စစ်ကိုင်းတိုင်း၊ ခင်ဦးမြို့နယ် မြို့သစ်ကျေးရွာကို စစ်ကောင်စီတပ်အင်အား ၁၀၀ ကျော်က ဧပြီ ၂၆ ရက်နေ့ ညနေမှာ လက်နက်ကြီး လက်နက်ငယ်တွေနဲ့ ဝင်ရောက်စီးနင်းကာ ၂၇ ရက် မနက်ထိ မီးရှို့ခဲ့တယ်လို့ ဒေသခံတွေက ပြောပါတယ်။

စစ်ကောင်စီဟာ ဧပြီ ၂၅ ရက် နေ့လယ်ပိုင်းကလည်း ရွှေဘိုဘက်မှ ခင်ဦးမြို့နယ် တပင်ကောင်းရွာကို ဝင်ရောက်မီးရှို့ခဲ့ပြီး ညအိပ်တပ်စွဲကာ ဧပြီ ၂၆ ရက် နေ့လယ်မှာ ကံကြီးကုန်းရွာက နေအိမ်အချို့အား မီးရှို့ခဲ့တယ်လို့ ဆိုပါတယ်။

အဲ့လို မီးရှို့မှုကြောင့် ၃ ရက်အတွင်း တပင်ကောင်းရွာမှ နေအိမ် ၂၅ လုံး၊ ကံကြီးကုန်းရွာမှ နေအိမ် ၅ လုံး၊ မြို့သစ်ကျေးရွာမှ အိမ်ခြေ ၄၅၀ ကျော် စုစုပေါင်း ၃ ရက်အတွင်း ကျေးရွာ ၃ ရွာမှ နေအိမ် ၅၀၀ ဝန်းကျင် ဆုံးရှုံးခဲ့ရပါတယ်။

အိမ်ခြေ ၅၀၀ ကျော်ရှိတဲ့ မြို့သစ်ကျေးရွာမှာ ရွာလုံးကျွတ်နီးပါး မီးရှို့ခံထားရပြီး အညာရာသီဥတု နေ့အပူချိန် အရမ်းမြင့်တာကြောင့် ပြည်သူတွေ နေစရာအိမ်မပြောနဲ့ နားခိုစရာ သစ်ပင်တောင် မရှိတော့ဘူးလို့ သိရပါတယ်။

လက်ရှိမှာ ထမင်းစားဖို့အတွက် အနီးနားရှိ ကျေးရွာပြည်သူတွေက ထမင်းထုပ် ဝေငှတာပဲ စားနေရပြီး ချက်ပြုတ်စားဖို့ အိုးခွက်ပန်းကန်လည်း မရှိတော့ဘူးလို့ နေအိမ်မီးရှို့ခံရသူတွေက ပြောပါတယ်။

စာကြည့်တိုက်နဲ့ ဆွမ်းစားကျောင်းပါမကျန် အကုန်မီးရှို့ခံရတာကြောင့် သံဃာတွေ ဆွမ်းစားဖို့တောင် သပိတ်မကျန်တော့ဘူးလို့ ဆိုပါတယ်။

ဧပြီ ၃၀ ရက် မနက် ၈ နာရီ ၅၀ မိနစ် လောက်က ခင်ဦးမြိုနယ်၊ အလယ်လျှိုကျေးရွာကို စစ်ကောင်စီတပ် စစ်ကြောင်းထိုးလာပြီး မီးထပ်ရှို့ခဲ့တယ်လို့ ကျေးရွာဒေသခံတွေက ပြောပါတယ်။

ဒေသခံတဦးက “ဒီမနက်မှာပဲ အလယ်လျှိုကျေးရွာထဲကို ဝင်ပြီး မီးရှို့သွားတာ။ အိမ်ခြေ ဘယ်လောက် မီးရှို့ခံထားရလဲတော့မသိရဘူး” လို့ ပြောပါတယ်။

စစ်ကောင်စီတပ်ဟာ အလယ်လျှိုကျေးရွာကနေ သောက်ကန်ရွာဘက်ကို စစ်ကြောင်းထိုးလာလို့  ခင်ဦးနဲ့ ကန့်ဘလူက ရွာ ၈ ရွာက ဒေသခံ ၅၀၀၀ ကျော် ထွက်ပြေးနေရတယ်လို့ ဆိုပါတယ်။

