မကွေးတိုင်း ရေစကြိုမြို့နယ် ပခန်းငယ်ရဲကင်းစခန်းကို ဖေဖော်ဝါရီ ၁ ရက်နေ့ မနက်ပိုင်းက ဒရုန်းနဲ့ ဗုံးကြဲတိုက်ခိုက်ခဲ့ပြီး စစ်ကောင်စီဘက်က ထိခိုက်ဒဏ်ရာရသူရှိနိုင်တယ်လို့ ရေစကြိုမြို့နယ် ပ.က.ဖ ကနေ သိရပါတယ်။

ရေစကြိုမြို့နယ် ပခန်းငယ်ရဲကင်းစခန်းကို မနေ့က မနက် ၆ နာရီလောက်မှာ စစ်အာဏာသိမ်း ၂ နှစ်ပြည့်ကို လက်တုံ့ပြန်တဲ့အနေနဲ့ ဒရုန်းနဲ့ အီနာဂါဗုံးသီး ၂ လုံးဖြတ်ချတိုက်ခိုက်ခဲ့တယ်လို့ ရေစကြိုမြို့နယ် ပ.က.ဖ ခေါင်းဆောင် ရဲဘော်ဝေကြီးက ဒီဗွီဘီကိုပြောပါတယ်။

“အဲဒီရဲစခန်းမှာ စစ်(...)တွေ အများကြီးတပ်စွဲထားတာဗျ။ အီနာဂါဗုံးသီး ၂ လုံးဖြုတ်ချတဲ့ အချိန်မှာ တလုံးကတော့ကျတယ်ဗျ။ နောက်တလုံးချတဲ့အချိန်မှာ ချချပြီးချင်း Drone Gun နဲ့ ဆွဲယူသွားတာကြောင့် ဒရုန်းတစင်းအပါဝင် အပိုပစ္စည်း တန်ဖိုး သိန်း ၈၀ လောက် နစ်နာဆုံးရှုံးပြီး ကျနော်တို့ရဲဘော်တွေ ထိခိုက်မှုမရှိဘဲ ဆုတ်ခွာနိုင်ခဲ့တယ်။”

တိုက်ခိုက်မှုအတွင်းမှာ စစ်ကောင်စီဘက်က ထိခိုက်ဒဏ်ရာရသူရှိနိုင်ပြီး ဒရုန်းကိုတော့ သူတို့ဘက်က Drone Gun နဲ့ ပစ်ချလိုက်လို့ ပြန်ယူလို့ မရခဲ့ဘူးလို့ ဆိုပါတယ်။

အဲဒီ ပခန်းငယ်ရဲကင်းစခန်းကို ၂၀၂၁ ခုနှစ် နိုဝင်ဘာ ၁၃ ရက်နေ့မှာ ဒေသကာကွယ်ရေးပူးပေါင်းတပ်ဖွဲ့တွေက တိုက်ခိုက်သိမ်းပိုက်ပြီး မီးရှို့ဖျက်ဆီးခဲ့သလို ၂၀၂၂ ခုနှစ် ဧပြီ ၂၈ ရက်နေ့မှာလည်း ဒေသကာကွယ်ရေးပူးပေါင်းတပ်ဖွဲ့တွေက ဝင်ရောက်စီးနင်း တိုက်ခိုက်ခဲ့လို့ စစ်ကောင်စီဘက်က ၁၄ ယောက်သေဆုံးပြီး ၃ ယောက်ဒဏ်ရာရရှိခဲ့တယ်လို့ သိရပါတယ်။

မကွေးတိုင်း မင်းတုန်းမြို့နယ်မှာ စစ်ကောင်စီရဲ့ စစ်ဆေးရေးဂိတ်စခန်းတခုကို ဇန်နဝါရီလ ၃၁ ရက်နေ့ ည ၁၁ နာရီခွဲလောက်မှာ စစ်အာဏာသိမ်း ၂ နှစ်ပြည့် အထိမ်းအမှတ်အနေနဲ့ ဝင်ရောက်တိုက်ခိုက်ခဲ့ပြီး စစ်ကောင်စီဘက်က ၂ ယောက်ထက်မနည်းဒဏ်ရာရရှိခဲတယ်လို Swallow-PDF ရဲ့ ခေါင်းဆောင် ဗိုလ်ပျံလွှားက ဒီဗွီဘီကို ပြောပါတယ်။

“ကျနော်တို့ ပထမသွားတုန်းကတော့ စစ်အာဏာသိမ်း ၂ နှစ်ပြည့် အသံတိတ်သပိတ်မှာ လမ်းပိုင်းဆိုင်ရာ ကြီးကြပ်ဖို့ သွားခဲ့ပေမယ့် သတင်းတွေပေါက်သွားလို့ စစ်(...)တွေတပ်စွဲထားတဲ့ ပြောင်းရွာနားက စစ်ဆေးရေးဂိတ်ကို လက်ပစ်ဗုံး ၃ လုံးအပါဝင် လက်နက်ငယ်တွေနဲ့ ပစ်ခတ်တိုက်ခိုက်ခဲ့တာ။” 

