုးရေးအတွက် သုံးမှာမဟုတ်ဘူးလို့ စင်ကာပူအာဏာပိုင်တွေက ပြောပါတယ်။