အလယ်လျှိုကျေးရွာမှာ အိမ်ခြေ  ၅၀၀ လောင်ရှိပြီး အခု မီးရှို့ခံရတာဟာ ဒုတိယအကြိမ်ဖြစ်ပြီး ၂၀၂၂ ခုနှစ် နိုဝင်ဘာလ မီးရှို့ခံရမှုမှာ အိမ်ခြေ ၃၀၀ ကျော် ပျက်စီးခဲ့တယ်လို့  ခင်ဦးမြို့နယ် ကူညီကယ်ဆယ်ရေးအဖွဲ့ရဲ့ မှတ်တမ်းအရ သိရပါတယ်။

အလယ်လျှိုကျေးရွာဟာ ပထမအကြိမ်က အိမ်ခြေ ၃၀၀ ကျော် မီးရှို့ခံထားရပြီး အခုတကြိမ် ရွာလုံး ကျွတ်နိုင်တယ်လို့ ဒေသခံတွေက ဆိုပါတယ်။

ခင်ဦးမြို့နယ်အတွင်းမှာ အာဏာသိမ်းပြီးချိန်ကနေ ဒီနေ့အထိ စစ်ကောင်စီတပ်က ကျေးရွာ ၇၀ မှ နေအိမ် ၄၈၀၀ ကျော်မီးရှို့ခဲ့တာကြောင့် ပြည်သူ ၂၀၀၀၀ ကျော် အိုးအိမ်မဲ့ဖြစ်နေကြပြီး အကူအညီတွေ လိုအပ်နေတယ်လို့ ဒေသတွင်းကူညီကယ်ဆယ်ရေးအဖွဲ့တွေက ပြောပါတယ်။

စစ်ကိုင်းတိုင်း၊ ကန့်ဘလူခရိုင်၊ ကျွန်းလှမြို့ရှိ မြို့မရဲစခန်း ဧပြီ ၁၅ ရက် မွန်းလွဲပိုင်းက တိုက်ခိုက်ခံရပြီး ရဲတပ်ဖွဲ့ဝင်နဲ့ ရဲမိသားစုဝင်တချို့ ထိခိုက်သေဆုံး ဒဏ်ရာရရှိသွားတာရှိတယ်လို့ ဒေသခံတွေဆီက သိရပါတယ်။

စစ်ကောင်စီရဲစခန်း ရဲဝန်ထမ်းလိုင်းခန်းပေါ်ကို  ဒေသခံကာကွယ်ရေးအဖွဲ့တွေက မနေ့ညနေ  ၃ နာရီခွဲလောက်က ဒရုန်းအသုံးပြုပြီး ဗုံးသီးချခဲ့တာကြောင့် ရဲ ၁ ဦးသေဆုံးကာ ၂ ဦးဒဏ်ရာရရှိခဲ့တယ်လို့ ရဲစခန်းနဲ့ နီးစပ်သူတစ်ဦးက ပြောပါတယ်။

“ချတာကတော့  ၂ လုံး ၃ လုံးလောက်ဖြစ်မယ်။ ပေါက်ကွဲသံကတော့ ဆက်တိုက်ကွဲတဲ့ အသံတွေတော့ကြားရတယ်။ ရဲစခန်းထဲက အသိတွေ ဖုန်းဆက်ကြည့်တော့ ဝန်ထမ်းလိုင်းခန်းပေါ်ကျပြီး ပေါက်ကွဲတာတဲ့။ ရဲတပ်ကြပ်တစ်ဦးသေပြီး တပ်ကြပ်ရဲ့ မိန်းမနဲ့သမီးကတော့ ဆေးရုံပို့ထားရတယ်လို့  သိထားရတယ်”လို့ ပြောပါတယ်။

ဒေသခံအမျိုးသားတဦးကတော့ "ကျွန်းလှမြို့လယ်ခေါင်က ရဲစခန်းထဲကို ဒရုန်းနဲ့ ဗုံးသီးချခွဲတာ။ ရဲတပ်ကြပ် ၁ ယောက်နဲ့ ရဲတပ်သား ၁ ယောက်‌သေပြီး တပ်ကြပ်ကတော် အပြင်းအထန်ဒဏ်ရာရလို့ ကန့်ဘလူဆေးရုံကို အရေးပေါ်ပို့လိုက်ရတယ်"လို့ ဒီဗွီဘီကို ပြောပါတယ်။

