နှစ်ပေါင်းများစွာ အခြေတည်လာခဲ့တဲ့ အကြမ်းဖက်စစ်ကောင်စီကို အမြစ်ကနေ တွန်းလှန် ဖြိုဖျက်ရာမှာ ပြင်းပြင်းထန်ထန် ဖိအားပေး တိုက်ခိုက်မှုလိုတာကြောင့် One Year Plan ကို ချမှတ်ပြီး အကောင်အထည်ဖော် ဆောင်ရွက်နေတယ်လို့ အမျိုးသားညီညွတ်ရေးအစိုးရ NUG ပြည်ထောင်စုဝန်ကြီးချုပ် မန်းဝင်းခိုင်သန်းက ပြောလိုက်ပါတယ်။

ဧပြီ ၂၇  ရက် ဒီကနေ့ပြုလုပ်တဲ့ ကြားကာလ ဒေသန္တရ ပြည်သူ့အုပ်ချုပ်ရေးဖော်ဆောင်မှု ဗဟိုကော်မတီ အစည်းအဝေးမှာ ခုလိုပြောလိုက်တာပါ။

ပြည်ထောင်စုဝန်ကြီးချုပ်က ခုတပတ်အတွင်း စစ်ရေးဖော်ဆောင်မှုကဏ္ဍပိုင်းမှာ အရှိန်အဟုန် မြှင့်လာပြီး အောင်မြင်မှုတွေရရှိတဲ့ သတင်းတွေကို ကြားသိရကြောင်းနဲ့ အသက်စွန့်ပြီး တာဝန်ယူ ဆောင်ရွက်ပေးနေကြတဲ့ တဦးချင်းစီကို အသိအမှတ်ပြု ကျေးဇူးတင်တယ်လို့လည်း ပြောပါတယ်။

ဒါ့အပြင် နယ်မြေသိမ်းပိုက်နိုင်တဲ့ ဒေသတွေမှာ အုပ်ချုပ်ရေးလုပ်ငန်းတွေ ဆောင်ရွက်နိုင်ဖို့ ပြည်သူ့အုပ်ချုပ်ရေးအဖွဲ့တွေက ဝင်ရောက်ပြီးတော့ ဆက်လက်ပုခုံးပြောင်း တာဝန်ကို ထမ်းဆောင်ကြရမှာကြောင့် အဆင့်ဆင့်လုပ်ငန်းတွေကို မလစ်ဟင်းစေရေးအတွက် ကြားကာလ ဒေသန္တရ ပြည်သူ့အုပ်ချုပ်ရေးဖော်ဆောင်မှု ဗဟိုကော်မတီကို ဖွဲ့စည်းပြီး အုပ်ချုပ်ရေးကိစ္စတွေ ကြိုတင်စီမံ အုတ်မြစ်ချနေတာ ဖြစ်တယ်လို့လည်း ပြောပါတယ်။

နွေဦးတော်လှန်ရေးမှာ NUG အစိုးရအနေနဲ့ စစ်ရေးနဲ့ အုပ်ချုပ်ရေးကို ယှဉ်တွဲပြီး အကောင်အထည်ဖော် ဆောင်ရွက်ရတာဖြစ်ပြီးတော့ မူဝါဒတွေ ချမှတ်ရာမှာလည်း မြေပြင်နဲ့ ကိုက်ညီပြီး အများသဘောဆန္ဒဖြစ်ဖို့ အလေးပြု ဆောင်ရွက်ကြဖို့ ဖြစ်တယ်လို့လည်း ပြည်ထောင်စုဝန်ကြီးချုပ်က ပြောပါတယ်။

ဒါ့အပြင် NUG အစိုးရ ယာယီသမ္မတ ဒူဝါလရှီးလကလည်း အခု ၂၀၂၃ ခုနှစ်ထဲမှာ စစ်ရေးရလဒ်နဲ့ နိုင်ငံရေးရလဒ်တွေ သိသိသာသာထွက်ပေါ်ဖို့ အထူးမျှော်လင့်ထားပြီး “NUG အစိုးရဟာ လေလှိုင်းထဲကအစိုးရ မဖြစ်စေရဘူး” လို့ ပြောထားပါတယ်။

