စစ်ကိုင်းတိုင်း၊ မြောင်မြို့နယ်မှာ မေ ၆ ရက် ညနေပိုင်းက စစ်ကောင်စီစစ်ကြောင်း တိုက်ခိုက်ခံရပြီး ထိခိုက် သေဆုံးသူများပြားနိုင်တယ်လို့ မြင်းခြံကျားနက်တပ်ဖွဲ့ MBT ကနေသိရပါတယ်။

မနေ့ ညနေ ၄ နာရီကျော်လောက်က  စစ်ကောင်စီစစ်ကြောင်းကို သနပ်ကုန်ရွာ တံတားနားမှာ လက်နက်ကြီး/ငယ်တွေနဲ့ ပစ်ခတ်တိုက်ခိုက်ခဲ့တာလို့ MBT ရဲ့ခေါင်းဆောင် ဗိုလ်မိုက်ခဲက ပြော ပါတယ်။

“ကျောက်ရစ်ရဲစခန်းက အင်အား ၅၇ ယောက်လောက်နဲ့ သွားခေါ်တာ။ အဲဒီစစ်ကြောင်းကို သနပ်ကုန်ရွာ တံတားနားကစောင့်ကြိုတိုက်ခိုက်ခဲ့တာ။ စစ်ကောင်စီဘက်က ၂၀ ယောက် လောက် သေဆုံးနိုင်ပြီး အများအပြား ဒဏ်ရာရခဲ့တယ်”

တိုက်ခိုက်မှုကို MBT၊ PSF၊ MGN 9 Star၊ RBDFနဲ့ မဟာမိတ်တပ်ရင်း တပ်ဖွဲ့တွေ ပူးပေါင်းတိုက်ခိုက်ခဲ့တာဖြစ်ပြီး  ရဲဘော်တွေ ထိခိုက်မှု မရှိခဲ့ဘူးလို့ဆိုပါတယ်။

ဖြစ်စဉ်နဲ့ပတ်သက်လို့  မြင်းခြံကျားနက်တပ်ဖွဲ့ MBT ရဲ့အပြောသာရှိပြီး သီးခြား အတည် မပြုနိုင် ပါဘူး။

မကွေးတိုင်း မြိုင်မြို့နယ်မှာလည်း  သရက်ကွရွာမှာရှိတဲ့ စစ်ကောင်စီတပ်ကို   မေ ၅ ရက် ညနေ ၃ နာရီခွဲက ဒရုန်းနဲ့ ဗုံးသီးချ တိုက်ခိုက်ခဲ့တဲ့အတွက် ထိခိုက်သေဆုံးသူ ရှိနိုင်တယ်လို့  ပခုက္ကူမြို့နယ် ပကဖ က သိရပါတယ်။

တိုက်ခိုက်မှုအတွင်းမှာ စစ်ကောင်စီတပ်သားတွေနဲ့ ပျူစောထီးတွေ ထိခိုက်သေဆုံးသူရှိနိုင်ပေမဲ့ အရေတွက်အတိကျမသိရသေးတာကြောင့် ဆက်လက်စုံစမ်းနေတယ်လို့ ပခုက္ကူပကဖရဲ့ သတင်းနှင့်ပြန်ကြားရေးတာဝန်ခံ အတီးက ပြောပါတယ်။

အဲဒီတိုက်ခိုက်မှုအတွင်း ညီနာင်မဟာမိတ်တပ်ဖွဲ့ကရဲဘော်တွေ ထိခိုက်မှု မရှိခဲ့ဘူးလို့ ပြောပါတယ်။ မေ ၄ ရက် မနက်ပိုင်းကလည်း မြိုင်မြို့နယ်မှာ ပခုက္ကူပကဖအပါဝင် ပူးပေါင်းတပ်ဖွဲတွေက စစ်ကောင်စီကားတစီးကို တိုက်ခိုက်ခဲ့လို ထိခိုက်သေဆုံးသူများပြားနိုင်တယ်လို့ ပခုက္ကူပကဖက သိရပါတယ်။

ဖြစ်စဉ်နဲ့ပတ်သက်လို့  စစ်ကောင်စီဘက်က သတင်းထုတ်ပြန်တာ မရှိသလို သီးခြားအတည်မပြုနိုင်ခြင်းလည်း မရှိပါဘူး။

စစ်ကိုင်းတိုင်း၊ အရာတော်မြို့နယ်၊ ကြွေပုဂံရွာကို စစ်ကောင်စီတပ်က မေ  ၅ ရက် မနက် ၉ နာရီလောက်မှာ မီးရှို့ခဲ့တယ်လို့ သိရပါတယ်။

ကြွေပုဂံရွာကို အမှတ် ၁၀၊ စစ်အခြေခံလေ့ကျင့်ရေးတပ်က စစ်သား ၆၀ ဝန်းကျင်နဲ့ ဝင်ရောက်လာပြီး မီးရှို့ခဲ့တာလို့ ဒေသခံတဦးက ပြောပါတယ်။

“ရွာထဲကို သေနတ်ပစ်ဖောက်ဝင်လာပြီး မီးရှို့တာ။ မီးလောင်ပျက်စီးတဲ့ နေအိမ်အရေအတွက် ကိုတော့ မသိရသေးဘူး။ ကြွေပုဂံနဲ့ ဒုစစ်က ရွာသားတွေ ပြေးနေရတယ်။”