အဲဒီစစ်ကောင်စီရဲ့ စစ်ဆေးရေးဂိတ်ဟာ တိုင်းရင်းသားတွေနဲ့ ပြည်သူတွေကို မတရားဖမ်းဆီးတာနဲ့ ငွေညှစ်တာတွေ ပြုလုပ်ကာ နည်းမျိုးစုံဒုက္ခပေးနေတာကြောင့် ဝင်ရောက်တိုက်ခိုက်ခဲ့တာဖြစ်ပြီး ပြည်သူ့ကာကွယ်ရေး ရဲဘော်တွေ ထိခိုက်မှုမရှိဘဲ ဆုတ်ခွာနိုင်ခဲ့ကြတယ်လို့ ဗိုလ်ပျံလွှားက ပြောပါတယ်။

Sallow-PDF အနေနဲ့ လက်နက်ခဲယမ်းတွေ စုဆောင်းနေပြီး စစ်အာဏာရှင်အမြစ်ပြတ်တဲ့အထိ တိုက်ပွဲဝင်သွားမှာဖြစ်လို့ မိဘပြည်သူတွေအနေနဲ့ တတ်နိုင်တဲ့နေရာကနေ ပူးပေါင်းပါဝင်ကူညီပေးကြဖို့ကိုလည်း တောင်းဆိုထားပါတယ်။

တိုက်ခိုက်မှုဖြစ်စဉ်တွေမှာ ထိခိုက်သေဆုံးတဲ့အခြေနေကို ဒီဗွီဘီက သီးခြားအတည်မပြုနိုင်သေး သလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

မွန်ပြည်နယ်၊ ကျိုက်ထိုမြို့နယ်၊ ဝင်းကလော့ကျေးရွာအနီးက စစ်ကောင်စီဂိတ်စခန်းဟာ ဇူလိုင် ၂၃ ရက်နေ့ ညနေ ၄ နာရီအချိန်လောက်က ပစ်ခတ်တိုက်ခိုက်ခံခဲ့ရတယ်လို့ သထုံခရိုင်ပြည်သူ့ကာကွယ်ရေးတပ်ဖွဲ့ တာဝန်ရှိသူတွေက ဒီဗွီဘီကို ပြောပါတယ်။

အဲဒီဝင်းကလော့ စစ်ကောင်စီဂိတ်စခန်းကို ကရင်အမျိုးသားလွတ်မြောက်ရေးတပ်မတော် KNLA၊ ကျိုက်ထိုတော်လှန်ရေးအင်အားစု KRF ပူးပေါင်းအဖွဲ့က လက်နက်ကြီး၊ လက်နက်ငယ်တွေနဲ့ သွားရောက် ပစ်ခတ်တိုက်ခိုက်ခဲ့တာပါ။

စစ်ကောင်စီဂိတ်စခန်း တိုက်ခိုက်ခံရတာကြောင့် စစ်ကောင်စီဘက်က ထိခိုက်သေဆုံးမှု ရှိနိုင်ကြောင်းနဲ့ ထိခိုက်သေဆုံးမှု အခြေအနေ အသေးစိတ်ကို ဆက်လက် စုံစမ်းနေတယ်လို့ သထုံခရိုင် PDF တာဝန်ခံက ပြောပါတယ်။

စစ်ကောင်စီဂိတ်စခန်း တိုက်ခိုက်ခံရပြီးနောက် မိနစ် ၁၀ နီးပါးကြာ အပြန်အလှန် ပစ်ခတ်မှု ဖြစ်ပေါ်ခဲ့ပေမယ့် ကရင်အမျိုးသားလွတ်မြောက်ရေးတပ်မတော် (KNLA) ပူးပေါင်းအဖွဲ့က တစုံတရာ ထိခိုက်မှုမရှိဘဲ အောင်မြင်စွာဆုတ်ခွာနိုင်ခဲ့တယ်လို့ ဆိုပါတယ်။

ဒေသခံတွေအဆိုအရ အဲဒီစစ်ကောင်စီဂိတ်စခန်းဟာ ဥယျာဉ်ခြံသွားနေတဲ့ ဒေသခံတွေအပြင် လမ်းသွားလမ်းလာ ဆိုင်ကယ်နဲ့ကားတွေကိုလည်း အမြဲလိုလို တင်းတင်းကြပ်ကြပ်စစ်ဆေးနေပြီး စစ်ဆေးမခံတဲ့ ကားတွေကိုလည်း  ပစ်ခတ်တိုက်ခိုက်နေတာပါ။

ကျိုက်ထိုမြို့နယ်မှာ ပြီးခဲ့တဲ့ ဇူလိုင်ဒုတိယအပတ်ကစပြီး စစ်ကောင်စီတပ်နဲ့ KNLA ပူးပေါင်းတပ်တို့ကြား တိုက်ပွဲ‌တွေ ငြိမ်သက်နေပေမယ့် စစ်ကောင်စီတပ်ကတော့ ကျေးရွာတွေထဲကို လက်နက်ကြီး ပစ်ခတ်တိုက်ခိုက်တာတွေ ဆက်တိုက်လုပ်ဆောင်နေတာပါ။