“အာဏာရှင်နိဂုံး ၂၀၂၃” ဆိုတာ သာမန်ကြွေးကြော်သံ တခုမျှသာ မဟုတ်ပါဘူး။ စနစ်တကျ စီမံညှိနိုင်း ပြင်ဆင်ပြီးမှ ထုတ်ပြန်လိုက်တဲ့ တိုက်ပွဲခေါ်သံစစ်စစ်သာဖြစ်ပါတယ်လို့ NUG ကာကွယ်ရေးဝန်ကြီးဌာနကလည်း ဒီကနေ့ သတင်းထုတ်ပြန်ထားပါတယ်။

၂၀၂၃ ဇန်နဝါရီ ၁ ရက်နေ့ကစပြီး ဒီနေ့အထိ PDF တွေပါဝင်တဲ့ တပ်ပေါင်းစုတွေက စစ်ကောင်စီတပ်နဲ့ စခန်းသိမ်းတိုက်ပွဲ ၄၄ ပွဲ၊ လေတပ်စခန်းတိုက်ခိုက်မှု ၆ ခု၊  လက်နက်စက်ရုံများ တိုက်ခိုက်မှု ၉ ခုနဲ့ ရန်သူ့ဌာနချုပ်စခန်း တိုက်ခိုက်မှု ၁၁ ခုထိ ရှိခဲ့တယ်လို့လည်း ဆိုပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပါတယ်။

နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင် ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။

စစ်ကိုင်းတိုင်းမှာ စခန်းသိမ်းတိုက်ပွဲတွေနဲ့ စစ်ကောင်စီစခန်းတွေကို PDF တွေက အပြင်းအထန် တိုက်ခိုက်ဖျက်ဆီးတာတွေကို ဆက်လက်မြင်တွေ့ရမယ်လို့ ဗိုလ်နဂါးက ပြောလိုက်ပါတယ်။

စစ်ကိုင်းတိုင်းက ၁၁ မြို့နယ်အပါအဝင် တိုင်းနဲ့ပြည်နယ် ၈ ခုရှိ မြို့နယ် ၃၇ ခုကို ဖေဖော်ဝါရီ ၂ ရက်မှာ စစ်ကောင်စီက စစ်အုပ်ချုပ်ရေး ကြေညာခဲ့တာပါ။ 

စစ်ကောင်စီက စစ်အုပ်ချုပ်ရေး ကြေညာခဲ့ပေမဲ့ တော်လှန်ရေးအင်အားစုတွေဘက်က နောက်ဆုတ်မသွားဘဲ ကန့်ဘလူမြို့နယ်၊ တန့်ဆည်မြို့နယ်နဲ့ မြင်းမူမြို့နယ်တွေ အပါအဝင် စစ်ကိုင်းတိုင်းထဲက မြို့နယ်တချို့မှာ စခန်းသိမ်းတိုက်ပွဲတွေကို PDF တွေက ဆင်နွှဲခဲ့ပါတယ်။

စစ်ကောင်စီဘက်က စစ်အုပ်ချုပ်ရေးကြေညာပြီး အဆိုးဆုံးအကြမ်းဖက်မှုတွေ မပြုလုပ်နိုင်ခင်မှာ PDF တွေက ကြိုတင်တိုက်ခိုက်တာဖြစ်ပြီး နောက်ထပ်စခန်းသိမ်းတိုက်ပွဲတွေကို ပြည်သူတွေ ဆက်လက်မြင်တွေ့ရမယ်လို့ မြန်မာ့တော်ဝင်နဂါးတပ်တော် ခေါင်းဆောင် ဗိုလ်နဂါးက ပြောလိုက်ပါတယ်။