​ကြွေပုဂံရွာကို မီးရှို့တဲ့ စစ်သားတွေက ကြွေပုဂံရွာရဲ့ အနောက်ဘက်ကို ထွက်သွားခဲ့ပြီး လတ်တလောမှာ ပျက်စီးသွားတဲ့ နေအိမ်တွေကို အတည်မပြုနိုင်သေးဘူးလို့ သိရပါတယ်။

စဥ့်ကူးမြို့နယ်၊ ကြက်တူရွေးရွာကို စစ်ကောင်စီတပ်သားတွေက စစ်ကြောင်းထိုး ဝင်ရောက်လာပြီး မေ ၄ ရက် မနက်ပိုင်းမှာ မီးရှို့ခဲ့တယ်လို့ ဗိုလ်ကျားကြီးအဖွဲ့မှ ဗိုလ်ကျားကြီးက ပြောပါတယ်။

“အင်အား ၇၀ လောက်နဲ့ ဟင်္သာမဘုန်းကြီး​ကျောင်းထဲ တပ်စွဲထားတယ်။ အိမ်က ၃ လုံး မီးရှို့တယ်။ ရွာသားတွေက အနီးအနားကို သူတို့စစ်သားတွေ ရောက်ကတည်းက ရှောင်နေကြတာ။”

စစ်ကောင်စီတပ်သားတွေက မေ ၃ ရက် နေ့ခင်းပိုင်းမှာ ကြက်တူရွေး၊ ဟင်္သာမ၊ မြစ်ကမ်းကြီး ရွာတွေကို စစ်ကြောင်းထိုး ဝင်ရောက်လာပြီးနောက် လက်နက်ကြီး ရမ်းပစ်ခတ်ခဲ့တယ်လို့ ပြောပါတယ်။

စစ်​ကောင်စီတပ်က လက်နက်ကြီး ရမ်းပစ်ခတ်မှုကြောင့် ပြည်သူ့နေအိမ်နှစ်လုံး ထိမှန် ပျက်စီးခဲ့တယ်လို့ သိရပါတယ်။

စစ်ကောင်စီတပ် စစ်ကြောင်းကြောင့် အနီးအနား ကျေးရွာတွေက ပြည်သူ ၃,၀၀၀ ကျော် ထွက်ပြေး တိမ်းရှောင်နေရပါတယ်။

စစ်ကိုင်းတိုင်း ရွှေဘိုမြို့တက္ကသိုလ်အနီး အခြေချတပ်စွဲထားတဲ့ စစ်ကောင်စီတပ်က အင်အား ၄၂ ဦး ပါ စစ်ကြောင်းဟာ ရွှေဘို-ကျောက်မြောင်းလမ်းအတိုင်း စစ်ကြောင်းထိုးလာချိန် စောင့်ဆိုင်း တိုက်ခိုက်ခဲ့တယ်လို့ ပြည်သူ့ကာကွယ်ရေးတပ်တွေက ပြောပါတယ်။

မေ ၃ ရက် မနက် ၆ နာရီလောက်မှာ လမ်းရှင်းဖို့  ကျေးရွာတွေဘက်ကို ရွှေဘို-ကျောက်မြောင်း လမ်းအတိုင်း စစ်ကြောင်းထိုးလာရာ တအုံးရွာကတဆင့် အုးပေါက်ရွာအရှေ့ဘက်ကို အရောက် အသင့်စောင့်နေတဲ့ BLack Wolf Army နဲ့ ပူးပေါင်းကာကွယ်ရေးတပ်တွေနဲ့ ထိတွေ့တိုက်ပွဲ ဖြစ်ပွားခဲ့တယ်လို့ ဆိုပါတယ်။

Black Wolf Army က ပြောရေးဆိုခွင့်ရှိသူတဦးက "ကျနော်တို့က သတင်းရထားတာပါ။ ပထမလမ်းတင်စောင့်တိုက်မလို့ကို ဒီကောင်တွေက တအုံရွာမှာ ပြည်သူတွေကို ဖမ်းသွားတာ။ ပြည်သူတွေကို အုန်းပေါက်ဘုရားမှာ ထားပြီး ဆက်အထွက်ကျနော်တို့နဲ့ ထိတွေ့တာပါပဲ။  လက်နက်ကြီး လက်နက်ငယ်တွေနဲ့ပါ။ လေ့ကျင့်ရေး ၈  က ထွက်လာတဲ့ကားကိုလည်း မိုင်းဆွဲ နိုင်ခဲ့ပါတယ်။ သေတာက ၃ ဦး၊ ဒဏ်ရာရတာတော့ ၄ ဦးလောက်ပါ။ ဒရုန်းနဲ့ လိုက်ဗုံးကြဲတယ်။ ပြီးတော့ ခမရ ၁၂ က ထောက်ပို့ ၁၂ ဘီးကားကို ကင်းပုန်းတွေကြားက မိုင်းဆွဲနိုင်ခဲ့ပါသေးတယ်။ တစ်ရက်ထဲကို သုံးကြိမ်ပါ” လို့ ပြောပါတယ်။ 

အဲဒီစစ်ကြောင်းဟာ တအုံကျေးရွာအရောက်မှာ ဒေသခံ ၁၅ ဦးထက်မနည်း ဖမ်းဆီးကာ အုံးပေါက်ရွာဘက်ကို ဆက်လက်စစ်ကြာင်းထိုးလာခဲ့ကာ လူသားဒိုင်းအဖြစ် ဖမ်းဆီးလာတဲ့ ပြည်သူတွေကို အုံးပေါက်ရွာ အလယ်ဘုရားမှာ ထားခဲ့တယ်လို့ သိရပါတယ်။