ဒေသခံပြည်သူ့ကာကွယ်ရေးအဖွဲ့က ဒရုန်းနဲ့ ဗုံးချတိုက်ခိုက်ခဲ့ ဟုတ်မှန်တယ်လို့ပြောဆိုပြီး တိုက်ခိုက်ခဲ့တဲ့ အဖွဲ့အမည်ကိုတော့ လုံခြုံရေးအရ ထုတ်ဖော်ပြောဆိုခြင်းမပြုပါဘူး။

ကျွန်းလှမြို့ပေါ်မှာ သင်္ကြန်ရေကစားနိုင်ဖို့ရာ လုံခြုံရေးတွေ တင်ကျပ်ထားတဲ့ကြားက အခုလို တိုက်ခိုက်ခံလိုက်ရတာလည်းဖြစ်တယ်လို့ ကျွန်းလှမြို့ခံတွေရဲ့ ပြောပြချက်အရသိရပါတယ်။

ပြီးခဲ့တဲ့ မတ်လ ဒုတိယပတ်အတွင်းကလည်း စစ်ကောင်စီလက်အောက်ခံ စစ်သား၊ ရဲနဲ့ ပျူစောထီးတွေပေါင်းပြီး မြို့အဝင်အထွက် ပိတ်ဆို့ခဲ့တာကြောင့် မြို့ပေါ်နဲ့ မြို့နယ်အတွင်းရှိ ကျေးရွာတွေ စီးပွားရေး၊ ကျန်းမာရေး၊ လူမှုရေး အခက်အခဲဖြစ်ခဲ့တယ်လို့ ကျွန်းလှ ကန့်ဘလူ တက်ကြွလှုပ်ရှားသူများအဖွဲ့ -ကန့်ဘလူခရိုင်က ထုတ်ပြန်ခဲ့ပါတယ်။

စစ်ကိုင်းတိုင်း၊ မြင်းမူမြို့နယ်မှာလည်း ထီးဆောင်းကျေးရွာမှာ တပ်စွဲထားတဲ့ စစ်ကောင်စီတပ်ကို ဧပြီ ၁၅ ရက်က လက်နက်ကြီးတွေနဲ့ နှစ်ကြိမ် ပစ်ခတ်တိုက်ခိုက်ခဲ့တယ်လို့ ဒေသခံကာကွယ်ရေးအဖွဲ့ခေါင်းဆောင်တွေဆီက သိရပါတယ်။

ကန့်ဘလူမြို့နယ်၊ ပဇီကြီးရွာကို စစ်ကောင်စီက လေကြောင်းနေတိုက်ခိုက်ခဲ့တာကြောင့် ဒေသခံအရပ်သား ရာနဲ့ချီသေဆုံးခဲ့ရတဲ့အပေါ် လက်တုံ့ပြန်တိုက်ခိုက်ခဲ့တာလို့ ဒေသခံတော်လှန်ရေးအင်အားစုခေါင်းဆောင်တွေက ပြောပါတယ်။

မြင်းခြံခရိုင် Zero ပြောက်ကျားတပ်ဖွဲ့ တပ်ရင်းမှူး ကိုသက်ကြီးက “ကန့်ဘလူမြို့နယ်၊ ပဇီကြီးကျေးရွာက ပြည်သူတွေအတွက် သွေးကြွေးပြန်တောင်းတာဗျ။ ပထမ ၃ နာရီ ၄၅ မိနစ်က အချိန်မှ ကျနော်တို့ GPS စနစ်ပါတဲ့ ၈၀ မမ တလုံးနဲ့ စပစ်ခတ်ခဲ့တယ်။ အဲအကြိမ်မှာ စခ၊ ရခ၊ ပခ စုစုပေါင်း ၇ ကောင်သေဆုံးပြီး ၅ ကောင်ဒဏ်ရာရသွားတယ်။ အဲတာပြီးတော့ (-) တွေ ဘက်က ပြန်ပစ်လို့ ကျနော်တို့ ဌာနေကို ခဏပြန်နားတယ်။ ကျနော်တို့ဘက်က အထိခိုက်မရှိခဲ့ဘူး။ ညနေ ၅ နာရီ ၁၅ မိနစ်မှာ နောက်တကြိမ် GPS စနစ်ပါတဲ့ ၄၀ မမ ၂ လုံး၊ ၈၀ မမ ၁ လုံးနဲ့ပစ်ခတ်ခဲ့တယ်ဗျ။ အဲအကြိမ်မှာက (-) အသေကတော့ ၅ ကောင်သေတယ်၊ ၃ ကောင် ဒဏ်ရာရသွားတယ်လို့ ကျနော်တို့အတွင်းသတင်းအရ သိထားရတယ်။ ကျနော်တို့ဘက်ကတော့ အထိခိုက်မရှိခဲ့ဘူး” လို့ ပြောပါတယ်။