“စခန်းသိမ်းနိုင်တယ်ဆိုတဲ့ အနေအထားတွေကတော့ ရှေ့လျှောက်မှာ ခုထက်ပိုပြီးတော့ မြင်လာရနိုင်ခြေတွေရှိတယ်လို့ ပြောရမှာပဲ။ စစ်ရေးမှာ အပြင်းထန်ဆုံး အနေအထားနဲ့ ကျနော်တို့က စခဲ့ကြရတယ်။ အခုလို မောင်းပြန်တွေ ကိုင်လာနိုင်တဲ့ အခြေအနေမှာတော့ စိတ်ဓာတ်တက်ကြွမှုအပိုင်းတွေ ပိုလာတယ်။ ကိုင်တွယ်ပစ်ခတ်ရတဲ့ လက်နက်ရဲ့ အရည်အသွေးကလည်း ပိုပြီးမြင့်လာတယ်။ အဲ့ဒီ ၂ ခု ပေါင်းစပ်လိုက်တော့ စစ်ရေးအရှိန်အဟုန်က မြင့်လာတာပေါ့။ သူတို့ဘက်ကလည်း လေကြောင်းတွေနဲ့ အရန်သင့် ပြင်ဆင်ထားတာတွေ ရှိတယ်။ အဲ့ဒီလေကြောင်းကို တုံ့ပြန်တိုက်ခိုက်ဖို့ ဒီဘက်က တနည်းနည်းနဲ့ ကြံဆလာတာတွေ ပြင်ဆင်လာတာတွေ ရှိတယ်ပေါ့။ ဘယ်လိုပဲဆိုဆို နေရာတိုင်းမှာ တပြိုင်နက် တိုက်ခိုက်မှုတို့၊ နောက် အလစ်အငိုက်ချောင်းပြီး တိုက်ခိုက်မှုတို့ ရှိမယ်ဆိုရင်တော့ လေကြောင်းတွေ လစ်သွားချိန်မှာ မကြာခဏ ကျနော်တို့ စခန်းသိမ်းနိုင်တာတွေ ရှိလာမယ်လို့ ယူဆတယ်။ စခန်းသိမ်းတာ မဟုတ်ရင်တောင် စခန်းတွေကို ပြင်းပြင်းထန်ထန် ဝင်ရောက်ဖျက်ဆီးမယ်လို့ ထင်တာပဲ၊ ယူဆရတာပေါ့။”

PDF တွေဘက်က လက်ဦးမှုရယူပြီး တိုက်ခိုက်တယ်ဆိုပေမဲ့ စစ်ကောင်စီက တိုက်ပွဲနဲ့ မသက်ဆိုင်တဲ့ ပြည်သူတွေကို လေကြောင်းအသုံးပြုပြီး အကြမ်းဖက်လာနိုင်တဲ့အတွက် စစ်ကိုင်းဒေသခံတွေအနေနဲ့ ဗုံးခိုကျင်းတွေ ပြင်ဆင်ထားဖို့နဲ့ ရိက္ခာစုဆောင်းထားဖို့ လိုတယ်လို့ ဗိုလ်နဂါးက သတိပေးပါတယ်။

“ကိုယ့်အတွက်ကို ပြင်ဆင်ပြီးတဲ့အပြင် တော်လှန်ရေးအင်အားစုတွေအနေနဲ့ စစ်ရေးက နေ့စဉ်နေ့တိုင်း တိုက်ခိုက်ပြီးတော့ တိုက်ပွဲထဲမှာ ရှိနေရတာမဟုတ်ဘူး။ အားလပ်တဲ့ အချိန်တွေမှာ ပြင်းထန်လာမယ့် စစ်ရေးအတွက် ပြည်သူကို အသိပညာပေးတာအပြင် ပြည်သူတွေရဲ့ ကာကွယ်ရေးလုပ်ငန်းစဉ်တွေမှာ ကိုယ်တိုင်ပါဝင်ပြီးတော့ ပြင်ဆင်ပေးကြဖို့။ ကိုယ့်အတွက်လည်းပြင်ဆင်၊ ပြည်သူ့အတွက်လည်း ပြင်ဆင်ပေးကြဖို့၊ အသိပညာတွေ ဖြန့်ဝေပေးကြဖို့ အဲ့ဒါတွေကို တိုက်တွန်းချင်ပါတယ်။”

စစ်အုပ်ချုပ်ရေး ကြေညာပြီးနောက်ပိုင်း ဖေဖော်ဝါရီ ၁၁ ရက်မှာ အများပြည်သူ လက်နက်ကိုင်ဆောင်ခွင့် ဥပဒေကို စစ်ကောင်စီက အတည်ပြု ထုတ်ပြန်လိုက်ပါတယ်။ 

