စစ်ကိုင်းတိုင်း၊ မင်းကင်းမြို့နယ်၊ တောင်တွင်းဒေသ မအူရွာအခြေစိုက် စစ်ကောင်စီတပ်နဲ့ ပျူစောထီး ပူပေါင်းစခန်းအား ဧပြီ ၁၀ ရက် ညနေ ငါးနာရီခွဲလောက်မှာ အပြီးအပိုင် စခန်း သိမ်းနိုင်ခဲ့တယ်လို့ Freedom Revolution Force (FRF) ဗဟို သတင်းနှင့် ပြန်ကြားရေးဌာနက ထုတ်ပြန်ပါတယ်။

"အခုတိုက်ပွဲ တိုက်ဖို့ရာအတွက် လွန်ခဲ့တဲ့ တလကျော်ကျော်လောက်ကတည်းက တိုက်ပွဲ ဖော်ဆောင်ဖို့ မင်းကင်းအဖွဲ့က ဦးဆောင် အစီအစဥ်ဆွဲခဲ့ကြတာဗျ။ တိုက်ပွဲကြာချိန်ကတော့ သုံးနာရီလောက် ကြာတယ်ဗျ။ နေ့ခင်း ၂ နာရီလောက်က တိုက်ပွဲစခဲ့တာ။ သူတို့ဘက်က အထိအခိုက် တော်တော်များတော့ လေကြောင်း အကူလာတယ်။ အဲမှာ သူတို့ ဆုတ်ရင်း လူတွေ ပြန်သယ်နိုင်သွားတယ်ဗျ။ လက်နှက်အချို့လည်း သိမ်းဆည်းရခဲ့တယ်ဗျ။ ကိုယ့်​ဘက်က အထိအခိုက်ကတော့ မစိုးရိမ်ရ ဒဏ်ရာပေါ့။ ၄၀ မမ မှန်တဲ့ရဲဘော် နှစ်ယောက်နဲ့ နောက်စေ့ကျည်ရှပ်မှန်တဲ့ ရဲဘော်တဦးနဲ့ဆို သုံးဦးရယ်၊ အခြားအဖွဲ့ကလည်း ၃ ဦးလောက် ရှိတော့ စုစုပေါင်း ၆ ဦးလောက် ရှိမယ်ဗျ။ အဲဒီစခန်းကို သိမ်းပိုက် မီးရှို့နိုင်ခဲ့တယ်" လို့ FRF သတင်းပြန်ကြားရေး တာဝန်ခံ ဆရာ ချစ်ဖြိုးက ပြောပါတယ်။

အဆိုပါ စခန်းဟာ မြေအောက် ဘန်ကာ၊ ကတုတ်ကျင်းတွေနဲ့ ခံစစ်ပြင် တည်ဆောက်ထားတဲ့ စခန်း ဖြစ်ကာ မဟာမိတ်တပ်ဖွဲ့ဘက်မှ ၄၀ မမ လက်နက်ကြီးတွေ၊ စနိုက်ပါတွေ၊ မောင်းပြန် ရိုင်ဖယ်တွေနဲ့ သုံးနာရီလောက် တိုက်ခိုက်သိမ်းပိုက်နိုင်ခဲ့တာဖြစ်ပြီး စစ်ကောင်စီဘက်က MI 35 တစီးနဲ့ လေကြောင်း ပစ်ကူပေးခဲ့ပေမဲ့ အထိအခိုက် အကျအဆုံး များစွာနဲ့ စခန်းအား စွန့်ခွာသွားကြတယ်လို့ ဆိုပါတယ်။

အဆိုပါ တိုက်ခိုက်မှုကို Freedom Revolution Force FRF (Eagle 2) စစ်ကြောင်းနဲ့အတူ KG အဖွဲ့၊ မင်းကင်းမြို့နယ် PDF၊ မင်းကင်း ပကဖ၊ ရွှေဘိုခရိုင် တပ်ရင်း ၁၉၊ ရွှေဘိုခရိုင်တပ်ရင်း ၂၄ တို့ ပူးပေါင်းဆောင်ရွက်ခဲ့ကြပါတယ်လို့ FRF က ထုတ်ပြန်ပါတယ်။