တိုက်ခိုက်မှုကို မြင်းခြံခရိုင်၊ တပ်ရင်း၇ Zero ပြောက်ကျားတပ်ဖွဲ့နဲ့ နဂါးနီတပ်ရင်း ၁၊ ကျောက်ဆည်ခရိုင်အဖွဲ့တို့ ပူးပေါင်းတိုက်ခိုက်ခဲ့တာလို့လည်း သိရပါတယ်။

စစ်ကိုင်းတိုင်း၊ ဟုမ္မလင်းမြို့နယ်၊ အောက်တောင်ပေါ်ကျေးရွာမှာလည်း သင်္ကြန်တွင်း အဆိုတော် သရုပ်ဆောင်တွေနဲ့ ကျင်းပတဲ့ ဇာတ်ပွဲမှာ ဧပြီ ၁၄ ရက် သင်္ကြန်အကျနေ့ ည ၁၀ နာရီခွဲလောက် ဗုံးခွဲတိုက်ခိုက်ခံရတယ်လို့ ‌ဒေသခံတွေက ပြောပါတယ်။‌

“ည ၁၀ နာရီကျော်လောက်မှာ ပေါက်ကွဲတာ၊ မိန်းကလေး ၂ ယောက်သေတယ်" လို့ ဒေသခံအမျိုးသမီးတဦးက ပြောပါတယ်။

ပွဲခင်းအတွင်းရှိ ဆိုင်ကယ်ရပ်နားတဲ့နေရာမှာ ဆိုင်ကယ် ဒူးကာအတွင်း ဗုံးထည့်ဖောက်ခွဲခဲ့ရာ အမျိုးသမီး ၂ ဦး သေဆုံး၊ အမျိုးသား ၇ ဦးနဲ့ အမျိုးသမီး ၂ ဦး ဒဏ်ရာရရှိခဲ့ကြကြောင်း၊ အဆိုပါ ဖောက်ခွဲမှုကို PDF တွေက ဖောက်ခွဲတာလို့ စစ်ကောင်စီ ဝါဒဖြန့်ချိရေး လူမှုကွန်ရက်တွေမှာ ရေးသားဖော်ပြထားပါတယ်။

ထိခိုက်ဒဏ်ရာရရှိသူတွေကို လုံခြုံရေး တပ်ဖွဲ့ဝင်တွေက ဟုမ္မလင်းမြို့ တပ်မတော် ဆေးရုံကို ပို့ဆောင်ကာ ဆေးကုသပေးထားရပြီး ဗုံးခွဲတိုက်ခိုက်မှုနဲ့ပတ်သက်ပြီး ဘယ်အဖွဲ့ကမှ ထုတ်ပြန်တာမျိုး မတွေ့ရသေးပါဘူး။

စစ်ကိုင်းမြို့မှာတော့ ကမ်းနားလမ်း အမှတ်(၁) မြို့မရဲစခန်းအနီးရှိ စစ်ကောင်စီ ဗဟိုမဏ္ဍပ်မှာ ဧပြီ ၁၃ ရက်နေ့ သင်္ကြန်အကျနေ့ ညနေပိုင်းအချိန် ဗုံးပေါက်ကွဲခဲ့တယ်လို့ မြို့ခံတွေက ပြောပါတယ်။