စစ်ကောင်စီ ကာကွယ်ရေးဝန်ကြီးဌာနရဲ့ သဘောတူညီချက်နဲ့ ပြည်ထဲရေးဝန်ကြီးဌာနကနေ တဆင့် လက်နက်ကိုင်ဆောင်ချင်တဲ့ ပြည်သူတွေဟာ ဝယ်ယူတင်သွင်းခွင့်၊ ရောင်းချခွင့် ရှိတယ်လို့ သူတို့ဥပဒေမှာ ဖော်ပြခဲ့ပါတယ်။ ဒီလုပ်ရပ်ဟာ စစ်ကောင်စီက သူတို့အင်အားနဲ့ တော်လှန်ရေးကို မထိန်းနိုင်တော့လို့ ပြည်သူချင်း ရန်တိုက်ပေးတာလို့ စစ်ကိုင်းနယ်ခံ နိုင်ငံရေးသမားတယောက်က သုံးသပ်ပါတယ်။

“စစ်အုပ်ချုပ်ရေးဆိုပြီး စစ်ကောင်စီဘက်က ထုတ်ပြန်လာတဲ့အချိန်မှာ မြေပြင်မှာ စစ်ရေးအရ ပိုပြီး တင်းမာလာတာတော့ ရှိတယ်။ စစ်ကိုင်းတိုင်းက ဒေသတွေမှာတော့ စစ်အုပ်ချုပ်ရေး မကြေညာလည်းပဲ သတ်ချင်သလိုသတ် မီးရှို့ချင်သလို ရှို့နေတာပဲဗျာ။ အဲ့ဒီအတွက်ကြောင့် စစ်အုပ်ချုပ်ရေး ကြေညာလိုက်လို့လည်း ဘာမှတော့ ထူးခြားသွားမှာ မဟုတ်ပါဘူး။ စစ်ကောင်စီကတော့ သူတို့ကပဲ အုပ်ချုပ်လို့ရနေသယောင်၊ သူတို့ကပဲ အာဏာသက်ရောက်နေသယောင် စစ်အုပ်ချုပ်ရေး ထုတ်ပြန်လိုက်၊ လက်နက်ကိုင်ဆောင်ခွင့်ဥပဒေ ထုတ်ပြန်လိုက် ပုံစံမျိုးစုံ လုပ်နေတာပဲပေါ့။ မြေပြင်မှာတော့ ပြည်သူကတော့ ကိုယ့်ရဲ့မြေပြင်အခြေအနေကို ကိုယ့်ဘာသာ စီမံခန့်ခွဲနေပြီ။ ပြည်သူက တိုင်းပြည်အသစ်တခုဆီကို ကိုယ်ပိုင်ပြဋ္ဌာန်းပြီးတော့ လျှောက်လှမ်းနေပြီဆိုတာ တွေ့ရပါတယ်။ လက်နက်ကိုင်ဆောင်ခွင့်ဆိုတာကြီးကို အတည်ပြုပေးလိုက်တယ် ဆိုတာကတော့ သူ့ရဲ့ နောက်လိုက်နောက်ပါတွေနဲ့ တော်လှန်ရေးကို နှိမ်နင်းဖို့ရာ မဖြစ်နိုင်တော့လို့ ပြည်သူ ပြည်သူချင်း လှည့်တိုက်ပေးလိုက်တဲ့ သဘောလို့ပဲ နားလည်ပါတယ်ဗျ။”

စစ်အုပ်ချုပ်ရေး ကြေညာခံထားရတဲ့ စစ်ကိုင်းတိုင်း၊ မကွေးတိုင်း၊ ချင်းပြည်နယ်နဲ့ ပဲခူးတိုင်းက မြို့နယ်ပေါင်း ၂၄ ခုမှာ သက်ဆိုင်ရာ တိုင်းစစ်ဌာနချုပ်တွေက ဖေဖော်ဝါရီ ၄ ရက် နေ့စွဲနဲ့ သွားလာခွင့်အချိန် ကန့်သတ်အမိန့် ထုတ်ပြန်တင်းကျပ်ခဲ့ပါတယ်။

အမိန့်ကို မလိုက်နာတဲ့သူတွေကို လုံခြုံရေးတာဝန်ထမ်းဆောင်သူတွေက အင်အားသုံး ဖမ်းဆီးပြီး အရေးယူမယ်လို့ စစ်ကောင်စီက အမိန့်စာမှာ ဖော်ပြပါတယ်။