စစ်ကိုင်းတိုင်း၊ ဆားလင်းကြီးမြို့ပေါ်က စစ်ကောင်စီ အခိုင်အမာတပ်စွဲထားတဲ့ စခန်းသုံးခုကို မတ် ၂၆ ရက် မနက် ၁၀ နာရီက မိုင်းဆွဲတိုက်ခိုက်ခဲ့တယ်လို့ ဒေသခံကာကွယ်ရေးခေါင်းဆောင်တွေက ပြောပါတယ်။

မတ် ၂၅ ရက်က အင်းအား ၁၅၀ လောက်နဲ့ ဆားလင်းကြီးမြို့နယ်ထဲ စစ်‌ကြောင်းထိုးပြီးနောက် အဆိုပါ စစ်ကောင်စီစခန်းတွေမှာ အနားယူနေတဲ့အချိန် အခုလို ဒရုန်းအသုံးပြု တိုက်ခိုက်ခဲ့ကြတာလို့ ဆိုပါတယ်။

“ကျနော်တို့ ဒရုန်းအသုံးပြုပြီး ဗုံးသီး ၅ လုံး အသုံးပြုကာ မနက် ၁၀ နာရီလောက်ကနေ မွန်းတည့် ၁၂ နာရီလောက်အထိ မြို့လယ်ဂိတ်ကို ၁ လုံး၊ ထွေအုပ်ရုံးပေါ် ၁ လုံး၊ နိဗ္ဗာန်ကျောင်းနားကဂိတ်မှာ ၃ လုံး၊ စုစုပေါင်း နေရာသုံးနေရာခွဲပြီး ဗုံးသီး ၅ လုံးအသုံးပြုပြီး drone mission လုပ်ခဲ့တယ်ဗျ။ အဲဒီ drone mission ထဲက နိဗ္ဗာန်ဘုန်းကြီးကျောင်းနားက အကြမ်းဖက်စစ်ကောင်စီတပ်များ တပ်စွဲ‌နေတဲ့ ဂိတ်နေရာကို ကျနော်တို့ ဗုံးသီးကို ကွက်တိ ချနိုင်ခဲ့တယ်ဗျ။ အဲတာကြောင့် အကြမ်းဖက်စစ်တပ်က ၄ ကောင် ဒဏ်ရာရရှိထားတယ်။ ၂ ကောင်က‌တော့ သေ‌နိုင်လောက်သည်အထိ ဒဏ်ရာပြင်းထန်ရရှိထားတယ်လို့  အတွင်းဖရဲသီးစီကနေ သိထားရတယ်” လို့ Salingyi Special Task Force - SSTF ရဲ့ တာဝန်ရှိသူ ကိုဖိုးဇေက ပြောပါတယ်။

ဒီတိုက်ခိုက်မှုကို Salingyi Special Task Force - SSTF၊Shar Htoo Waw Drone နည်းပညာအဖွဲ့၊ စစ်ကိုင်းခရိုင် တပ်ရင်း -၄ (MSPDF)၊ အညာသား ပြောက်ကျားတပ်ဖွဲ့၊Phoenix အထူးပြောက်ကျားတပ်ဖွဲ့၊ Salingyi Special Task Force - SSTF တပ်ခွဲ  "SPACE MAN" Drone အဖွဲ့တို့ ပူးပေါင်းဆောင်ရွက်ခဲ့တာလို့ ဆိုပါတယ်။

ပြည်သူကာကွယ်ရေးအဖွဲ့တွေ တိုက်ခိုက်တာကို စစ်ကောင်စီဘက်မှ လက်နက်ကြီး ၄ ကြိမ်ပစ်ခတ်ခဲ့တာကြောင့် ဆားလင်းကြီးမြို့နယ်၊ မင်းတောရွာအတွင်း နေအိမ်ပေါ် လက်နက်ကြီးကျရောက်ပေါက်ကွဲပြီး ပြည်သူတဦး ဒဏ်ရာရကာ အိမ်ရဲ့ အမိုး၊ အကာတွေနဲ့ အိမ်တွင်း ပစ္စည်းတွေ ပျက်စီးဆုံးရှုံးခဲ့တယ်လို့ ဒေသခံတွေက ပြောပါတယ်။