"ညနေ ၅:၄၂ နာရီအချိန်မှာ ကမ်းနားလမ်းမှာရှိတဲ့ သင်္ကြန်မဏ္ဍပ်မှာ ဗုံးပေါက်ကွဲတာ၊ အရပ်သားပြည်သူ ၄ ယောက်ထိသွားတယ်။ အဲ့ဒီမဏ္ဍပ်က အမှတ် ၁ မြို့မရဲစခန်းနဲ့နီးတယ်၊ လုံခြုံရေးလည်းအပြည့်ရှိတယ်" လို့ မြို့ခံ အမျိုးသားတဦးက ပြောပါတယ်။

ဗုံးကွဲပြီးနောက် စစ်တပ်နဲ့ ရဲတပ်ဖွဲ့က ရမ်းသန်းပစ်ခတ်မှုတွေကြောင့် ၄ ဦး ထိခိုက်ခဲ့ပြီး ဘယ်အဖွဲ့က ဖောက်ခွဲခဲ့သလဲဆိုတာတော့ မသိရသေးပါဘူး။

သင်္ကြန်မဏ္ဍပ်မှာ စစ်ကောင်စီဘက်က ဗုံးဖေါက်ခွဲမှု ပြုလုပ်မယ်လို့ သတင်းကြိုရထားတာကြောင့် စစ်ကောင်စီရဲ့ပြုလုပ်တဲ့ သင်္ကြန်မဏ္ဍပ်တွေကို မသွားဖို့ ကြိုတင်သတိပေးတာတွေ ပြုလုပ်ခဲ့တယ်လို့ တော်လှန်ရေးနဲ့နီးစပ်သူတွေဆီက သိရပါတယ်။

သင်္ကြန်အကြိုနေ့ကလည်း စစ်သားနဲ ရဲတွေက ရေလာကစားတဲ့ လူငယ်တွေကို လမ်းပေါ်ဝမ်းလျားမှောက်ခိုင်းကာ ရိုက်နှက်ခဲ့တယ်လို့ မြို့ခံတွေကဆိုပါတယ်။

စစ်ကိုင်းတိုင်း၊ ဆာလင်းကြီးမြို့နယ်၊ ညောင်ပင်ကြီးရွာ ရဲစခန်းကို ဒေသခံပြည်သူ့ကာကွယ်ရေးအဖွဲ့တွေက ဧပြီ ၁၃ ရက် ညနေ ၆ နာရီခွဲလောက် လက်နက်ကြီးတွေနဲ့ ပစ်ခတ်ခဲ့တယ်လို့ ညောင်ပင်းကြီးရွာဒေသခံတွေက ပြောပါတယ်။

“လက်နက်ကြီးနဲ့ပစ်ခတ်လို့ ရဲ၃ဦးထိခိုက်ဒဏ်ရာရတယ်လို့တော့ ကြားထားရတယ်။ အဲလိုပစ်ခံရပြီး သိပ်မကြာဘူး ချင်းတွင်းမြစ်အရှေ့ဘက်ကမ်းကနေ စစ်သား ၂၀ ကျော် ညောင်ပင်ကြီးရဲစခန်းထဲ အင်အားလာဖြည့်တာတွေလည်း ရှိတယ်။ သူတို့တိုက်ပွဲဖြစ်ကြတော့မယ်ဆိုပြီး ကျနော်တို့ရဲစခန်းအနီးက ဒေသခံတွေ အကုန်ထွက်ပြေးနေရတယ်” ဒေသခံရွာသားတဦးကပြောပါတယ်။

ဧပြီ ၁၄ ရက်မနက်မှာ စစ်ကူလာတဲ့ စစ်ကောင်စီတပ်က ရဲစခန်းအနီးအနားက ထန်းတောရွာကိုရှာဖွေပြီး နေ့လယ်ပိုင်းမှာ ရွာကို မီးရှို့နေတာ တွေ့ရတယ်လို့ ဆိုပါတယ်။

စစ်ကောင်စီတပ်နဲ့ ပြည်သူ့ကာကွယ်ရေးအဖွဲ့တွေ စစ်ရေးတင်းမာနေတာကြောင့် ညောင်ပင်ကြီးရွာအနီးအနားက ကျေးရွာ ၉ ရွာက ဒေသခံ ၅၀၀၀ ကျော် နေရပ်စွန့်ခွာထွက်ပြေးနေကြရတယ်လို့ သိရပါတယ်။