စစ်ကိုင်းတိုင်းဒေသကြီး၊ ဝက်လက်နဲ့အရာတော်မြို့ အကြားမှာရှိတဲ့ ရွှေပန်းကုံးရွာဘက်ကို စစ်ကြောင်းထိုးလာတဲ့ အင်အား ၃၀၀ လောက်ပါ စစ်ကောင်စီတပ်နဲ့ ပြည်သူ့ကာကွယ်ရေးပူးပေါင်းတပ်တို့ မတ်လ ၂၄ ရက် နေ့ ညနေ ၆ နာရီလောက် တိုက်ပွဲဖြစ်ပွားခဲ့တယ်လို့ မုံရွာခရိုင်ပြည်သူ့ကာကွယ်ရေးတပ်မတော် (Chindwin Attack Force) ပြန်ကြားရေးတာဝန်ခံက ပြောပါတယ်။

၁ နာရီခွဲလောက်ကြာ တိုက်ပွဲဖြစ်ပွားခဲ့ပြီး စစ်ကောင်စီတပ်က ၈ ယောက်သေဆုံး၊ ၁၇ ယောက်ဒဏ်ရာ ရရှိခဲ့တယ်လို့ ဆိုပါတယ်။

"စစ်ခေါင်းဆောင် မုံရွာလာတုန်းက လုံခြုံရေးလာပေးတဲ့ ရွှေဘိုကတပ်တွေပါ အင်အား ၃၀၀ ခန့်ရှိတယ်။ ကျနော်တို့သွားပစ်တဲ့အချိန်မှာ ၂၀၀ လောက်က ရွှေပန်းကုံးရောက်သွားပြီ။ ကတို့ကုန်းရွာကို ဖြတ်နေတုန်း အင်အား ၁၀၀ ခန့်ကို ဖြတ်တိုက်တာပါ။ ဒီကောင်တွေဆီက ၈ ယောက် သေ၊ ၁၇ ယောက်ဒဏ်ရာရတယ် ဒါကတော့ ကျနော်တို့မြင်တာပေါ့။ လိုင်းအခက်အခဲကြောင့် ဒီနေ့မှထုတ်ပြန်နိုင်တာပါ" လို့ မုံရွာခရိုင်ပြည်သူ့ကာကွယ်ရေးတပ်မတော် (Chindwin Attack Force) ပြန်ကြားရေးတာဝန်ခံက  ဒီဗွီဘီကိုပြောပါတယ်။

အဆိုပါ တိုက်ခိုက်မှုကို မုံရွာခရိုင်ပြည်သူကာကွယ်ရေးတပ်မတော် (Chindwin Attack Force) တပ်ရင်း - ၃ တပ်ခွဲ - ၃  ဂဠုန်နက် PDF၊9-One PDF၊ယက္ခညီနောင် (LPDF)၊ဒေါင်းညီနောင် (LPDF)၊အောင်စစ်သည် မြွေပွေး (LPDF)၊ တိုက်နယ် 6 (ပကဖ)၊AK 2 (ပကဖ)၊Danger (ပကဖ)၊GENERATION DEFENCE FORCE AYADAW (ပကဖ)၊တာနော (ပကဖ) တို့ ပူးပေါင်းတိုက်ခိုက်ခဲ့တာဖြစ်ပြီး တိုက်ပွဲတွေ ဆက်လက်ဖော်ဆောင်နိုင်ဖို့ လက်နက်ခဲယမ်းတွေ အကူအညီ လိုအပ်နေတယ်လို့ ဆိုပါတယ်။

ဓာတ်ပုံ/Video - Chindwin Attack Force